ރެއާލް މެޑްރިޑަށް ކުޅެމުން އައި ބްރެޒިލްގެ މިޑްފީލްޑަރު ޓީމު ދޫކޮށްލިނަމަވެސް، ޕްލޭނަށް އެއްވެސް ބަދަލެއް ނާންނާނެކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފިއެވެ.

ކަސެމީރޯ ވަނީ ރެއާލް ދޫކޮށް މެންޗެސްޓަރ ޔުނައިޓެޑަށް ބަދަލުވާން ނިންމާފައެވެ. ކަސެމީރޯ ގަތުމަށް ޔުނައިޓެޑުން ރެއާލަށް 60 މިލިއަން ޔޫރޯ ޚަރަދުކުރާނެއެވެ. އެއަށްފަހު ޔުނައިޓެޑުގައި ކަސެމީރޯ ދައްކާ ކުޅުމަށް ބަލާފައި، ޔުނައިޓެޑުން އިތުރުން 10 މިލިއަން ޔޫރޯ ދައްކާނެކަމަށް މީޑިއާ ރިޕޯޓުތަކުގައިވެއެވެ. ރެއާލާއެކު ކާމިޔާބު ދުވަސްތަކެއް ހޭދަކުރުމަށްފަހު ކަސެމީރޯ ޔުނައިޓެޑަށް ބަދަލުވާނީ ހަތަރު އަހަރުގެ އެއްބަސްވުމެއްގެ ދަށުންނެވެ.

މިކަމާ ގުޅިގެން އަންޗެލޮޓީ ބުނީ، އެބަދަލުގެ ސަބަބުން އޭނާގެ ޕްލޭނަށް އެއްވެސް ބަދަލެއް ނާންނާނެކަމަށެވެ. އޭނާ ވަނީ، މިޑްފީލްޑުގައި ލޫކާ މޮޑްރިޗް، ޓޯނީ ކްރޫސް، އެޑުއާޑޯ ކަމަވިންގާ، ފެޑެރިކޯ ވަލްވާޑޭ، އައުރެލިން ޗުއަމެނީ އަދި ޑެނީ ސެބަލޯސް ހިމެނޭ ކަމަށް ބުނެފައެވެ. އަންޗެލޮޓީ ބުނީ 6 މިޑްފީލްޑަރުންނަކީ މި ސީޒަނަށް އެންމެ ރަނގަޅު އަދަދެއް ކަމަށެވެ. މީގެ އިތުރުން އޭނާ ބުނީ އެ ކުޅުންތެރިންނަކީ ވަރަށް ރަނގަޅަށް ކުޅޭ ކުޅުންތެރިންކަމަށެވެ.

ރެއާލް ދޫކޮށްލަން ކަސެމީރޯ ނިންމާފައިވާއިރު، އޭނާ ވަނީ އެ ޓީމާއެކު 18 ތައްޓެއް ކާމިޔާބުކޮށްފައެވެ. އޭގެ ތެރޭގައި ސްޕެނިޝް ލީގާއި، ކޮޕަރ ޑެލްރޭ، ސްޕެނިޝް ސުޕަރ ކަޕް، ޔުއެފާ ޗެމްޕިއަންސް ލީގު، ޔުއެފާ ސުޕަރ ކަޕް އަދި ފީފާ ކުލަބް ވޯލްޑް ކަޕް ހިމެނެއެވެ. ކަސެމީރޯއަކީ ރެއާލާއެކު ފަސް އަހަރު ޗެމްޕިއަންސް ލީގު ކާމިޔާބުކުރި ކުޅުންތެރިންގެ ތެރޭގައި ހިމެނޭ ކުޅުންތެރިޔެކެވެ.