ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރެވޭނީ ގާނޫނަށް ބަދަލުގެނެސްގެން - ރައީސް
11 މާރިޗު 2024 | ހޯމަ 14:50ކައުންސިލްތައް ގިންތިކޮށްފައި ހުންނަ ގޮތުން އެކަން ކުރުމަށް ދަތިވާކަަަމަށް ވިދާޅުވި
ރައީސުލްޖުމްހޫރިއްޔާ ޑރ. މުހައްމަދު މުއިއްޒު
ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރެވޭނީ ގާނޫނަށް ބަދަލު ގެނެސްގެންކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް އެފަދައިން ވިދާޅުވީ އާންމު މީހެއްގެ ސުވާލަކަށް ޖަވާބުދެއްވަމުންނެވެ. އިދާރީ މުވައްޒަފުންގެ މުސާރައަށް ބަދަލެއް ގެނައުމުގެ ވިސްނުންފުޅު ގެންގުޅުއްވާ ކަމަށް ރައީސް ވިދާޅުވިއެވެ. އަދި މަޖިލީހުގެ ކަމާ ގުޅުންހުރި ގާނޫނުގެ ތެރެއިން ކައުންސިލްތައް ގިންތިކޮށްފައިވަނީ ވަރަށް ދަށް ފަންތިއެއްގައި ކަމަށްވެސް ރައީސް ވިދާޅުވިއެވެ. އެހެންނަމަވެސް ކައުންސިލްތަކުގެ އިދާރީ މުވައްޒަފުންގެ މުސާރަ ބޮޑުކުރަން ސަރުކާރާއި މާލީ ވުޒާރާއިން މަސައްކަތް ކުރާކަމަށް ވަނީ ވިދާޅުވެފައެވެ. އަދި ކައުންސިލްތައް ގިންތިކޮށްފައި ހުންނަ ގޮތުން އެކަން ކުރުމަށް ދަތިވާކަަަމަށް ވިދާޅުވިއެވެ.
ރައީސް ވިދާޅުވީ ކައުންސިލްތަކުގެ މުވައްޒަފުންގެ މުސާރަ ބޮޑުކުރައްވަން ބޭނުންފުޅުވާ ނަމަވެސް، އެކަން ވާނީ އާމްދަނީ އިތުރުވެގެން ކަމަށެވެ. ކައުންސިލްގެ އިދާރީ މުވައްޒަފުންގެ މުސާރައިގެ މައްސަލައަކީ ވަރަށް ބޮޑު މައްސަލައެއް ކަމަށް ވީނަމަވެސް، ކައުންސިލްތަކުގެ އިދާރީ މުވައްޒަފުންގެ މުސާރައަށް މިހާރުން މިހާރަށް ހައްލެއް ގެނައުމަކީ ދަތި ކަމެއްކަން އެމަނިކުފާނު ފާހަގަކުރެއްވިއެވެ. އެފަދަ ބަދަލެއް ގެނެވޭނީ ރައްޔިތުންގެ މަޖިލީހުގެ ތެރެއިން ކަންތައްތަކެއް ކުރެވިގެންކަމަށް ރައީސް ވިދާޅުވިއެވެ.
