އާދިއްތަ ދުވަހުގެ ނިޔަލަށް އައްޑޫގައި ތިބި ހުރިހާ އިންޑިއާ ސިފައިން ފޮނުވާލައިފި - އެމްއެންޑީއެފް
އެއްބަސްވެފައިވަނީ މޭ 10ގެ ނިޔަލަށް ރާއްޖޭގައި ތިބި ހުރިހާ އިންޑިއާ ސިފައިން ގެންދިއުމަށް
އިންޑިއާ ސިފައިންނާއި ދިވެހި ސިފައިން
އާދިއްތަ ދުވަހުގެ ނިޔަލަށް އައްޑޫގައި ތިބި އިންޑިއާ ހުރިހާ ސިފައިން ފޮނުވާލާފައިވާކަމަށް އެމްއެންޑީއެފުން ބުނެފިއެވެ.
އެއްބަސްވެފައި ވަނީ މޭ 10ގެ ނިޔަލަށް ރާއްޖޭގައި ތިބި ހުރިހާ އިންޑިއާ ސިފައިން އަނބުރާ ގެންދިއުމަށް ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ މި އަހަރުގެ ރިޔާސީ ބަޔާނުގައި ވިދާޅުވެފައެވެ. ރައީސް އޭރު ވިދާޅުވީ ރާއްޖޭގައި ތިބި އިންޑިއާ ސިފައިން ރާއްޖެއިން ބޭލުމުގެ މަސައްކަތް ކުރަމުންދާ ކަމަށާއި، އެކަން ކުރަނީ ޑިޕްލޮމެޓިކް އުުސޫލުތަކުގެ މަތިން މަޝްވަރާކޮށްގެން ކަމަށެވެ. އެންމެ ފަހުގެ މަޝްވަރާތަކުން އެއްބަސްވެފައިވަނީ ރާއްޖޭގައި އިންޑިއާ ސިފައިން ތިބި އޭވިއޭޝަން 3 ޕްލެޓްފޯމުގެ ތެރެއިން ފުރަތަމަ ޕްލެޓްފޯމްގައި ތިބި ސިފައިން 10 މާޗް 2024ގެ ކުރިން އަނބުރާ ގެންދިއުމަށް ކަމަށް ރައީސް ވިދާޅުވިއެވެ. އަދި ބާކީ 2 ޕްލެޓްފޯމުން، 10 މޭ 2024ގެ ކުރިން މިލިޓަރީ ފަރާތްތައް ގެންދާނެ ކަމަށް ރައީސް ވިދާޅުވިއެވެ.
އެމްއެންޑީއެފްގެ މީޑިއާ އޮފިޝަލް ރާއްޖެ ޓީވީއަށް ވިދާޅުވީ އައްޑޫގައި ތިބި ހުރިހާ އިންޑިއާ ސިފައިން ފުރާފައިވާކަަމަށާއި، އެ މީހުން ފުރީ އެކި ގްރޫޕް ގްރޫޕަށް ކަމަށެވެ. އިންޑިއާއިން ރާއްޖޭގައި ދުއްވާ ދެ ހެލިކޮޕްޓަރުގެ ތެރެއިން އައްޑޫގައި ބޭނުންކުރާ އުޅަނދު އޮޕަރޭޓްކުރާ ސިފައިން ފުރިކަން ޔަގީންކޮށްދެއްވި ނަމަވެސް، އެއީ ކިހާ އަދަދެއްގެ ބައެއް ކަމެއް އޭނާ ހާމައެއް ނުކުރައްވައެވެ. އަދި އިންޑިއާ ސިފައިން ފުރި ތާރީޚުތަކުގެ ތަފްސީލެއްވެސް ނުދެއްވައެވެ.
ހެލިކޮޕްޓަރުގެ އޮޕަރޭޝަންތަކާ ހަވާލުވުމަށް އިންޑިއާއިން ފޮނުވި މަދަނީ މީހުން ރާއްޖެ އައީ ފާއިތުވި ފެބްރުއަަރީ މަހުގެ ފަހުކޮޅުއެވެ. އޭރު 26 މީހުން ރާއްޖެ އައެވެ. އިންޑިއާ ސިފައިން އަނބުރާ ފޮނުވާލުމާމެދު ދެ ގައުމުގެ ދެމެދުގައި މަޝްވަރާކޮށްގެން ނިންމީ މަދަނީ މީހުން އުޅަނދުތައް ބެލެހެއްޓުމަށެވެ.
