ޔާމީން ހުޅުމާލޭގައި އޮތް ކެމްޕޭނު ޙަރަކާތެއްގައި ބައިވެރިވެވަޑައިގަތް މައްސަލަ ބަލަނީ
ޔާމީންގެ ބަންދަށް ކަރެކްޝަންސް އިން ވަނީ ލުއިތަކެއް ދީފައި
ޔާމީނު ހުޅުމާލެ ވަޑައިގެން ކެމްޕެއިން ހަރަކާތެއްގައި ބައިވެރިވެވަޑައިގަންނަވަނީ
ޖަލުތަކުގެ ޕެރޯލް ޤާނޫނާ ޚިލާފުވަމުންގެންދަވާތީ ކުރީގެ ރައީސް އަބްދުﷲ ޔާމީނަށް މޯލްޑިވްސް ކަރެކްޝަނަލް ސަރވިސް އިން އިންޒާރު ދީފައިވަނިކޮށް ޔާމީނު އަނެއްކާވެސް ކެމްޕޭނު ޙަރަކާތެއްގައި ބައިވެރިވެވަޑައިގެންފިއެވެ.
ޖަލުތަކާއި ޕެރޯލް ޤާނޫނުގެ ދަށުން ހުކުމް ތަންފީޒު ކުރަމުންގެންދާ މީހަކަށް ސިޔާސީ ޕާޓީތަކާއި ޖަމިއްޔާތަކަށް އާންމު މެންބަރެއްގެ ހައިސިއްޔަތުން ނިސްބަތްވުން ފިޔަވައި، އެފަދަ ތަނެއްގެ މަސްއޫލުވެރި ފަރާތެއްގެ ގޮތުގައި ހުރުމާއި، އެ ތަންތަނުން ހިންގާ ހަރަކާތްތަކުގައި ބައިވެރިނުވެވޭނެއެވެ.
އެހެންނަމަވެސް ޔާމީންގެ ބަންދަށް ކަރެކްޝަންސް އިން ދިން ލުއިތަކާއެކު އެމަނިކުފާނު ގެންދަވަނީ ސިޔާސީ އެއްވުންތަކުގައި ބައިވެރިވެވަޑައިގެން، ސިޔާސީ ހަރަކާތްތައް ހިންގަވަމުންނެވެ.
އެއާއެކު ކަރެކްޝަންސް އިން ވަނީ ޔާމީނާއެކު ވެފައިވާ އިގުރާރާ ޚިލާފަށް އަމަލުތައް ބަހައްޓަވަމުންގެންދަވާކަން ފާހަގަކުރެވޭކަން ބަޔާންކޮށް، އިގުރާރާ އެއްގޮތަށް އަމަލު ކުރެއްވުމަށް އެމަނިކުފާނަށް އިންޒާރު ދީފައެވެ.
އަދި އެކަން ތަކުރާރު ކުރައްވާނަމަ އިގުރާރު ބާތިލު ކުރެވޭނެ ކަމަށް ވެސް ޔާމީނަށް އަންގާފައިވާނެ ކަމަށް އެ މުއައްސަސާއިން މީގެ ކުރިން ވަނީ ބުނެފައެވެ.
އޭގެ ފަހުން ޔާމީނު ފެންނަމުން ދިޔައީ ޕީއެންއެފްގެ ޖަލްސާތަކުގައި އޯޑިއަންސްގައި އިންނަވައި، އާންމު މީހެއްގެ ހައިސިއްޔަތުން ސުވާލު ކުރައްވާ ފަރާތެއްގެ ގޮތުގައެވެ.
އެހެންނަމަވެސް ޔާމީނު މިވަނީ ހުޅުމާލެ ވަޑައިގެން ކެމްޕެއިން ހަރަކާތެއްގައި ބައިވެރިވެވަޑައިގެންފައެވެ. އެއީ މަޖިލީހަށް ޔާމީނުގެ ތާއީދާއެކު ވާދަކުރާ ކެންޑިޑޭޓެއްގެ ކެމްޕޭނު ޙަރަކާތެކެވެ.
އެކަމާ ގުޅޭގޮތުން ސުވާލު ކުރުމުން ކަރެކްޝަންސްއިން ވަނީ އެ މައްސަލަ ބަލަމުންދާކަމަށް ބުނެފައެވެ. ނަމަވެސް އިތުރު ތަފްސީލެއް ކަރެކްޝަންސްއިން ދީފައެއް ނުވެއެވެ.
