ރޯދަ މަހާއި ދިމާކޮށް ސަރުކާރުން ކޮންމެ ގޭބިސީއަކަށް ހަދިޔާކުރާ ކާޑުގެ ބާވަތްތައް ދޫކުރަން ފަށައިފިއެވެ.

ހޮނިހިރު ދުވަހު މާލެސިޓީ ކައުންސިލުން ބުނީ ހަދިޔާ ދޫކުރަން ހަމަޖެހިފައިވަނީ ދިވެހިންނަށް އެކަނި ކަމަށެވެ. އެގޮތުން ހަދިޔާ ދޫކުރާނީ ކަރަންޓް މީޓަރުގެ ނަންބަރަށް ބެލުމަށްފަހުއެވެ. ހަނޑޫ އަދި ފުށް ބަލާ އަންނަ ފަރާތުގެ ދިވެހި ރައްޔިތެއްކަން އަންގައިދޭ އައިޑީ ކާޑު ނުވަތަ ލައިސަންސް ނުވަތަ ޕާސްޕޯޓް ގެނައުމަށް ކައުންސިލުން އެދިފައިވެއެވެ.

މާލެ ސަރަހައްދުގައި ތަކެތި ދޫކުރާނީ މާލޭސިޓީ ކައިންސިލުން ކަމަށްވާއިރު، އަތޮޅުތެރޭގެ ރަށްރަށުގައި ތަކެތި ދޫކުރަނީ އެރަށެއްގެ ކައުންސިލުންނެވެ.

މާލެ ސަރަހައްދުގައި ތަކެތި ދޫކުރަން ފަށާނީ 09 މާރިޗު 2024ން ފެށިގެން 16 މާރިޗް 2024 (ހަތްދުވަހުގެ ނިޔަލަށެވެ). މުލަ ރޯދަ ދުވަސް އަދި ހުކުރު ދުވަހު ތަކެތި ބެހުމުގެ މަސައްކަތް މާލެ ސިޓީ ކައުންސިލުން ކުރިޔަށް ނުގެންދާނެއެވެ.

ތަކެތި ދޫކުރަން ނިންމާފައިވާ ގަޑިތަކަކަކީ ހެނދުނު 10:00ން ހަވީރު 16:00 އަށެވެ. އަދި ރޭގަނޑު 20:30ން 23:00 އަށެވެ. ރޯދަމަހު ތަކެތި ދޫކުރުމަށް ނިންމާފައިވާ ގަޑިތަކަކީ ހެނދުނު 9:30ން މެނދުރު 13:00 އަށެވެ. އަދި ރޭގަނޑު 21:00ން 23:30 އަށެވެ.

މާލެ ސިޓީ ކައުންސިލުން ބުނީ މާލޭގެ ހަ ސަރަހައްދަކުން ކާޑުގެ ބާވަތްތައް ދޫކުރުމުގެ މަސައްކަތް ކުރާނެ ކަމަށެވެ.

އެއީ ގަލޮޅު ދަނޑު، އާއްމު ޚިދުމަތްތަކާއި ބެހޭބައި (މާލެސިޓީ ކައުންސިލް)، ސޯޝަލް ސެންޓަރު، ވިލިމާލެއިން ބިއްރި މިސްކިތް ހޯލު، ހުޅުމާލެ ފޭސް-1 އިން އުމަރު ޒާހިރު ބިލްޑިންގ އަދި ހުޅުމާލެ ފޭސް-2 އިން ހިޔާ ފްލެޓް ޓަވަރު 10 ޔޫތް ސެންޓަރެވެ.

މި ރޯދަ މަހު ކޮންމެ ގެއަކަށް ސަރުކާރުގެ ފަރާތުން 10 ކިލޯ ހަނޑޫ އަދި 10 ކިލޯ ފުށް ބަސްތާއެއް ހަދިޔާކުރާނެ ކަމަށް ރައީސް ޑރ.މުހައްމަދު މުއިއްޒު ވިދާޅުވީ ޗައިނާއަށް ކުރެއްވި ރަސްމީ ދަތުރުފުޅަށް ފަހު ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުންނެވެ.