ފަލަސްތީނުގެ ޣައްޒާގެ އެކި ސަރަހައްދުތަކުގައި އިސްރާއީލުން ދިން ވަރުގަދަ ވައިގެ ހަމަލާތަކުގައި ފަލަސްތީނުގެ އާންމުންގެ 12 މީހަކު ޝަހީދުވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި އެތައް ބަޔަކު ޒަހަމްވެފައިވާ ކަމަށް އެ ގައުމުގެ ލޯކަލް އަދި މެޑިކަލް ރިޕޯޓްތައް ބުނެފިއެވެ.

ފަލަސްތީނުގެ ވާފާ ނިއުސްއެޖެންސީން ރިޕޯޓްކޮށްފައިވާ ގޮތުގައި ޣައްޒާގެ ދެކުނުގައި އޮންނަ ރަފާހުގައި އިސްރާއީލުގެ ހަނގުރާމަމަތީ މަތިންދާބޯޓުތަކުން އަބޫ ސަލީމިއްޔާ އާއިލާއަށް ނިސްބަތްވާ ދެ ގެއަކަށް އަމާޒުކޮށް ހަމަލާދީ އާންމުންގެ ފަސް މީހަކު ވަނީ ޝަހީދުކޮށްލައިފައެވެ. މީގެ އިތުރުން މި ހަމަލާގައި އިތުރު 22 މީހުން ޒަޚަމްވެފައިވާއިރު، އޭގެ ތެރޭގައި ގިނައީ އަންހެނުންނާއި ކުޑަކުދިން ކަމަށާއި އެ އެންމެން ވެސް އެ ސިޓީގެ އަބޫ ޔޫސުފް އަލް ނައްޖާރު ހޮސްޕިޓަލަށް ގެންގޮސްފައެވެ.

ހަމައެއާއެކު އިސްރާއީލުގެ އާޓިލަރީއިން ވަނީ ރަފާ ސިޓީގެ މަވާސީ ސަރަހައްދުގައި ގެދޮރު ގެއްލިފައިވާ އާއިލާތައް ދިރިއުޅޭ ޓެންޓުތަކަށްވެސް ހަމަލާދީފައެވެ. އެހަމަލާގައި ނުވަ މީހަކަށް އަނިޔާވެފައިވާއިރު، އެމީހުންވަނީ ބޭސްފަރުވާއަށް ކުވައިތު ހޮސްޕިޓަލަށް ގެންގޮސްފައެވެ.

ޣައްޒާގެ މެދުތެރޭގައި އިސްރާއީލުގެ ޓޭންކުތަކުން ދީރް އަލް ބަލާހްގައި ހުންނަ އަލް އަޤްޞާ ޝަހީދުންގެ ހޮސްޕިޓަލްގެ ކައިރީގައި ދިން ބޮމުގެ ހަމަލާތަކުގައި ހަތް މީހަކު ޒަޚަމްވެފައިވެއެވެ. ޒަހަމްވި މީހުން ވަގުތުން ވަނީ އެ ހޮސްޕިޓަލަށް ގެންގޮސްފައެވެ.

ޣައްޒާ ސިޓީގެ އަލް ޒައިތޫން އަވަށުގެ ދެ ގެއަކާއި ތަލް އަލް ހައްވާ އަވަށުގެ ގެއަކާއި އަލްސަބްރާ އަވަށުގެ އެހެން ގެއަކަށް ވެސް އިސްރާއީލުގެ ހަނގުރާމަމަތީ މަތިންދާބޯޓުތަކުން ބޮން އެޅުމުގެ ސަބަބުން ފަލަސްތީނުގެ ހަތަރު މީހަކު ޝަހީދުވެ، އިތުރު 15 މީހަކު ވަނީ ޒަހަމްކޮށްލައިފައެވެ.

އަދި ޣައްޒާގެ އުތުރު ސަރަޙައްދުގެ ޖަބާލިއާގައި އިސްރާއީލުން ރެފިއުޖީ ކޭމްޕްގެ ދެ ގެއަކަށް އަމާޒުކޮށް ދިން ވައިގެ ޙަމަލާތަކުގެ ސަބަބުން އެކަކު މަރުވެ، އިތުރު ތިން މީހަކު ވަނީ ޒަޚަމްވެފައެވެ.

އިސްރާއީލުން ޣައްޒާއަށް ދެމުންދާ ޙަމަލާތަކުގެ ސަބަބުން މިހާތަނަށް 30،717 މީހުން ޝަހީދުވެފައިވާއިރު، އޭގެ ތެރޭގައި ގިނައީ ކުޑަކުދިންނާއި އަންހެނުންކަމަށާއި، އިތުރު 72،156 މީހުން ޒަޚަމްވެފައިވާކަމަށް އެޤައުމުގެ ޞިއްޙަތާބެހޭ ވުޒާރާއިން ބުނެއެވެ.

ވެއްޓިފައިވަ އިމާރާތްތަކުގެ ބައިތަކުގެ ދަށުގައި އެތައްބަޔަކު ތަށިވެފައިވުމުގެ ސަބަބުން މިއަދު އަދިވެސް މިއަށްވުރެ އިތުވާނެކަމަށް އެ ވުޒާރާއިން ލަފާކުރެއެވެ.