ފަރެސްމާތޮޑާގެ އެމްޑީޕީގެ ކެންޑިޑޭޓް އަހުމަދު ޒައީމްގެ ގަޔަށް ކަޅުތެޔޮ ޖެހި މައްސަލައެއް ފެންމަތިވެއްޖެއެވެ.
އޭނާގެ ގަޔަށް ކަޅުތެޔޮ ޖަހާފައިވާ މަންޒަރު ފެންނަ ފޮޓޯއާއި ވީޑިއޯ ވަނީ މީސްމީޑިއާގައި ދައުރުވެފައެވެ. މިކަމާ ގުޅިގެން އޭނާއަށް ގުޅުމަށް ކުރި މަސައްކަތް ވަނީ ކާމިޔާބުވާގޮތް ނުވެފައެވެ. އަދި އެމްޑީޕީގެ މަޖިލިސް އިންތިޚާބުގެ ކެމްޕެއިން ތަރުޖަމާނު އަދި ކެނދިކުޅުދޫ ދާއިރާގެ މެމްބަރު އަހުމަދު އީސާވެސް ވަނީ އަދި އެ ހާދިސާ ހިނގި ގޮތް މުޅިން ސާފުވެވަޑައިގެންފައި ނުވާކަމަށް "ރާއްޖެ އެމްވީ"އަށް މައުލޫމާތުދެއްވަމުން ވިދާޅުވެފައެވެ. އީސަ ވިދާޅުވީ މިހާތަނަށް ލިބިވަޑައިގެންނެވި މައުލޫމާތުތަކަށް ބަލާއިރު މިހާދިސާ ހިނގާފައި ވަނީ ބުރާސްފަތި ދުވަހުގެ ހަވީރު ކަމަށާއި، އެ ހާދިސާ ހިނގީ ދާއިރާގެ ބަހުސް އަށް ދާން ދިޔަ މަގުމަތީގައި ކަމަށް އެނގިފައިވާ ކަމަށެވެ. އެހެންނަމަވެސް ހާދިސާ ހިނގި ގޮތް ސާފުކޮށް ދަންނަވަން އެނގޭނީ އެ ކެނޑިޑޭޓާއި ގުޅުމުން ކަމަށް އޭނާ ވިދާޅުވިއެވެ.
މި ހާދިސާގެ މައުލޫމާތު ހޯދުމަށް ރާއްޖެ އެމްވީން ވަނީ ފުލުހުންނަށް ގުޅާފައެވެ. ނަމަވެސް ފޯނަށް ޖަވާބު ނުދެއްވާތީ މި ހާދިސާ ފުލުހުންނަށް ރިޕޯޓްކޮށްފައިވާކަން ނުވަތަ ނޫންކަން ސާފުވެފައެއް ނުވެއެވެ. އިދިކޮޅު ކެނޑިޑޭޓުންނަށް ބިރުދެއްކުމާއި، އެހެނިހެން ގޮތްގޮތުން ސަރުކާރުން ކުރިއަށް އޮތް މަޖިލުިސް އިންތިޚާބަށް ނުފޫޒު ފޯރުވާކަމަށް ކެނޑިޑޭޓުންނާއި އާއްމު މެމްބަރުން ދަނީ ތުހުމަތުކުރަމުންނެވެ.
