އެމްޓީސީސީއާއި ފެނަކަ ފަދަ ކުންފުނިތަކުން އެއްވެސް އުސޫލެއް ނެތި ދަނީ ޕްރޮމޯޝަންތައް ދެމުން: އެމްޑީޕީ
7 މާރިޗު 2024 | ބުރާސްފަތި 09:57ރައްޔިތުންގެ ފައިސާ އިންތިޚާބުގެ ބޭނުމަށް ދަނީ އިސްރާފު ކުރަމުން
ކެނދިކުޅުދޫ ދާއިރާގެ މެންބަރު އަޙުމަދު ޢީސަ
އެމްޓީސީސީއާއި ފެނަކަ ފަދަ ކުންފުނިތަކުން އެއްވެސް އުސޫލެއް ހަމައެއް ނެތި ޕްރޮމޯޝަންތައް ދެމުންދާ ކަމަށް އެމްޑީޕީން ބުނެފިއެވެ.
ބުރާސްފަތި ދުވަހު އެމްޑީޕީން ބޭއްވި ނޫސްވެރިންގެ ބައްދަލުވުމުގައި ކެނދިކުޅުދޫ ދާއިރާގެ ރައްޔިތުންގެ މަޖިލީހުގެ މެންބަރު އަހުމަދު އީސަ ވިދާޅުވީ، އެމްޓީސީސީއާއި ފެނަކަ ފަދަ ކުންފުނިތަކުން އެއްވެސް އުސޫލެއް ހަމައެއް ނެތި ޕްރޮމޯޝަން ދިނުމާއި، އިއުލާނު ކުރުމެއް ނެތި ވަޒީފާއަށް ނެގުން ފަދަ ކަންކަން ހިނގަމުންދާ ކަމަށެވެ. ރައްޔިތުންގެ ފައިސާ އިންތިޚާބުގެ ބޭނުމަށް އިސްރާފު ކުރަމުންދާކަން ފާހަގަ ކުރައްވައި މެންބަރު އީސަ ވިދާޅުވީ، އެކަންކަން އެމްޑީޕީން ކުށްވެރިކުރާ ކަމަށެވެ.
ވަކިން ޚާއްސަކޮށް، ފެނަކަ އޮތީ ދަރަނިވެރި ވެފައި ކަމަށް ބުނެ، އުސޫލެއް ހަމައެއް ނެތި ޕްރޮމޯޝަންތައް ދެމުންދާތީ އެކަން އީސަ ވަނީ ފާހަގަ ކުރައްވާފައެވެ.
މެންބަރު އީސަ ވިދާޅުވީ މި ކަންކަން އޭސީސީންވެސް ބަލަންޖެހޭ ކަމަށާއި، އޭސީސީން މައްސަލަތައް ބެލުމަށްފަހު އަޅަންޖެހޭ ފިޔަވަޅުތައް އަޅަންޖެހޭ ކަމަށެވެ. އަދި އަބަދުވެސް ފެންނަމުންދަނީ ރައްޔިތުންނަށް އޮޅުވާލުމާއި، އައު ދޮގުތަކެއް ހެދުމަށް މަސައްކަތް ކުރަމުންދާ މަންޒަރު ކަމަށް މެންބަރު އީސަ ވިދާޅުވިއެވެ.
