ބަނޑިދޫއަށް ދިމާވެފައިވާ މައްސަލަތައް ހައްލުކޮށްދިނުމަށް ރައީސްގެ އަރިހުން އެދިއްޖެ
އިންޖީނުގެ މިހާރު ހުރިތަނުން އެހެން ތަނަކަށް ބަދަލުކުރުމަށް އެދިފައިވޭ
ބަނޑިދޫ ކައުންސިލާއެކު ރައީސް ބޭއްވެވި ބައްދަލުކުރެއްވުން
ދ. ބަނޑިދޫ އަށް ދިމާވެފައިވާ މައްސަލަތައް ހައްލުކޮށްދިނުމަށް އެ ރަށުގެ ކައުންސިލުން ރައީސުލްޖުމްހޫރިއްޔާގެ އަރިހުގައި އެދެފިއެވެ.
ކައުންސިލުން ރައީސްގެ އަރިހުގައި މިފަދައިން އެދިފައިވަނީ، ރަސްމީ ދަތުރުފުޅުގެ ނަމުގައި އެމަނިކުފާނު ރަށްރަށަށް ކުރައްވަމުން ގެންދަވާ ކެމްޕޭން ދަތުރުފުޅުގެ ތެރެއިން ބުދަ ދުވަހު ބަނޑިދޫ ކައުންސިލާއެކު ބޭއްވެވި ބައްދަލުކުރެއްވުމުގައެވެ.
މި ބައްދަލުކުރެއްވުމުގައި ކައުންސިލުން ފާހަގަކުރި ކަންކަމުގެ ތެރޭގައި ރަށުގެ ގިރާ ސަރަހައްދު ހިމާޔަތްކުރުމަށް ބޭނުންވާކަމަށާއި އައިސް ޕްލާންޓެއްގެ ޚިދުމަތް ރައްޔިތުން ބޭނުންވާކަމަށާއި ބަނޑިދޫގައި މަލްޓިޕާޕަސް ހޯލެއް ޤާއިމުކުރުމަށް ބޭނުންވާކަމަށާއި ކައުންސިލް އިދާރާގެ އައު އިމާރާތެއް ޤާއިމުކުރުމަށް ބޭނުންވާކަމުގައި ފާހަގަކުރިއެވެ.
އަދި އިންޖީނުގެ މިހާރު ހުރިތަނުން އެހެން ތަނަކަށް ބަދަލުކުރުމަށް ބޭނުންވާކަމަށާއި ކުނި ނައްތާލުމުގެ ހަރުދަނާ ނިޒާމެއް ޤާއިމުކުރުމަށް ބޭނުންވާކަމުގައި ކައުންސިލުން ފާހަގަކުރިއެވެ.
މި ބައްދަލުކުރެއްވުމުގައި ބަނޑިދޫގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީން ވެސް ވަނީ ރަށުގައި ކުނި ނައްތާލުމުގެ ހަރުދަނާ ނިޒާމެއް ނެތުމުން ކުރިމަތިވާ ގޮންޖެހުންތައް ހިއްސާކޮށްފައެވެ. އަދި އަންހެނުންނަށް ކުޅިވަރުގެ ދާއިރާއިން ކަންކަން ފަހިކޮށްދެއްވުމަށް އެ ކޮމިޓީން އެދުނެވެ.
މި ބައްދަލުކުރެއްވުމުގައި ރައީސުލްޖުމްހޫރިއްޔާ ވަނީ ކައުންސިލުން ފާހަގަކުރި ކަންކަމަށް ވަކިވަކީން އަލިއަޅުވާލައްވައި އެކަންކަމަށް ހުރި ހައްލުތަކާގުޅޭގޮތުން މަޝްވަރާކުރައްވާފައެވެ. އަދި އެމަނިކުފާނު ވަނީ މި ބައްދަލުކުރެއްވުމުގައި ބައިވެރިވެވަޑައިގެންނެވި ވަޒީރުން މެދުވެރިކުރައްވައި ކައުންސިލުން ފާހަގަކުރި ކަންކަމުގައި ސަރުކާރުން ކުރަމުންގެންދާ މަސައްކަތްތަކުގެ އެންމެ ފަހުގެ މަޢުލޫމާތު ހިއްސާކުރައްވާފައެވެ.
