ކޯރަމް ހަމަނުވެގެން މަޖިލީހުގެ ޖަލްސާ ކުރިއަށް ނުގެންގޮސް ނިންމާލައިފި
ޖަލްސާ ނިންމާނީ ދެ ފަހަރަށް ކޯރަމް ހަމަވޭތޯ ބެލުމަށް ފަހު
ރިޔާސީ ބަޔާން އިއްވުމަށް ބޭއްވި ޖަލްސާގެ ތެރެއިން
ކޯރަމް ހަމަނުވެގެން މަޖިލީހުގެ ޖަލްސާ ކުރިއަށް ނުގެންގޮސް ނިންމާލައިފިއެވެ.
މަޖިލީހުގެ ރައީސާއި ނައިބު ރައީސް މާލޭގައި ނޫޅުއްވާތީ އަންގާރަ ދުވަހުގެ ޖަލްސާގެ ރިޔާސަތު ބެލެހެއްޓެވީ ހަނިމާދޫ ދާއިރާގެ މެންބަރު އަބްދުލް ޣަފޫރު މޫސާއެވެ. އޭނާ ވަނީ ދެ ފަހަރެއްގެ މަތިން މަޖިލީހުގެ ކޯރަމް ހަމަވޭތޯ މަސައްކަތް ކުރައްވާފައެވެ.
09:00 ގައި ޖަލްސާ ފެށި އިރު ޖަލްސާ އަށް ހާޒިރުވެ ތިބީ އެންމެ 11 މެންބަރުންނެވެ. ދެވަނަ ފަހަރު ޖަލްސާ ފެށުމަށް މެންބަރުން ހަމަވޭތޯ 9:30އާ ހަމައަށް ބަލާފައިވެއެވެ. އެއަށް ފަހު މެންބަރު ޣަފޫރު ވަނީ އަންގާރަ ދުވަހުގެ ޖަލްސާއަށް މަޖިލީހުގެ ގަވާއިދު ބުނާ އަދަދަށް މެންބަރުން ހަމަނުވާތީ ނުބޭއްވޭނެ ކަމަށް އިޢުލާންކުރައްވާފައެވެ.
އަދި ދެން މަޖިލީހުގެ ޖަލްސާއެއް އޮންނާނެ ތާރީހެއް ފަހުން އިއުލާނުކުރައްވާނެ ކަމަށް އޭނާ ވިދާޅުވިއެވެ.
މަޖިލީހުގެ އަންގާރަ ދުވަހު ޖަލްސާއަށް އެޖެންޑާ ކޮށްފައިވާ ކަންކަމުގެ ތެރޭގައި ދެ ބިލެއްގެ ފުރަތަމަ ކިޔުން އިއްވުން ހިމެނެއެވެ. އެއީ ދަތުރު ރާވައި ހިންގުމުގެ ޚިދުމަތް ދިނުމާބެހޭ ބިލާއި ރިއަލް އެސްޓޭޓް ވިޔަފާރީގެ ބިލުގެ ފުރަތަމަ ކިޔުމެވެ. މީގެ އިތުރުން ރާއްޖޭގެ ހާރިޖީ ސިޔާސަތު ހަރުދަނާ ކުރުމަށް ގޮވާލައި ގަލޮޅު އުތުރު ދާއިރާގެ މެންބަރު އީވާ އަބްދުﷲ ހުޅާހަޅާފަވާ ގަރާރުގެ މަސައްކަތް ވެސް އެޖެންޑާކޮށްފައި އޮތެވެ.
