މިއިން ޒަމާނެއްގައި އިންވެސްޓް ނުކުރާ ވަރަށް 2019 ވަނަ އަހަރުން ފެށިގެން ކޯޓުތަކަށް ދަނީ އިންވެސްޓް ކުރަމުން: ޙިސާން

ޝަރުޢީ ދާއިރާގެ ނިޒާމު ހަރުދަނާ ކުރުމަށް ގިނަ މަސައްކަތްތައް ކުރަމުންދާ ކަމަށާއި، މިއިން ޒަމާނެއްގައި ކޯޓުތަކަށް ވަސީލަތްތައް އިތުރުކުރުމަށް އިންވެސްޓް ނުކުރެވޭ ވަރަށް 2019 ވަނަ އަހަރުން ފެށިގެން އިންވެސްޓް ކުރަމުންދާ ކަމަށް ޖުޑީޝަލް ސަރވިސް ކޮމިޝަންގެ ރައީސް ޙިސާން ޙުސައިން ވިދާޅުވެއްޖެއެވެ.

ޝަރީއަތުގައި ދެކެވޭ ވާހަކަތައް އޮޓޯއިން ލިޔެވޭ ސްޕީޗް ޓު ޓެކްސްޓު ސްފޮޓްވެއަރ "ކޭލި" އިފްތިތާހުކުރުމަށް ބޭއްވި ރަސްމިއްޔާތުގައި ޙިސާން ވިދާޅުވީ ޒަމާނާއެކު ޝަރުޢީ ދާއިރާއަކީ ވެސް ފަންނިއްޔާތުގެ ވަސީލަތްތަކަށް އަހުލުވެރި ތަނަކަށް ހެދުމަށް ގިނަ މަސައްކަތްތަކެއް ކުރަމުންދާ ކަމަށާއި، މިއަދާ ހަމައަށް އާދެވުނުއިރު ޝަރުޢީ ދާއިރާ ފަންނިއްޔާތާ ގުޅުވާލުމަށް ތަފާތު އެކިކަހަލަ މަސައްކަތްތައް ކުރެވިފައިވާކަމަށެވެ.

އެގޮތުން އޮންލައިންކޮށް ޝަރީޢަތްތައް ހިންގޭނެ މަގު މިހާރު ހުރިހާ ކޯޓުތަކެއްގައި ގާއިމުކުރެވިފައި ވާކަމަށާއި، ޒަމާނީ ވަސީލަތްތައް ކޯޓުތަކަށް ހޯދުމަށް މަސައްކަތްތައް ހުއްޓުމެއްނެތި ކުރަމުންދާ ކަމަށް ޙިސާން ވިދާޅުވިއެވެ.

ޙިސާން ވިދާޅުވީ އަމާޒަކީ ޝަރުއީ ދާއިރާއިން، ޒަމާނާއެކު އަންނަ ހެޔޮ ބަދަލުތަކާއެކު މަސައްކަތް އަވަސް ކުރަމުން ދިއުން ކަމަށާއި، ފަންނިއްޔާތުގެ ވަސީލަތްތަކާއެކު، ޒަމާނާއެކު ކުރިއަރާފައިވާ އަވަސް ޚިދުމަތްތަކެއް ފޯރުކޮށްދޭ ދާއިރާއަކަށް މި ދާއިރާ ބަދަލުވެގެން ދިއުން ކަމަށެވެ. އަދި މިއިން ޒަމާނެއްގައި ކޯޓުތަކަށް ވަސީލަތްތައް އިތުރުކުރުމަށް އިންވެސްޓް ނުކުރެވޭ ވަރަށް 2019 ވަނަ އަހަރުން ފެށިގެން ކޯޓުތަކަށް އިންވެސްޓްކޮށްފައި ވާކަމަށް ޙިސާން ވިދާޅުވިއެވެ.

ޝަރީއަތުގައި ދައްކާ ވާހަކަ ޓައިޕްކުރުމަށް ގިނަ ވަގުތު ހޭދަވާ މައްސަލަ ހައްލު ކުރުމަށް ކުރި މަސައްކަތްތަކަށް އިޝާރާތް ކުރައްވައި ޙިސާން ވިދާޅުވީ، މި މައްސަލައަށް ދާއިމީ ހައްލެއް ހޯދޭނީ ބަދަލުވަމުން އަންނަ މި ދުނިޔެއަށް ފައިތިލަ ހަމަކޮށް ޓެކްނޮލޮޖީ ޚިޔާރު ކޮށްގެން ކަމަށް ވާތީ، އެކަމަށް މަސައްކަތް ކުރިކަމަށެވެ. އެގޮތުން އިފްތިތާޙު ކުރެވުނު ކޭލި ސޮޕްޓްވެއަރއެކު ވަރަށް ބޮޑަށް ވަގުތުތައް ސަލާމަތްކުރެވި، މަސައްކަތުގެ ސްޕީޑް އަވަސްވާނެ ކަަމަށް ހިސާން ވިދާޅުވިއެވެ.