ރައީސް ޞޯލިޙް، އިލެކްޝަންސް ކޮމިޝަނަށް: ސަރުކާރުގެ ނުފޫޒުގައި ނުޖެހި، ރައްޔިތުންނަށް ފަސޭހައިން ވޯޓު ލެވޭނެ މަގެއް ފަހިކޮށްދެއްވާ
1 މާރިޗު 2024 | ހުކުރު 18:21އަދި ވިދާޅުވީ މަޖިލިސް އިންތިހާބު ރޯދައިގެ ފަހުން ބޭއްވަން ނިންމި ނަމަވެސް، އަދިވެސް ސަރުކާރުން ނުފޫޒު ފޯރުވަމުން ދާ ކަމަށް
ރައީސް އިބްރާހިމް މުޙައްމަދު ޞޯލިހް، ޖަލްސާގައި ވާހަކަ ދައްކަވަނީ
ސަރުކާރުގެ ނުފޫޒުގައި ނުޖެހި، ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި ރައްޔިތުންނަށް ފަސޭހައިން ވޯޓު ލެވޭނެ މަގުފަހިކޮށްދެއްވުމަށް ކުރީގެ ރައީސް އިބްރާހިމް މުޙައްމަދު ޞޯލިޙް، އިލެކްޝަންސް ކޮމިޝަނުގެ ކިބައިން އެދިވަޑައިގަންނަވައިފިއެވެ.
ހުކުރު ދުވަހުގެ ރޭ، ދަނޑިކޮށި ޖަގަހައިގައި ބޭއްވި ޖަލްސާގައި ވާހަކަ ދައްކަވަމުން ކުރީގެ ރައީސް ވިދާޅުވީ، މި ސަރުކާރުން ގެންދިޔައީ މަޖިލިސް އިންތިހާބަށް ނުފޫޒު ފޯރުވަމުން ކަމަށާއި، އެގޮތުން އެންމެ ފުރަތަމަ ރޯދަ މަހު އިންތިހާބު ބާއްވަން ނިންމި ކަމަށެވެ. އަދި އެކަމަކީ އެތައް ބައެއްގެ ވޯޓުގެ ހައްގު ނިގުޅައި ގަތުމަށް ފެއްޓެވި ކަމެއްގެ ގޮތުގައި ފާހަގަ ކުރައްވަމުން ރައީސް ވިދާޅުވީ، ރާއްޖޭގެ އެހެން ހުރިހާ ސިޔާސީ ޕާޓީތަކުން ވެސް ރޯދަ މަހުގައި އިންތިހާބު ނުބޭއްވުމަށް އެދުނު ނަމަވެސް، އެކަމަށް ސަރުކާރުން ބުނަމުން ދިޔައީ ނޫނެކޭ ކަމަށެވެ.
އަދި ރޯދަ މަހު އިންތިހާބު ބޭއްވި އިރު، އެ ދުވަހަކީ ވެސް ރަސްމީ ބަންދު ނޫން ދުވަހެއްގެ ގޮތުގައި ކަނޑެޅިކަން ރައީސް ޞޯލިޙް ފާހަގަ ކުރެއްވިއެވެ.
މަޖިލީހުގައި ވެސް 25 އަހަރު މެންބަރެއްގެ ގޮތުގައި ހޭދަ ކުރައްވައި، ރައީސްކަން ކުރެއްވި ޞޯލިޙް ވިދާޅުވީ، މި ސަރުކާރުން މަޖިލީހަށް ގޮންޖެހުމުގެ ގޮތުން ގާނޫނުތައް ފާސްކޮށް ފޮނުވީމާ، އެ ގާނޫނުތައް ވެސް އަނބުރާ ފޮނުވާލި ކަމަށެވެ. އެހެން ނަމަވެސް މިހާރުގެ އެޓާނީ ޖެނެރަލް އަޙްމަދު އުޝާމް، އިންތިހާބާ ބެހޭ ގާނޫނު ފާސްކުރުމަށް ލަފާދެއްވީ ކޮންމެވެސް ރަނގަޅު ވިސްނުމެއް އައިސްގެން ކަން ރައީސް ސޯލިހް ފާހަގަ ކުރެއްވިއެވެ.
އެ ބިލު ތަސްދީގުކުރެއްވި ނަމަވެސް، އަދި ވެސް އިލެކްޝަންސް ކޮމިޝަނަށް ބާރު ފޯރުވައި، އިންތިހާބު ސަރުކާރު ރަސްމީ ބަންދު ނޫން ދުވަހެއްގެ ގޮތުގައި ހެއްދެވިކަމަށް ވިދާޅުވަމުން ޞޯލިޙް އީސީގެ ކިބައިން އެދިވަޑައިގެންނެވީ ސަރުކާރުގެ ނުފޫޒުގައި ޖެހިވަޑައިނުގަތުމަށެވެ. އެގޮތުން އީސީއަކީ މިނިވަން މުއައްސަސާއެއްކަން ރައީސް ޞޯލިޙް ފާހަގަ ކުރެއްވިއެވެ.
ރައީސް ޞޯލިޙް އެފަދައިން ވިދާޅުވިއިރު، އިންތިހާބާ ބެހޭ ގާނޫނަށް ގެނައި އިސްލާހު ތަސްދީގުކުރެއްވުމަށް ރައީސް މުއިއްޒުއަށް ފޮނުއްވުމުން، ފުރަތަމަ 14 ދުވަސް ހަމަ ކުރެއްވުމަށްފަހު އަނބުރައި މަޖިލީހަށް ފޮނުއްވިއެވެ. އެހެން ނަމަވެސް ހަމަ އެ ދުވަހު، އެ ބިލަށް އިތުރު ބަދަލެއް ނުގެނެސް ފާސްކޮށް މަޖިލީހުން ވަނީ ރައީސަށް ދެވަނަ ފަހަރަށް ފޮނުއްވާފައެވެ. ރައީސް އެ ބިލު ތަސްދީގު ކުރެއްވީ އޭގެ ގާތްގަޑަކަށް 24 ގަޑިއިރު ފަހުން، އޭޖީގެ ލަފާގެ މަތިންނެވެ.
