ރައްޔިތުންގެ މަޖިލިސް އިންތިޚާބު ފަސްކުރުމަށް ފާސްކުރި ބިލު ރައީސް ތަސްދީގުކުރެއްވީ ގޮތްހުސްވެގެން: ރޮޒައިނާ
1 މާރިޗު 2024 | ހުކުރު 06:16އިންތިހާބު ފަސްކުރުމުން އާއްމު ރައްޔިތުންނަށް ލިބިގެންދިޔައީ ވަރަށް ބޮޑު ލުއިފަސޭހައެއްކަމަށް ރޮޒައިނާ ވިދާޅުވި
ރައްޔިތުންގެ މަޖިލީހުގެ މީދޫ ދާއިރާގެ މެންބަރު ރޮޒައިނާ އާދަމް
ރައީސް ޑރ. މުޙައްމަދު މުއިއްޒު ރައްޔިތުންގެ މަޖިލިސް އިންތިހާބު ފަސްކުރުމުގެ ބިލް ތަސްދީގުކުރެއްވީ ގޮތް ހުސްވެގެންކަމަށް ރައްޔިތުންގެ މަޖިލީހުގެ އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ރޮޒައިނާ ވިދާޅުވީ ބިލެއް އަނބުރާ ފޮނުވާލުމަށްފަހު މަޖިލީހުގެ އަޣުލަބިއްޔަތުން އެބިލެއް ފާސްކޮށްފިނަމަ، ގާނޫނުގައިވާގޮތުން އެ ބިލެއް ތަސްދީގުކުރުން ފިޔަވައި އިތުރު މަރުހަލާއެއް ނޯންނާނެ ކަމަށާއި ރައީސުލްޖުމްހޫރިއްޔާއަށް އެއާމެދު ކުރެވޭނެ އިތުރު އެއްވެސް ކަމެއް ނޯންނާނެކަން ވަރަށް ސާފުކޮށް އެނގެން އެބައޮތްކަމަށެވެ.
މެންބަރު ރޮޒައިނާ އިތުރަށް ވިދާޅުވީ މިއީ ވަރަށް ގިނަ ކަންބޮޑުވުންތަކެއް އާއްމު ރައްޔިތުންގެ ވެސް ހުރި މައްސަލައެއްކަމަށާއި އިލެކްޝަންސް ކޮމިޝަނުން ވެސް ރޯދަމަހު އިންތިހާބު ބޭއްވުމުން ދިމާވެގެންދާނެ ދަތިތައް ވެސް ފާހަގަކުރިކަަމަށެވެ. އަދި ރޯދަ މަހުގައި އިންތިހާބު ބޭއްވުމުގެ ސަބަބުން އިންތިހާބުގައި ވާދަކުރާ ކެންޑިޑޭޓުންނާއި އިންތިހާބުގައި ހަރަކާތްތެރިވާ މޮނިޓަރުންނާއި އޮބްޒާވަރުންނަށް ވެސް އެކިކަހަލަ ދަތިތަކާއި ކުރިމަތިލާންޖެހޭނެކަމަށް ވެސް ރޮޒައިނާ ވިދާޅުވިއެވެ. އަދި އިންތިހާބުގައި ހަރަކާތްތެރިވާ އޮފިޝަލުންގެ ތެރެއިން ވަރަށް ގިނަ އަންހެންނުން ވެސް ހަރަކާތްތެރިވާތީ ޚާއްސަކޮށް ރޯދަމަހަށް ވުމުން އެމީހުންގެ ޒަރޫރީ ކަންކަން ބެހެއްޓުމަށްފަހު ވޯޓުފޮށި ކައިރީގައި މުޅި ދުވަސް ހޭދަ ކުރަން ޖެހުމުން ދިމާވާނެ ދަތިތަކުގެ ވާހަކަ ވެސް ރޮޒައިނާ ވަނީ ފާހަގަކުރައްވާފައެވެ.
އެހެންކަމުން އިންތިހާބު ފަސްކުރުމުން އާއްމު ރައްޔިތުންނަށް ލިބިގެންދިޔައީ ވަރަށް ބޮޑު ފަސޭހައެއްކަމަށް ރޮޒައިނާ ވިދާޅުވިއެވެ.
ކުރިން އިންތިޚާބު ބާއްވަން ހަމަޖެހިފައި އޮތީ 2024 މާރޗް މަހުގެ 17 ވަނަ ދުވަހުއެވެ. އެއީ ރޯދަ މަހުގެ 7 ވަނަ ދުވަހެވެ. ރޯދަމަހުގައި އޮތް އިންތިހާބު ފަސްކުރުމަށް ރައްޔިތުންގެ މަޖިލީހުން ވަނީ 11 ފެބްރުއަރީ 2024 ވަނަ ދުވަހު ފާސްކޮށް، 12 ފެބްރުއަރީ 2024 ގައި ތަސްދީގުކުރުމަށް ރައީސުލްޖުމްހޫރިއްޔާ ފޮނުވިއެވެ. އެހެން ނަމަވެސް އެ ބިލު ތަސްދީގު ނުކުރައްވައި، 14 ދުވަސް ހަމަވުމުން ރައީސް ވަނީ އެ ބިލު އަނބުރާ މަޖިލީހަށް ފޮނުއްވާފައެވެ.
އެގޮތުން އެ ބިލު ފާސްކުރުމަށް އެޖެންޑާ ކުރެވި އެ ބިލު އެ އޮތް ގޮތަށް ފާސްކުރީ ވޯޓުގައި ބައިވެރިވެވަޑައިގެން މެންބަރުންގެ ތެރެއިން 47 މެންބަރުންގެ ވޯޓުންނެވެ. ބިލު ފާސްކުރަން ނުފެންނަ ކަމަށް ވޯޓުދެއްވީ އެންމެ 14 މެންބަރުންނެވެ. އެއާއެކު ބިލަށް ބަދަލެއް ނުގެނެސް ބިލު އޮތްގޮތަށް މަޖިލީހުގެ އަޣުލަބިއްޔަތުން ފާސްކުރުމުން ދެވަނަ ފަހަރަށް ތަސްދީގުކުރުމަށް ރައީސް މުއިއްޒުއަށް ފޮނުވުމުން އެ ބިލު ތަސްދީގުކުރުން ނޫންގޮތެއް ގާނޫނުގައިވާ ގޮތުން ނެތެވެ. އެހެންނަމަވެސް ރައީސް މުއިއްޒު އިންތިހާބު ފަސް ނުކުރައްވާނެ ފަދަ ގޮތަކަށް ވާހަކަފުޅު ދެއްކެވުމަށްފަހު ބުރާސްފަތި ދުވަހު ވަނީ ބިލު ތަސްދީގުކުރައްވާފައެވެ.
ރައީސް މުއިއްޒު ބިލު ތަސްދީގުކުރުމާ ގުޅިގެން އީސީން ބުރާސްފަތި ދުވަހުގެރޭ ބޭއްވި ކުއްލި ބައްދަލުވުމެއްގައި ނިންމާފައި ވަނީ އެޕްރީލް މަހުގެ 21 ވަނަ ދުވަހު އިންތިޚާބު ބޭއްވުމަށެވެ.
އީސީން ވަނީ މީގެ ކުރިން ވެސް އިންތިޚާބު ފަސްކުރާ ބިލު ރައީސުލްޖުމްހޫރިއްޔާ ތަސްދީގުކުރައްވާ ހިސާބުން އެއަށް އަމަލުކުރާނެ ކަމަށް ބުނެފައެވެ.
