މާލެ ސިޓީގައި ފެންބޮޑުވާ މައްސަލަ ހައްލުކުރުމުގެ މަސައްކަތްތައް ދަނީ ކުރަމުން: މޭޔަރު އާޒިމް
މާލެ ސިޓީގެ ހުރިހާ ކާނުތަކާއި މަގުތަކުގެ ހޮޅިތައް ސާފުކުރުމުގެ މަސައްކަތް ދަނީ ކުރަމުން
މާލޭގެ މޭޔަރު، އާދަމް އާޒިމް
މާލެ ސިޓީގައި ފެންބޮޑުވާ މައްސަލަ ހައްލުކުރުމުގެ މަސައްކަތް ކުރަމުންދާކަމަށް، މާލޭ މޭޔަރު އާދަމް އާޒިމް ވިދާޅުވެއްޖެއެވެ.
ފަހަކަށްއައިސް މާލެއަށް ބޯކޮށް ވާރޭވެހޭ ކޮންމެ ދުވަހަކު ފެން ބޮޑުވެ، ގެތަކަށް ފެންވަދެ، ބައެއް ގެއްލުން ދަނީ ލިބެމުންނެވެ. އެކަމަށް އިޝާރާތް ކުރައްވައި ބުރާސްފަތި ދުވަހުގެ ރޭ ކުރިއަށް ގެންދިޔަ ރައްޔިތުންގެ ބައްދަލުވުމުގައި އާޒިމް ވިދާޅުވީ، ފެން ބޮޑުވާ މައްސަލަ ހައްލު ކުރުމަށް މާލެ ސިޓީގެ ހުރިހާ ކާނުތަކާއި މަގުތަކުގެ ހޮޅިތައް ސާފުކުރުމުގެ މަސައްކަތް ކުރަމުންދާކަމަށެވެ.
މި މަސައްކަތް ކުރަމުންދަނީ މާލެ ސިޓީ ކައުންސިލްގެ މުވައްޒަފުންނާއެކު، މިނިސްޓްރީ އޮފް ސިޓީސް، ލޯކަލް ގަވަރމަންޓް އެންޑް ޕަބްލިކް ވަރކްސް، އެމްޑަބްލިޔުއެސްސީ އަދި އާރްޑީސީގެ މުވައްޒަފުން ކަމަށް އާޒިމް ވިދާޅުވިއެވެ.
މީގެ އިތުރުން އާޒިމް ވިދާޅުވީ މާލެ ސިޓީގެ އެންމެ ބޮޑަށް ފެންބޮޑުވާ ސަރަހައްދުތައް މިހާރު ދެނެގަނެވިފައި ވާކަމަށެވެ. އަދި ހައްލުކުރުމަށް ކުރެވޭނެ ކަންކަން ބަލަމުން ދާކަމަށާއި، އެ މަސައްކަތް ކުރާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ ކާނުތަކާއި، ހޮޅިތައް ސާފުކުރެވުމުން މާލޭ ފެންބޮޑުވުމުގެ މައްސަލައަށް ކޮންމެ ވަރެއްގެ ރަނގަޅު ހައްލެއް ލިބޭނެ ކަމަށެވެ.
