ރައީސް އަދިވެސް ހުންނެވީ ބިލު ތަސްދީޤުކުރައްވާ ގޮތަކަށް ނޫން، އޭޖީގެ ލަފަޔަކަށް އެެދެނީ
ޤާނޫނުއަސާސީއާ ޚިލާފަށް އެއްވެސް ކަމެއް ނުކުރައްވާނެކަމުގެ ޔަޤީންކަން ދެއްވާ ކަމަށް ވިދާޅުވި
ރައީސް ޑރ މުޙައްމަދު މުއިއްޒު
ރޯދަމަހަށް ފަހު އިންތިޚާބު ބާއްވާ ގޮތަށް ފާސްކުރި އިންތިހާބުތަކާއި ބެހޭ އާންމު ގާނޫނަށް ފަސް ވަނަ އިސްލާހު ގެނައި ބިލު ތަސްދީޤު ނުކުރައްވާނެކަމުގެ އިޝާރާތެއް ރައީސް ޑރ މުޙައްމަދު މުއިއްޒު އަނެއްކާވެސް ދެއްވައިފިއެވެ.
ނ. ކެނދިކުޅުދޫގައި މި މައްސަަލައާމެދު ރައީސް ވަނީ ވާހަކަފުޅު ދައްކަވާފައެވެ.
ރައީސް ވިދާޅުވީ، ޤާނޫނުއަސާސީއާ ޚިލާފަށް އެއްވެސް ކަމެއް ނުކުރައްވާނެކަމުގެ ޔަޤީންކަން ދެއްވާ ކަމަށެވެ. އެގޮތުން އެމަނިކުފާނު ހުންނެވީ މާތް ﷲ ގަންދީ ހުވައެއް ކުރައްވައިގެން ކަމަށާއި ގާނޫނާ ހިލާފު އެއްވެސް ކަމެއް ނުކުރައްވާނެ ކަމަށް އެމަނިކުފާނު ވަނީ ވިދާޅުވެފައެވެ.
އެހެންނަމަވެސް، ރައްޔިތުންގެ މަޖިލީހުގެ ޖުމްލަ މެންބަރުންގެ ޢަދަދު ކަނޑައެޅުމާ ގުޅޭގޮތުން ރައްޔިތުންގެ މަޖިލީހުގެ ގަވާއިދަށް ގެނައި އިސްލާހު ބާތިލުކުރުމަށް އެދި ދިވެހިރާއްޖޭގެ ސުޕްރީމް ކޯޓަށް ބަންޑާރަ ނައިބުގެ އޮފީހުން ހުށަހަޅާފައިވާ ދުސްތޫރީ މައްސަލައިގައި ނިންމާފައިވާ ނިންމުމާއި ގުޅިގެން އިތުރަށް އޭޖީއާ މަޝްވަރާ ކުރައްވާނެކަމަށް ރައީސް ވިދާޅުވިއެވެ.
ސުޕްރީމް ކޯޓުގެ 5 ފަނޑިޔާރުންގެ އިއްތިފާޤުން ނިންމަވާފައިވަނީ މަޖިލީހުގެ މެންބަރުންގެ އަދަދު ގުނާނީ ހުސްގޮނޑިވެސް ހިމަނައިގެން ކަމަށެވެ. މާނައަކީ މަޖިލީހުގެ ޖުމުލަ މެމްބަރުންގެ އަދަދުގެ ގޮތުގައި ގުނާނީ 87 އެވެ.
އެ ޙުކުމަށް އަލިއަޅުވާލައްވާ ރައީސް ވިދާޅުވީ، މަޖިލީހުގެ ޖުމުލަ މެމްބަރުންގެ އަދަދު ގުނާއިރު، 80 މެމްބަރުންނަށް ބަލައިގެން ނިންމާ ނިންމުން ބާތިލުވާނެކަމަށް ސުޕްރީމް ކޯޓުން ނިންމާފައިވާތީ، މަޖިލީހުން މީގެ ކުރިން ނިންމި ނިންމުންތަކުގެ ސައްޙަކަމާމެދުވެސް ސުވާލު އުފެދޭ ކަމަށެވެ. އެގޮތުން އެ ނިންމުންތަކުގެ ޤާނޫނީ ހައިސިއްޔަތާމެދު ސުވާލު އުފެދޭކަމަށް ރައީސް ވިދާޅުވިއެވެ.
ވުމާއެކު، އޭޖީގެ ޤާނޫނީ ލަފަޔަކަށް އެދި ދަންނަވާނެކަމަށް ރައީސް ވިދާޅުވިއެވެ.
އަދި، އެެއަށްފަހު، ބިލު ތަސްދީޤު ކުރައްވަން ޖެހޭނަމަ އެކަން ކުރައްވާނެކަމަށް ރައީސް ވިދާޅުވިއެެވެ.
ރައީސް ވިދާޅުވީ، މިއީ ސިޔާސީ މައްސަލައެއް ނޫން ކަމަށެވެ.
ރައީސް ވިދާޅުވި ގޮތުގައި އެމަނިކުފާނު ބޭނުންފުޅުވީވެސް ރޯދަމަހުގެ ކުރިން އިންތިޚާބު ބާއްވާށެވެ. ރޯދައިގެ ފަހުން އިންތިޚާބު ބާއްވާނަމަ، ފަހު ދިހައިގައި އިންތިޚާބުގެ ކެމްޕޭނުގައި އުޅެން ޖެހޭނެކަން ރައީސް ފާހަގަ ކުރެއްވިއެވެ.
ރައްޔިތުންގެ މަޖިލީސް އިންތިޚާބު ބާއްވާނެ ތާރީޚަކީ 17 މާރިޗު ކަމަށާއި އެ ތާރީޚަށް ބަދަލެއް ނާންނާނެ ކަމަށް ރައީސް މީގެ ކުރިން އެކި މަހައްލުތަކުގައި ވިދާޅުވެފައިވެއެވެ.
އިންތިހާބުތަކާއި ބެހޭ އާންމު ގާނޫނަށް ފަސް ވަނަ އިސްލާހު ގެނައި ބިލު، ރައްޔިތުންގެ މަޖިލީހުން ވަނީ 11 ފެބްރުއަރީ 2024 ވަނަ ދުވަހު ފާސްކޮށް، 12 ފެބްރުއަރީ 2024 ގައި ތަސްދީގުކުރުމަށް ރައީސް މުއިއްޒުއަށް ފޮނުވާފައެވެ. އެހެން ނަމަވެސް އެ ބިލު ތަސްދީގު ނުކުރައްވައި، 14 ދުވަސް ހަމަވުމުން ރައީސް ވަނީ އެ ބިލު އަނބުރާ މަޖިލީހަށް ފޮނުއްވާފައެވެ. އެގޮތުން ދެވަނަ ފަހަރަށް އެ ބިލު ފާސްކުރުމަށް އެޖެންޑާ ކުރެވި، ބުދަ ދުވަހު ކުރިއަށް ގެންދެވުނު މައްސަލައިގައި، އެ ބިލު އެ އޮތް ގޮތަށް މަޖިލީހުން އަލުން ފާސްކުރުމަށްފަހު ރައީސް މުއިއްޒުއަށް ބިލު ތަސްދީގުކުރުމަށް ރައީސް އޮފީހުން ވަނީ ފޮނުވާފައެވެ.
