މަޖިލިސް އިންތިޚާބު ބާއްވާ ތާރީޚަށް ބަދަލެއް ނާންނާނެ ކަމަށް ވިދާޅުވުމަށްފަހު ރައީސް އަނެއްކާވެސް ޤާނޫނުގައިވާ ގޮތާ އެއްގޮތަށް ތަބާވާނެކަމަށް ވިދާޅުވެއްޖެ
ނ. މަނަދޫގައި ބޭއްވި ޖަލްސާގައި ރައީސް މުއިއްޒު ވިދާޅުވެފައިވަނީ ގާނޫނާ ހިލާފު އެއްވެސް ކަމެއް ނުކުރައްވާނެ ކަމަށް
ރައީސް ޑރ. މުހައްމަދުު މުއިއްޒު ނ.މަނަދޫގައި ބޭއްވި ޖަލްސާގައި ވާހަކަފުޅު ދައްކަވަނީ
ރައްޔިތުންގެ މަޖިލީސް އިންތިޚާބު ބާއްވާނެ ތާރީޚަކީ 17 މާރިޗު ކަމަށާއި އެ ތާރީޚަށް ބަދަލެއް ނާންނާނެ ކަމަށް ވިދާޅުވުމަށްފަހު ރައީސް ޑރ. މުޙައްމަދު މުއިއްޒު އަނެއްކާވެސް ގާނޫނުގައިވާ ގޮތާ އެއްގޮތަށް ތަބާވާނެކަމަށް ވިދާޅުވެއްޖެއެވެ.
އިންތިހާބުތަކާއި ބެހޭ އާންމު ގާނޫނަށް ފަސް ވަނަ އިސްލާހު ގެނައި ބިލު، ރައްޔިތުންގެ މަޖިލީހުން ވަނީ 11 ފެބްރުއަރީ 2024 ވަނަ ދުވަހު ފާސްކޮށް، 12 ފެބްރުއަރީ 2024 ގައި ތަސްދީގުކުރުމަށް ރައީސް މުއިއްޒުއަށް ފޮނުވާފައެވެ. އެހެން ނަމަވެސް އެ ބިލު ތަސްދީގު ނުކުރައްވައި، 14 ދުވަސް ހަމަވުމުން ރައީސް ވަނީ އެ ބިލު އަނބުރާ މަޖިލީހަށް ފޮނުއްވާފައެވެ. އެގޮތުން ދެވަނަ ފަހަރަށް އެ ބިލު ފާސްކުރުމަށް އެޖެންޑާ ކުރެވި، ބުދަ ދުވަހު ކުރިއަށް ގެންދެވުނު މައްސަލައިގައި، އެ ބިލު އެ އޮތް ގޮތަށް މަޖިލީހުން އަލުން ފާސްކުރުމަށްފަހު ރައީސް މުއިއްޒުއަށް ބިލު ތަސްދީގުކުރުމަށް ރައީސް އޮފީހުން ވަނީ ފޮނުވާފައެވެ.
ގާނޫނު އަސާސީ ބުނާ ގޮތުން، ރައީސް ތަސްދީގުނުކޮށް ބިލު އަނބުރާ ފޮނުވައިލި ނަމަވެސް ބަދަލެއް ނުގެނެސް ދެވަނަ ފަހަރަށް ފާސްކުރުމުގެ ފުރުސަތު މަޖިލީހަށް ލިބިދެއެވެ. އަދި، މަޖިލީހުގެ ޖުމުލަ މެންބަރުންގެ އަޣުލަބިއްޔަތުން އެގޮތަށް ފާސްކޮށްފި ނަމަ، އެ ބިލެއް ތަސްދީގުކުރަން ޖެހޭނެއެވެ. އެހެންކަމުން މި ބިލު ރައީސް ތަސްދީގު ނުކުރައްވައިފިނަމަ، ކަނޑައެޅިގެން އެމަނިކުފާނު ގާނޫނާ ޚިލާފުވާނޭކަމަށް އެމްޑީޕީން އަންނަނީ ބުނަމުންނެވެ.
މިކަމާ ގުޅޭގޮތުން ރައީސް މުއިއްޒު މިހާރު ކުރައްވަމުން ގެންދާވާ ރަސްމީ ދަތުރުފުޅުގެ ތެރެއިން ބުދަ ދުވަހުގެރޭ ނ. މަނަދޫއަށް ވަޑައިގެން އެރަށުގައި ބޭއްވި ޖަލްސާގައި ވާހަކަފުޅުދައްކަވަމުން އެމަނިކުފާނު ހުންނެވީ ﷲ ގަންދީ ހުވައެއް ކުރައްވައިގެން ކަމަށާއި ގާނޫނާ ހިލާފު އެއްވެސް ކަމެއް ނުކުރައްވާނެ ކަމަށް އެމަނިކުފާނު ވަނީ ވިދާޅުވެފައެވެ.
ރައީސް މުއިއްޒު މިގޮތަށް ވިދާޅުވި ނަމަވެސް، ބުދަ ދުވަހުގެ ހަވީރު ނ.ހޮޅުދޫއަށް ވަޑައިގެން އެރަށުގައި ބޭއްވި ޖަލްސާގައި ވަނީ ރައްޔިތުންގެ މަޖިލީހުގައި ތިބީ އަޅުންތަކެއްގެ ގޮތުގައި ތިބޭ މެންބަރުންތަކެއް ކަމަށާއި މަޖިލިސް އިންތިހާބު އޮންނާނީ 17 މާރިޗުގައި ކަމަށް ވިދާޅުވެ ނުސީދާ ރައްދެއް މަޖިލީހުގައި ތިއްބަވާ އިދިކޮޅުގެ މެންބަރުންނަށް އަމާޒުކުރައްވާފައެވެ.
ބުދަ ދުވަހު މަޖިލީހުން ފާސްކުރި ބިލު، ދެވަނަ ފަހަރަށް ފާސްކުރީ ވޯޓުގައި ބައިވެރިވި މެންބަރުންގެ ތެރެއިން 47 މެންބަރުންގެ ވޯޓުންނެވެ. އެ ބިލާ ދެކޮޅަށް ވޯޓު ދެއްވީ 14 މެންބަރުންނެވެ. އެ ބިލު ދެވަނަ ފަހަރަށް ފާސްކުރުމަށްފަހު ރައީސް މުއިއްޒުގެ އަރިހަށް އެ ބިލު ތަސްދީގުކުރެއްވުމަށް ރައީސް އޮފީހުން ފޮނުއްވާފައި ވަނިކޮށް ރައީސް މުއިއްޒު ވަނީ މަޖިލިސް އިންތިހާބު އޮންނާނީ މާރިޗު 17ގައި، ރޯދަ މަހުގައި ކަމަށް ވިދާޅުވެފައެވެ.
