ރައީސުލްޖުމްހޫރިއްޔާ ޑރ.މުހައްމަދު މުއިއްޒު މަސައްކަތް ކުރައްވަނީ މުޅި ދައުލަތް ގަޑުބަޑުކުރައްވަން ކަމަށާއި، ރައްޔިތުން މަޖިލީހުގެ މެންބަރުން އަޅުންގެ ގޮތުގައި ސިފަކުރެއްވި ނަމަވެސް ގަޑުބަޑު ކުރުމުގެ ފުރުސަތު ނުލިބޭނެ ކަމަށް މަޖިލީހުގެ ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.
ރާއްޖެޓިވީގެ ފަލަސުރުހީ ޕްރޮގްރާމްގައި މެންބަރު ވިދާޅުވީ މިހާރު ފެނިގެންދަނީ މިއަދުގެ ރައީސްއަށް މި ދައުލަތް ނުހިންގިގެން އުޅޭ މަންޒަރު ކަމަށެވެ.
އިންތިޚާބު ފަސްކުރާ ބިލު ރައްޔިތުން މަޖިލީހުން ދެވަނަ ފަހަރަށް ފާސްކުރުމުން އެކަމަށް އިހުތިރާމް ކުރަންޖެހޭ ކަމަށާއި، ނަމަވެސް ރައީސް މަސައްކަތް ކުރައްވަނީ ރައްޔިތުންނާއި ހިފުމަށް ކަމަށް މެންބަރު ވިދާޅުވިއެވެ. މިއީ ރައީސުން ކުރައްވާ ކަންކަން ނޫންކަން ފާހަގަކުރައްވައި މެންބަރު ވިދާޅުވީ ރައީސް މުއިއްޒު މަސައްކަތް ކުރައްވަނީ ޕެނަލްޓީ އޭރިއާގެ ތެރެއިން ފައުލް ކުރައްވަން ކަމަށެވެ. ނަމަވެސް އެގޮތަށް އަމަލު ކުރައްވާނަމަ ވަރަށް ފަސޭހައިން ޕެނަލްޓީ ލިބޭނެ ކަމަށް މެންބަރު ވިދާޅުވިއެވެ.
މެންބަރު ވިދާޅުވީ ރައީސް މުއިއްޒު މަސައްކަތް ކުރައްވަނީ މުޅި ދައުލަތް ގަޑުބަޑު ކުރައްވަން ކަމަށެވެ. އެމަނިކުފާނު ދިޔަ ކޮންމެތަނެއް ވެސް ގަޑުބަޑުކޮށްފައިވާ ކަމަށް މެންބަރު ވިދާޅުވިއެވެ. އެގޮތުން މާލެސިޓީ ކައުންސިލާއި، ހައުސިން މިނިސްޓްރީ ވެސް ގަޑުބަޑުކޮށްފައިވާ ކަމަށް މެންބަރު ވިދާޅުވިއެވެ. އަދި ވިދާޅުވީ މަޖިލިސް މެންބަރުންނަކީ ޗީޕް ބައެއްގެ ގޮތުގައި އަދި އަޅުންގެ ގޮތުގައި ސިފަކުރެއްވި ނަމަވެސް މަޖިލީހުގެ ފަރާތުން ދައުލަތް ގަޑުބަޑުކުރުމުގެ ފުރުސަތު ނުދޭނެ ކަމަށާއި، މަޖިލީހުގެ ތެރެއިން ކުރެވޭނެ މާގިނަ މަސައްކަތްތައް ހުންނާނެ ކަމަށެވެ.
މީގެ އިތުރުން މެންބަރު ވިދާޅުވީ މަޖިލިސް އިންތިޚާބު ފަސްކުރުމަށް ގައުމުގެ ގިނަ ރައްޔިތުން އެދުނު ނަމަވެސް ރޯދަ މަހު އިންތިޚާބު ބޭއްވުމަށް ރައީސް މުއިއްޒު ބޭނުންފުޅުވުމުން އެމަނިކުފާނުގެ ބަހާއި އަމަލު ދިމާނުވާކަން ހާމަވާ ކަމަށެވެ.
ރައީސުލްޖުމްހޫރިއްޔާއަށް ހުންނަ ބޭފުޅަކު ރާއްޖޭގެ ގާނޫނު ހަދާ މަޖިލީހަށް އެވަރަށް ޖެހިގަނެގެން ގާނޫނު ހަދާ މަޖިލީހުން އެއް ކަމެއް ވެސް ބަލައި ނުގަނެ ހުރިހާ އެއްޗެއް ބޮލާލާ ޖަހަމުންދަންޏާ އޭގެ މާނައަކީ ރައީސުލްޖުމްހޫރިއްޔާ އެ ހުންނެވީ ރީތިކޮށް ދައުލަތް ހިންގާކަށް ނޫނޭ. ދައުލަތް ގަޑުބަޑުކުރައްވާށޭ އެހުންނަވަނީ. ދެން ރައީސުލްޖުމްހޫރިއްޔާ ބޭނުންފުޅުވެފައި އޮވެދާނެ ފަހަރުގައި އަޅުގަނޑުމެން ވެސް އޭގައި ޖެހި އަޅުގަނޑުމެން ވެސް ގަޑުބަޑު ކުރުން އެއީ ރައްޔިތުން މަޖިލީހުގެ ބާރުތަކަށް ބަލާއިރު ރައްޔިތުންގެ މަޖިލީހުން އުވާލެވިދާނެ ބައިވަރުކަން އެބަހުރި. ރާއްޖޭގެ ރައީސުލްޖުމްހޫރިއްޔާ އިތުބާރު ނެތް ކަމަށް ނަގާފައި ފޮނުވާލެވިދާނެ. މިއަދު ވެސް ލީ ވޯޓުގެ އަދަދަށް ބަލާއިރު އަޅުގަނޑުމެން އިތުރަށް ވޯޓެއް ހަމަކޮށްލަން ދެން އަޅުގަނޑުމެން ދެން ވަރަށް ކުޑަ ކަމެއް ކޮށްލައިގެން ދެން ވޯޓު ހަމަކޮށްލެވޭނެ. އަޅުގަނޑުމެންނަށް އެވޯޓު ނަގާލެވިދާނެ. ނަގާފިއްޔާ އެދިޔައީ ސްޕްރިމްކޯޓަށް. އަނެއްކާ ވެސް ރާއްޖެ ބައިވަރު ދުވަސްތަކެއް ފަހަތަށް ދިޔައީ.އަޅުގަނޑުމެންގެ ޑިމޮކްރެޓިކް ހަޔާތުގައި ހަމަ މައްސަލަތަކެއް ދިމާވި. ރައްޔިތުންނަށް އޭގެ ތަކުލީފުތަކެއް އައީ. އަޅުގަނޑުމެންނަށް އުވާލެވިދާނެ ހުރިހާ މިނިވަން މުއައްސަސާތަކެއް ވެސް އުވާލަން ރައްޔިތުން މަޖިލީހުގެ ކޮމެޓީން ކަންކަން ހިންގިދާނެ.މަޖިލީހުގެ ހެންވޭރު ދެކުނު ދާއިރާގެ މެމްބަރު ހުސައިން ޝަހީމް
މެންބަރު ވިދާޅުވީ ރައީސް މުއިއްޒުގެ ކެބިނެޓްގެ ވަޒީރުންގެ ތެރެއިން މަޖިލީހުން ރުހުން ނުދީ ފޮނުވާލީ އެންމެ ތިން ވަޒީރުންގެ ކަމަށެވެ. އެކަމަށް އެކަނި ރިޔާއަތްކޮށް މިސަރުކާރަށް މަޖިލީހުގެ ފަރާތުން އެއްބާރުލުން ނުލިބޭ ކަމަށް ނުނިންމޭނެ ކަމަށް މެންބަރު ވިދާޅުވިއެވެ. އަދި ވިދާޅުވީ ރައްޔިތުން މަޖިލީހުގެ މެޖޯރިޓީ ޕާޓީއަކީ ވަރަށް ޒިންމާދާރު ކަމާއެކު މަސައްކަތްކުރާ ޕާޓީއެއް ކަމަށެވެ.
