ގޯލްޑަން ފުޓްސަލް ޗެލެންޖު: ކުއާޓާ ފައިނަލްގެ 8 ޓީމު ޔަގީންވެއްޖެ

ސޮނީ ސްޕޯޓްސް ގޯލްޑަން ފުޓްސަލް ޗެލެންޖު 2024ގެ ކުއާޓާ ފައިނަލްގައި ވާދަކުރާނެ 8 ޓީމު ޔަގީން ވެއްޖެ އެވެ.

އަންގާރަ ދުވަހުގެ ރޭ ކުޅުނު ގަދަ 16 ވަނަ ބުރުގެ އަށް މެޗަށްފަހު، ކުއާޓާ ފައިނަލުން ޖާގަ ލިބުނު އަށް ޓީމަކީ، އެންމެ ފަހުގެ ޗެމްޕިއަން ލ.ގަމުގެ އިތުރުން އއ.މަތިވެރި، ވިލިމާލެ، ސ.ހިތަދޫ، ކ.ގާފަރު، ދ.ކުޑަހުވަދޫ، ތ.ތިމަރަފުށި އަދި ބ.އޭދަފުށި އެވެ.

މަތިވެރިން ކުއާޓާ ފައިނަލްގެ ޖާގަ ހޯދީ، ފ.ބިލެތްދޫއާ ދެކޮޅަށް ކުޅުނު މެޗު 2-0 އިން ކާމިޔާބު ކޮށްގެންނެވެ. މެޗުގައި މަތިވެރީގެ ލަނޑުތައް ޖެހީ، އަޙުމަދު ފިރާޝް އަދި އަޙުމަދު ފިޒާން އެވެ. އެންމެ ފަހުގެ ޗެމްޕިއަން ގަމުން ކުއާޓާ ފައިނަލްގެ ޖާގަ ހޯދީ ހދ.ނައިވާާދޫގެ މައްޗަށް ކުރި ހޯދައިގެންނެވެ. މެޗުގެ ފުރިހަމަ ވަަގުތު ހަމަވީއިރު އެއްވެސް ޓީމަކަށް ލަނޑެއް ޖެހިފަައި ނެތުމުން، ނަތީޖާ ނެރުމަށް ޖެހި ޕެނަލްޓީ ގަމުން ކާމިޔާބު ކުރީ 4-2 އިންނެވެ. ނައިވާދޫގެ ދެ ޕެނަލްޓީއެއް ގަމުގެ ގޯލު ކީޕަރު ވަނީ ހުއްޓުވައިފަ އެވެ. ކުއާޓާ ފައިނަލްގައި މަތިވެރިން ނިކުންނާނީ ގަމާ ދެކޮޅަށެވެ.

ވިލިމާާލެ އިން ކުއާޓާ ފައިނަލްގެ ޖާގަ ހޯދީ ރ.ދުވާފަރު ބަލިކޮށްގެންނެވެ. މެޗުގެ ފުރިހަމަ ވަގުތު ހަމަވީ ދެ ޓީމު 1-1 އިން އެއްވަރުވެގެންނެވެ. ޕެނަލްޓީގައި ވިލިމާލެ ކުރި ހޯދީ، 5-2 އިންނެވެ. ހިތަދޫ އިން ކުއާޓާ ފައިނަލްގެ ޖާގަ ހޯދީ، 2-1 އިން އދ.މާމިނގިލީގެ މައްޗަށް ކުރި ހޯދައިގެންނެވެ. މެޗުގައި ހިތަދޫގެ ލަނޑުތައް ޖެހީ، މުޙައްމަދު ތިލްމީޒް އަދި ހާޒިމް ފައުޒީ އެވެ. މެޗުގައި މާމިނގިލީގެ ހަމައެކަނި ލަނޑު ޖެހީ އަޙުމަދު ނިޒާމް އެވެ.

ގާފަރުން ވެސް ކުއާޓާ ފައިނަލްގެ ޖާގަ ހޯދީ ޕެނަލްޓީގައި ކުރި ހޯދައިގެންނެވެ. ދަޑިމަގާ ދެކޮޅަށް ކުޅުނު މެޗުގެ ފުރިހަމަ ވަގުތު ހަމަވީ 1-1 އިން އެއްވަރުވެގެންނެވެ. ޕެނަލްޓީގައި ގާފަރުން ކުރި ހޯދީ، 5-3 އިންނެވެ. ކުޑަހުވަދޫން އިން ވަނީ ނ.ކެނދިކުޅުދޫއާ ދެކޮޅަށް ކުޅުނު މެޗު 4-0 އިން ކާމިޔާބު ކޮށްފަ އެވެ. މެޗުގައި ކުޑަހުވަދޫގެ އަބްދުލް މުޤްސިތު ދެ ލަނޑު ޖެހި އެވެ. އަނެއް ލަނޑު ޖެހީ ޙުސެއިން އިފްހާމް އެވެ. އަނެއް ލަނޑަކީ ކެނދިކުޅުދޫގެ އަލީ ބުޝްރީ އަތުން ބައި ކޮޅަށް ވަތް ލަނޑެކެވެ.

ގަދަ 16 ވަނަ ބުރުގެ މެޗުގައި މުބާރާތުގެ އެންމެ ކާމިޔާބު ޓީމު، ތިމަރަފުށި ނިކުތީ ހއ.އުތީމާ ދެކޮޅަށެވެ. އެ މެޗު ތިމަރަފުށިން ކާމިޔާބު ކުރީ 4-1 އިންނެވެ. ތިމަރަފުށީގެ އިބްރާހީމް ޙަމްދާން ދެ ލަނޑު ޖެހި އެވެ. އަނެއް ދެ ލަނޑު ޖެހީ، އިބްރާހީމް އަސްވަދު (ގަބޭ) އަދި އާދަމް ނާސިހު އެވެ. އުތީމުގެ ހަމައެކަނި ލަނޑު ޖެހީ އަޙުމަދު އައިހަމް އެވެ. އޭދަފުށިން ވަނީ ޕެނަލްޓީގައި މާފަންނު ބަލިކޮށް، ކުއާޓާ ފައިނަލަށް ދަތުރު ކޮށްފަ އެވެ. މެޗުގެ ފުރިހަމަ ވަަގުތު ހަމަވީ 3-3 އިންނެވެ. ޕެނަލްޓީގައި އޭދަފުށިން ކުރި ހޯދީ 7-5 އިންނެވެ.