އެމްޑީޕީގެ މެޖޯރިޓީ މަޖިލީހުގައި ނެތް ނަމަ، ގެދޮރުވެރިޔާގެ ފްލެޓްތައް ބޭނުން ގޮތަކަށް ބަހައި ނިންމާލާނެ: ރޮޒައިނާ

މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެޖޯރިޓީ މެންބަރުން މަޖިލީހުގައި ނުތިއްބަވާ ނަމަ، ގެދޮރުވެރިޔާގެ ދަށުން މިދިޔަ ސަރުކާރުން ދޫކުރި ފްލެޓްތައް ބޭނުން ގޮތަކަށް މި ސަރުކާރުން ބަހައި ނިންމާލާނެ ކަމަށް އައްޑޫ މީދޫ ދާއިރާގެ މެންބަރު ރޮޒައިނާ އާދަމް ވިދާޅުވެއްޖެއެވެ.

ކުރިއަށް އޮތް ރައްޔިތުންގެ މަޖިލީހުގެ އިންތިހާބުގެ އެމްޑީޕީގެ ކެމްޕޭނު ލޯންޗުކުރުމަށް "މިސްރާބު ހަމަމަގަށް" މި ނަމުގައި ބޭއްވި ޖަލްސާގައި ވާހަކަ ދައްކަވަމުން ރޮޒައިނާ ވިދާޅުވީ، މިދިޔަ ސަރުކާރުން ދޫކުރި ގެދޮރުވެރިޔާގެ ފްލެޓްތަކަށް ކުރިމަތިލި ފަރާތްތަކުގެ ތެރެއިން 60 އިންސައްތަ މީހުން ޝަރުތު ހަމަ ނުވިއިރު، އޭގެ ތެރެއިން ބައެއް ކެޓަގަރީތަކުން ޝަރުތު ހަމަނުވީ އަންހެނުން ކަމަށެވެ.

Advertisement

އޭގެ ސަބަބެއް ކަމުގައި ފާހަގަ ކުރައްވަމުން އެމްޑީޕީގެ އަންހެނުންގެ ރޫޙުގެ ރައީސާކަން ކުރައްވާ ރޮޒައިނާ ވިދާޅުވީ، އޭސީސީން ނެރުނު ރިޕޯޓުގެ ބައެއް ކެޓަގަރީތަކުން އަންހެނުން ޝަރުތު ހަމަނުވާ ކަމަށް ނިންމި އިރު، އެފަދަ އަންހެނުންނަކީ މާލޭގައި ގިނަ ދުވަހު ދިރިއުޅުނު ނަމަވެސް ސަރުކާރުގެ ނުވަތަ ކުންފުންޏެއްގެ ވަޒީފާގައި ހަރަކާތްތެރިވި އަންހެނުންތަކެއް ނޫން ކަމަށެވެ.

އެގޮތުން ބައެއް ކަނބަލުންނަކީ ގޭގައި ހުރެގެން ކުރާ މަސައްކަތްތައް ކުރި ފަރާތްތަކަށްވާއިރު، އެފަދަ ފަރާތްތަކަށް ސަރުކާރުގެ ވުޒާރާއެއްގައި ނުވަތަ އަމިއްލަ ކުންފުންޏެއްގައި ވަޒީފާ އަދާކުރިކަމުގެ ލިޔުން ލިބޭނެ ގޮތެއް ނޯންނާނެ ކަމަށެވެ. އަދި އެފަދަ ފަރާތްތަކަށް ޕެންޝަން ފައިސާ ވެސް ނުލިބޭނެކަން ރޮޒައިނާ ފާހަގަ ކުރެއްވިއެވެ.

ރޮޒައިނާ ވިދާޅުވީ، އެމްޑީޕީ ސަރުކާރުން ފްލެޓްތައް ދިނީ އެ ހުރިހާ ކަމަކަށް ރިއާޔަތް ކުރުމަށް ފަހުގައި ކަމަށާއި، އެފަދަ ހާލަތްތަކަށް ޚާއްސަކޮށް ކުދިންގެ ސްކޫލު ލީވިން ސެޓިފިކެޓް ވެސް ބަލައިގަންނަ ލިޔެކިޔުމެއްގެ ގޮތުގައި އޭރު ހަމަޖެހެވުނު ކަމަށެވެ.

ރޮޒައިނާ ވިދާޅުވީ އެ މައްސަލަ މަޖިލީހުގެ މިނިވަން މުއައްސަސާތަކާ ބެހޭ ކޮމެޓީން ބަލަމުންދާ ކަމަށާއި، އެ މައްސަލަ ބެލުމުގެ ފުރުސަތު މަޖިލީހަށް ލިބުނީ ވެސް، އެމްޑީޕީ މަޖިލީހުގެ މެޖޯރިޓީގައި އޮތުމުން ކަމަށެވެ.