ޕީޕީއެމް ޕީއެންސީއަށް މަޖިލީހުގެ މެޖޯރިޓީ ލިބިއްޖެނަމަ، މަޖިލިސް ހިންގާނީ ރައީސް އޮފީހުގެ ތެރެއިން: މެމްބަރު ނިޔާޒް
ސަރުކާރަށް މަޖިލީހުން އެއްބާރުލުން ދިނުމަކީ އޮންނަ ކަމެއް
ހުޅުމާލެ ދާއިރާގެ މެންބަރު އަލީ ނިޔާޒް
ޕީޕީއެމް ޕީއެންސީއަށް މަޖިލީހުގެ މެޖޯރިޓީ ލިބިއްޖެނަމަ، މަޖިލިސް ހިންގާނީ ރައީސް އޮފީހުގެ ތެރެއިންކަމަށް ހުޅުމާލޭ ދާއިރާގެ މެމްބަރު އަލީ ނިޔާޒް ވިދާޅުވެއްޖެއެވެ.
ރާއްޖެޓީވީގެ ފަލަސުރުޙީ ޕްރޮގްރާމްގައި ވާހަކަ ދައްކަވަމުން ނިޔާޒް ވިދާޅުވީ، ޕީޕީއެމް ޕީއެންސީއަށް މަޖިލީހުގެ މެޖޯރިޓީ ލިބިއްޖެނަމަ، މަޖިލިސް ހިންގާނީ ރައީސް އޮފީހުގެ ތެރެއިން ކަމަށެވެ.
ނިޔާޒް ވިދާޅުވީ، ސަރުކާރަށް މަޖިލީހުން އެއްބާރުލުން ދިނުމަކީ އޮންނަ ކަމެއް ކަމަށާއި، 19 ވަނަ މަޖިލީހުގައި އެމްޑީޕީއަށް ސުޕަރ މެޖޯރިޓީ ލިބުނު ނަމަވެސް، އަބަދުވެސް ސަރުކާރު ޖަވާބުދާރީ ކުރުވައި، ސަރުކާރަށް ފާރަވެރިވެފައި ވުމަކީ 19 ވަނަ މަޖިލިސް ތަފާތުވާ ސަބަބު ކަމަށެވެ.
ވަޒީރުން ޒިންމާ އަދާކުރޭތޯ ކަށަވަރު ކުރުމަށް އެމްޑީޕީގެ ވޯޓާއެކު ގިނަ މަސައްކަތްތަކެއް ކުރެވިފައިވާކަންވެސް ނިޔާޒް ފާހަގަ ކުރެއްވިއެވެ.
ނިޔާޒް އިތުރަށް ވިދާޅުވީ، އެ މިންވަރަށް ސަރުކާރު ޖަވާބުދާރީ ކުރުވި މަޖިލީހެއް މިހާތަނަށް ފެނިފައިނުވާނެ ކަމަށެވެ.
އަދި މިވަގުތު މުހިއްމީ ރައްޔިތުންގެ މަޖިލީހުގެ ދައުރު އެންމެ ފުރިހަމައަށް އަދާކުރެވޭ ބަޔަކަށް މަޖިލީހުގެ މެޖޯރިޓީ ދިނުންކަންވެސް ނިޔާޒް ފާހަގަ ކުރެއްވިއެވެ.
ރަމަޟާން މަހު، ރައްޔިތުންގެ މަޖިލީހުގެ އިންތިޚާބު ބާއްވަން މިސަރުކާރުން ބޭނުންވަނީ މިހާރު ކަންތައްތައް ހިނގާގޮތުން ސަރުކާރުގެ ރުހުން ރައްޔިތުންގެ މެދުގައި އޮތް މިންވަރަށް ބަލާއިރު ވީ އެންމެ އަވަހަށް އިންތިޚާބު ބޭއްވުމަކީ ސަރުކާރަށް އޮތް އެންމެ ރަނގަޅު ގޮތްކަމުގައިވާތީކަމަށްވެސް މެމްބަރު ނިޔާޒް ވިދާޅުވިއެވެ.
މީގެއިތުރުން މަޖިލީސް އިންތިޚާބު ރޯދަމަހުގެ ފަހުން ބާއްވާގޮތަށް ޤާނޫނަށް ގެނައި އިސްލާހު ތަސްދީގުކުރެއްވުމުގައި ރައީސް ލަސްކުރައްވަމުން ގެންދަވާ ގެންދެވުމަކީވެސް އިންތިޚާބާމެދު ރައްޔިތުން ފޫހިކުރުވުމަށް ކުރައްވާ ކަމެއްކަމަށް ނިޔާޒު ވިދާޅުވިއެވެ.
އެބިލު ތަސްދީގުކުރައްވަން ބޭނުންފުޅުނުވާނަމަ ބިލު އަނބުރާ މަޖިލީހަށް ފޮނުއްވާލެއްވުމުން ވަގުތު އޮއްވާ ބިލަށް ބަދަލު ގެނައުމުގެ ފުރުސަތު ފަހިވެގެންދާނެކަމަށްވެސް ނިޔާޒު ވިދާޅުވިއެވެ.
ނަމަވެސް ސަރުކާރުން ކަންކުރަނީ އެ ގޮތަށް ނޫންކަމަށާއި މިއީ ޒިންމާދާރުކުޑަ ގޮތެއްގައި ކުރަމުންގެންދާކަމެއްކަމަށް ނިޔާޒު ވިދާޅުވިއެވެ.
