ޓުޗެލް ފާހަގަ ކުރި ގޮތުގައި ބަޔާނަށް މަތީ ހަރުފަތުގައި ނޯވެވޭ!

ޖަރުމަނުގެ ބަޔާން މިއުނިކަށް މަތީ ހަރުފަތުގައި އޮންނަން އުނދަގޫވާ ކަމަށް އެ ޓީމުގެ ކޯޗު ތޯމަސް ޓުޗެލް ބުނެފި އެވެ.

ޓުޗެލް މިހެން ބުނީ، ބަޔާނާ ހަވާލުވުމަށްފަހު ވެސް އެ ޓީމާއެކު އޭނާ އަށް ނަތީޖާ ނުނެރެވޭތީ ކުރިމަތިވަމުން އަންނަ ފާޑު ކިޔުންތަކާ ގުޅިގެންނެވެ. މި ސީޒަންގެ ޖަރުމަނު ލީގުގައި ވެސް އަދި ޔުއެފާ ޗެމްޕިއަންސް ލީގުގައި ވެސް ބަޔާންގެ ނަތީޖާތައް ދަށްވެފައިވާއިރު، މި ސީޒަނަށް ފަހު ބަޔާން ދޫކޮށްލަން މިހާރު ޓުޗެލް ވަނީ ނިންމައިފަ އެވެ. އެއީ ކުލަބާއި އޭނާއާ ދެމެދު ކުރިއަށް ގެންދިޔަ މަޝްވަރާތަކަށްފަހު އެވެ.

ޓުޗެލް ބުނީ، މަތީ ފަންތީގައި އޮތުމަށާއި، އެ ފެންވަރުގައި ހިފެހެއްޓުމަށް ބަޔާނަށް އުނދަގޫވާ ކަމަށެވެ. އެކަމުގެ ތެރޭގައި އޭނާ ވެސް ހިމެނޭހެން، ގިނަ ކަންތައްތަކެއް އެކުލެވިގެންވާ ކަމުގައި ވެސް ޓުޗެލް ބުންޏެވެ. އެހެންކަމުން އެކަންކަން ބަދަލު ކުރުމުގެ ގޮތުން، މި ސީޒަނަށްފަހު ބަޔާންގެ ބައެއް ކަންކަމަށް ބަދަލުތަކެއް ގެންނަނީ ކަމަށް ވެސް އޭނާ ބުންޏެވެ. ޓުޗެލް އެ އިޝާރާތް ކުރީ އޭނާ ކޯޗުކަމުން ވަކިވުން ކަމަށެވެ.

މީގެ އިތުރުން އޭނާ ބުނީ ބަޔާން އަކީ ޖަރުމަނުގައި ވެސް އަދި ޔޫރަޕުގައި ވެސް ބޮޑު ކުލަބެއް ކަމަށާއި، ބަޔާންގެ ވަޒީފާގައި ހުންނަ މީހަކަަށް ގޯސްތަކެއް ވެސް ހެދޭނެ ކަމަށެވެ. އަދި އެ ގޯސްތަކުގެ ސަބަބުން އިންތިހާ އަށް ޕްރެޝަރު އަންނާނެ ކަމަށާއި، ހެދޭ ގޯސްތައް ޤަބޫލު ކުރަން ޖެހޭނެ ކަމަށް ވެސް ޓުޗެލް ބުންޏެވެ. ނަމަވެސް، އެއީ ފަހަތަށް ބަަލަހައްޓައިގެން ތިބެން ޖެހޭނެ ކަމެއް ނޫންކަން ފާހަގަކޮށް ޓުޗެލް ބުނީ، ބަޔާންގެ ނަސީބު ވެސް ދެރަ ކަމަށެވެ. އެގޮތުން ބަޔާންގައި އަނިޔާގެ މައްސަލަތަކެއް އުޅޭ ކަމަށް އޭނާ ވަނީ ފާހަގަކޮށްފަ އެވެ.

ބަޔާންގެ ކޯޗުކަމާ އުމުރުން 50 އަހަރުގެ ޓުޗެލް ހަވާލުވީ، މިދިޔަ އަހަރުގެ މާޗު މަހުގެ ތެރޭގަ އެވެ. އެއީ އޭނާގެ ކުރިން އެ މަގާމުގައި ހުރި ހޫލިއަން ނާގަލްސްމަން ވަކި ކުރުމުންނެވެ. ޓުޗެލް އަށް ހަވާލު ކުރި އެންމެ ބޮޑު މަސައްކަތަކީ އޭރު ނަތީޖާ ގޯސްވެފައި އޮތް ބަޔާންގެ ނަތީޖާ ރަނގަޅުކޮށް، އެ ކުލަބު ހަމަ މަގަށް އެޅުވުމެވެ.