ޖޯބައިޑަން، ނަވަލްނީގެ އަންހެނުންނާއި ދަރިފުޅާ ބައްދަލް ކުރައްވައިފި
23 ފެބުރުއަރީ 2024 | ހުކުރު 15:46ނަވަލްނީ ސިއްރުން ވަޅުލަން އެއްބަސްނުވެއްޖެ ނަމަ ހަށިގަޑަށް "ގޮތެއް ހަދާނެކަމަށް" ސަރުކާރުގެ އޮފިޝަލުން ބުނެފައިވާ ކަމަށް ނަވަލްނީގެ މަންމަ ބުނެފައި ވެއެވެ
އެމެރިކާ ގެ ރައީސް ޖޯބައިޑަން ނަވަލްނީގެ އާއިލާ ބައްދަލް ކުރައްވަނީ
އެމެރިކާގެ ރައީސް ޖޯބައިޑަން ރަޝިޔާގެ އިދިކޮޅު ލީޑަރ އެލެކްސީ ނަވަލްނީގެ ހުވަފަތް އަބނބިމީހާ އާއި އަންހެން ދަރިފުޅާ ބައްދަލް ކުރައްވައިފިއެވެ. މިބައްދަލް ކުރެއްވުމަށްފަހު ބައިޑަން ވިދާޅުވީ ނަވަލްނީގެ ހިއްވަރާ "ލެގަސީ" ދެމެހެއްޓުމުގައި އެދެމީހުން ދެމިތިބޭނެކަން ޔަގީން ކުރައްވާ ކަމުގައެވެ.
ރަޝިޔާގެ ރައީސް ވްލަޑިމިއަރ ޕޫޓިން އަށް ވަރަށް ބޮޑަށް ފާޑުކިޔާ ޕޫޓިން އާއި ސަރުކާރުގެ އިސްވެރިންގެ ކޮރަޕްޝަން ހާމަ ކުރުމަށް އަޑުއުފުލާތީ ޖަލަށް ލާފައިހުރި އެލްސީ ނަވަލްނީ ވަނީ ޖަލުގައި ހުއްޓާ ނިމުނު ހަފްތާގައި ކުއްލިއަކަށް މަރުވެފައެވެ. އޭނާގެ މަރަށް ފަހު ރަޝިޔާގެ ޕްރިޒަން ސަރވިސް އިން ބުނެފައިވަނީ ނަވަލްނީ ހިނގާލުމަށްޓަކައި ނެރެފައިވަނިކޮށް ކުއްލިއަކަށް ހޭނެތުނީ ކަމަށެވެ. އަދި ޑޮކްޓަރުން ކުރިމަސައްކަތުންވެސް ފުރާނަ ސަލާމަތް ނުކުރެވުނު ކަމަށް ބުނެފައިވެއެވެ. ނަމަވެސް ނަވަލްނީގެ އަންހެނުން ބުނެފައިވަނީ ޕޫޓިންގެ އަމުރަށް އޭނާ މަރާލެވުނީ ކަމަށެވެ.
ދުނިޔޭގެ އެތައް ލީޑަރުންނެއްވެސް ވަނީ ނަވަލްނީ ގެ މަރަށް ޕޫޓިން ޒިންމާވާން ޖެހޭނެ ކަމަށް ވިދާޅުވެފައެވެ. އަދި ބައިޑެންގެ ބައްދަލް ކުރެއްވުން އައިސްފައިމިވަނީ ރަޝިޔާއާއި ދެކޮޅަށް ދަތިކުރުމުގެ އިތުރު ފިޔަވަޅުތަކެއް އަޅާކަން އެމެރިކާއިން އިއުލާން ކުރި ދަނޑިވަޅާ ދިމާކޮށެވެ.
އަލަށް އަޅާ ދަތިކުރުމުގެ ފިޔަވަޅު ތަކަކީ މީގެ ދެއަހަރު ކުރިން ރަޝިޔާއިން ޔޫކްރެއިންއަށް ދެކޮޅަށް ހަގުރާމަފެށިފަހުން އެންމެ ފުޅާ ދާއިރާއެއްގައި އަޅާ ފިޔަވަޅުތައް ކަމަށް ވައިޓްހައުސް އިން އިއުލާން ކޮށްފައި ވެއެވެ. 500އެއްހާ އަމިއްލަމީހުންނާ ވިޔަފާރިތަކާދެކޮޅަށް އެމެރިކާއިން އައު ފިޔަވަޅުތަކެއް އަޅަނީ ނަވަލްނީ ގެމަރާ ގުޅިގެން ކަމަށް ނެޝަނަލް ސެކިއުރިޓީ ތަރުޖަމާން ޖޯން ކަރބީ ވިދާޅުވެފައި ވެއެވެ.
ނަވަލްނީ މަރާލެވުނީ ކަމަށް ބުނާބުނުންތައް ކްރެމްލިން އިން ދޮގުކުރެއެވެ. އަދި ހުޅަގުން މިކަމުގައި "ހިސްޓެރިކަލް" ވަނީކަމަށް ބުނެފައި ވެއެވެ.
ޔޫޓިބްއަށް ލާފައިވާ ވީޑިއޯ އެއްގައި ނަވަލްނީގެ މަންމަ ލުޑްމިލާ ނަވަލްނާޔާ ބުނެފައިވަނީ ސަރުކާރުން އޭނާޔަށް ބިރުދައްކަމުންދާކަމަށެވެ. ނަވަލްނީ ސިއްރުން ވަޅުލަން އެއްބަސްނުވެއްޖެ ނަމަ ހަށިގަޑަށް "ގޮތެއް ހަދާނެކަމަށް" ބުނެފައިވާ ކަމަށް އޭނާގެ ވީޑިއޯގައި ބުނެފައިވެއެވެ.
މިކަމާބެހޭގޮތުން ރަޝިޔާ ސަރުކާރުން އެއްޗެއް ބުނެފައެއް ނުވެއެވެ.
