އަންހެނުންނަށް އަނިޔާ ކުރާ މީހުންނާއި، ކުޑަކުދިންނަށް އަނިޔާކުރުމުގެ ކުށް ސާބިތުވެފައި ތިބޭ މީހުން އޮސްޓްރޭލިއާ އަށް އެތެރެވުން މަނާ ކުރާނެ ކަމަށް އެ ޤައުމުގެ އިމިގްރޭޝަން މިނިސްޓަރ ޑޭވިޑް ކޯލްމަން ވިދާޅުވެއްޖެއެވެ. 

ބުރާސްފަތި ދުވަހު އެ ޤައުމުގެ ސަރުކާރުން އަމަލުކުރަން ފެށި އުސޫލު ބުނާ ގޮތުން އެފަދަ ކުށެއް ސާބިތުވެފައިވާ ނަމަ އެ މީހެއްގެ ވިޒިޓިންގް ވިސާ ކެންސަލްކުރެވޭނެއެވެ. އަދި އެފަދަ ފަރާތްތައް އެ ޤައުމުގައި ތިބި ނަމަ ޤައުމުން ބޭރު ކުރެވޭނެ ކަމަށް ވެސް ޑޭވިޑް ވަނީ ވިދާޅުވެފައެވެ. 

ޑޭވިޑް ވިދާޅުވީ، އޮސްޓްރޭލިއާގައި ގެވެށި އަނިޔާ ކުރާ މީހުންނާ މެދު ގެންގުޅެނީ "ޒީރޯ-ޓޮލެރެންސް" ކަމަށާއި، އެފަދަ މީހުންނަށް އޮސްޓްރޭލިއާ އިން މަރުހަބާ ނުކިޔާނެ ކަމަށެވެ. އަދި އެފަދަ އިން އަމަލު ކުރުމުގައި އެ މީހަކު ކުށެއް ކުރީ ކޮން ތަނެއްގައިތޯ ނުވަތަ އެ މީހެއްގެ މައްޗަށް ކުރީ ކޮން ހުކުމެއްތޯ ވެސް ނުބަލާނެ ކަމަށް ޑޭވިޑް ވިދާޅުވިއެވެ.  

ޑޭވިޑް އެހެން ވިދާޅުވެފައިވާއިރު، އެފަދަ ކުށެއް ސާބިތުވެފައި ވާތީ ދާދި ފަހުން އެޤައުމުން ވަނީ، އެމެރިކާގެ މަޝްހޫރު ލަވަކިއުންތެރިއެއް ކަމަށްވާ ކްރިސް ބްރައުން އާއި، ބޮކްސިންގ ކުޅުންތެރިއެއް ކަމަށްވާ ފްލޯއިޑް މޭވެދަރ އެ ޤައުމުގެ ވެރިރަށް ކެމްބެރާއަށް އެރުން މަނާކޮށްފައެވެ. 

އެ ޤައުމުގައި ކުރިން އަމަލުކުރާ އުސޫލުގެ ދަށުން ގެވެށި އަނިޔާގެ ކުށެއް ސާބިތުވެ 12 މަހަށް ވުރެ ގިނަ ދުވަހަށް ޖަލަށްލާން ހުކުމް ކޮށްފައިވާ ނަމަ، އެ މީހެއްގެ ވިޒިޓިންގ ވިސާ ކެންސަލް ކުރެވޭނެއެވެ.