ޖިންސީ ގޯނާގެ ކުށް ސާބިތުވި މައްސަލަ އަލްވޭސްގެ ފަރާތުން އިސްތިއުނާފު ކުރަން ނިންމައިފި

ބާސެލޯނާ އާއި ބްރެޒިލްގެ ކުރީގެ ޑިފެންޑަރު ޑެނީ އަލްވޭސްގެ މައްޗަށް ޖިންސީ ގޯނާ ކުރި ކަމަށް ސާބިތުވެ އިއްވި ޖަލު ޙުކުމް އިސްތިއުނާފު ކުރަން އޭނާ ނިންމައިފި އެވެ.

ސްޕެއިންގެ ކެޓަލޯނިއާގެ އެންމެ މަތީ ކޯޓުގައި އަލްވޭސް މައްޗަށް ކުށް ސާބިތުވެފައިވާއިރު، ހަތަރު އަހަރާ ބައިގެ މުއްދަތަަކަށް އަލްވޭސް ޖަލަށް ލުމަށް ކޯޓުން ވަނީ ޙުކުމް ކޮށްފަ އެވެ. އޭގެ އިތުރުން އަނިޔާ ލިބުނު ކަމަށް ބުނާ އަންހެން މީހާ އަށް ބަދަލުގެ ގޮތުގައި 150،000 (އެއް ލައްކަ ފަންސާސް ހާސް) ޔޫރޯ ނުވަތަ 163،000 (އެއް ލައްކަ ފަސް ދޮޅަށް ތިން ހާސް) ޑޮލަރު ދެއްކުމަށް ވެސް އަލްވޭސްގެ މައްޗަށް ވަނީ އަމުރުކޮށްފަ އެވެ.

ޙުކުމް އިއްވި ޝަރީއަތުގެ މަޖިލީހަށް ފަހު މީޑިއާ ތަކާ ވާހަކަ ދައްކަމުން އަލްވޭސްގެ ޤާނޫނީ ވަކީލު ބުނީ، ދައުލަތުގެ ފަރާތުން އެދުނީ ނުވަ އަހަރު ނުވަތަ 12 އަހަރުގެ ޖަލު ޙުކުމެއް އަލްވޭސްގެ މައްޗަށް އިއްވައި ދިނުމަށް ކަމަށެވެ. ނަމަވެސް، ހަތަރު އަހަރާ ބައިގެ މުއްދަތަކީ، ދައުލަތުން އެދުނު މިންވަރަށް ވުރެ ރަނގަޅު މުއްދަތެއް ކަމަށް އޭނާ ބުންޏެވެ. އެހެން ނަމަވެސް، އަލްވޭސްގެ ފަރާތުން އެ މައްސަލަ މަތީ ކޯޓުގައި އިސްތިއުނާފު ކުރާާނެ ކަމަށާއި، އެއީ އަލްވޭސްގެ އެއްވެސް ކުށެއް ނެތް ކަަމަށް ޤަބޫލު ކުރާތީ ކަމަށް ވެސް ވަކީލު ވަނީ ބުނެފަ އެވެ.

މީގެ އިތުރުން ވަކީލު ބުނީ އަލްވޭސްއާ ބައްދަލު ކުރަން ޖަލަށް ދާނެ ކަމަށާއި، އެއަށްފަހު ކަންކަމާމެދު ވާހަކަ ދެއްކުމަށްފަހު އިސްތިއުނާފަށް ހުށަހަޅާނެ ކަމަށެވެ. އަދި އުންމީދަކީ ވީއެންމެ އަވަހަށް އެ މަސައްކަތް ފެށުން ކަމަށާއި، އަލްވޭސް އަށް އިންސާފު ލިބޭނެ ކަމުގެ ފުރިހަމަ ޔަގީންކަން އޮތް ކަމަށް ވެސް ވަލީކު ވަނީ ފާހަގަކޮށްފަ އެވެ. އެއަށްފަހު ވަކީލު އިތުރު ވާހަކައެއް ދައްކައިފައެއް ނުވެ އެވެ. އޭނާ ބުނީ ކަންކަން ކުރިއަށްދާ މިންވަރަކުން މީޑިއާތަކާ ހިއްސާ ކުރަމުން ގެންދާނެ ކަމަށެވެ.

އަލްވޭސްގެ މައްޗަށް ދައުވާ އުފުލީ، 2022 އަހަރުގެ ޑިސެމްބަރު މަހު ބާސެލޯނާގެ ނައިޓު ކުލަބެއްގައި އަންހެނަކަށް ޖިންސީ ގޯނާ ކުރި ކަމުގެ ތުހުމަތުގަ އެވެ. އެ މައްސަލައާ ގުޅިގެން، މިދިޔަ ޖަނަވަރީ މަހުގެ 20 ވަނަ ދުވަހު އަލްވޭސް ހައްޔަރުކޮށްފައިވާއިރު، ކޯޓުން ވަނީ ޝަރީއަތް ނިމެންދެން ވެސް އޭނާ ބަންދުކޮށްފައި ބެހެއްޓުމަށް އަމުރު ކޮށްފަ އެވެ.