ކޮވިޑް-19ގެ ޕީޕީއީ، ޑައެޕަރއަށް!

ޢާންމު މުޖުތަމަޢުގެ އެންމެ ގިނަ ބައެއްގެ ސަމާލުކަން މިއަދު އެތަނަކަށް ހުއްޓިފައި އޮތް ޣައްޒާގެ ރަފަޙުގައި ހުރި ފަހާ ތަނެއްގެ ބޭރު ޒީނަތްތެރި ކޮށްފައި ވަނީ، ކައިވެނީގެ ޙަފުލާތަކުގައި އަންހެނުން ލާ އުޅޭ ފަދަ ހިތްގައިމު ހެދުންތަކެއްގައި ތިބި ޒުވާން އަންހެން ކުދިންތަކެއްގެ ތަސްވީރުތަކުންނެވެ. ފެހުގެ ޚިދުމަތް ދޭ އެ ތަނުގެ ތެރެއިން ފެނުނީ މުޅިން ތަފާތު މަންޒަރެކެވެ. ފެހުންތެރިންގެ މިއަދުގެ ޒިންމާއަކީ ނެޕީ ނުވަތަ ޑައެޕަރ ފެހުމެވެ. މިއީ ނިރުބަވެރި ޔަހޫދީންގެ ޤަތުލުޢާންމުގައި 4 މަހަށް ވުރެ ގިނަ ދުވަސް ގުނަމުން އަންނަ ޣައްޒާއިން މިހާރު އެއްވެސް ވަރަކަށް ލިބެން ނެތް ޛަރޫރީ އެތައް އެއްޗެއްގެ ތެރެއިން އެކައްޗެވެ.

2.3 މިލިއަން މީހުންގެ ޢާބާދީއެއް އޮތް ޣައްޒާގެ އެންމެން ކަހަލަ ގޮތަކަށް ރަފަޙުގައި ތޮއްޖެހިފައި ވާއިރު، ޑައެޕަރ ނުލިބުމުގެ މައްސަލައަކީ ތުއްތު ކުދިންނާއި އެކުދިންގެ މައިންބަފައިންނާ ބެލެހެއްޓުންތެރިންގެ ދިރިއުޅުމަށް ކުރިމަތިވެފައި އޮތް އިތުރު ތަކުލީފެކެވެ.

މިހާރު މުޅިން ޑައެޕަރ ފެހުމުގެ މަސައްކަތަށް ހުރިހާ ވަގުތެއް ހުސްކޮށްގެން ހިންގާ ފަހާ ތަނުގެ ވެރިޔާ، ޔާސިރު އަބް ޣަރާރާ ބުނި ގޮތުގައި، 1.5 މިލިއަން މީހުން، ރެފިއުޖީންގެ ގޮތުގައި ދިރިއުޅެމުން އަންނަ ރަފަޙުގައި ޑައެޕަރ އެއް ލިބެން ނެތް ކަމަށެވެ.

ފައްޗަކަށް އަތުރާފައިވާ ފަހާ ފޮށިތައް ދޮށުގައި ޑައެޕަރ ފެހުމުގެ މަސައްކަތުގައި އަންހެންވެރިން އަވަދިނެތި އުޅެމުން ދިޔަތަނާ ކައިރީގައި ހުރެ، ވާހަކަ ކުރިއަށް ގެންދަމުން ޔާސިރު ވަނީ، ރެޑީމޭޑް ޑައެޕަރގެ އަގަށް އައިސްފައިވާ ބޮޑު ބަދަލުވެސް ފާހަގަ ކޮށްފައެވެ. އެ އަގަކީ، މިއަދު ކައިބޮއެ ހަދާލާނެ ފަދައެއްވެސް ނެތް ޣައްޒާގެ ޢާއިލާތަކަށް އަތްފޯރާ ވަރަށް ވުރެ މާ މަތީގައި ހުރި އަގުތަކެކެވެ.

ޔާސިރުގެ ފަހާ ތަނުގައި ޑައެޕަރ ތައްޔާރު ކުރަނީ، ކޮވިޑް-19ގެ ބަލިމަޑުގައި ބޭނުންކޮށްފައި ހުރި ޕީޕީއީތައް ރީސައިކަލްކޮށްގެންނެވެ. އެކަން އެހެން އޮތް ނަމަވެސް، މި މަސައްކަތުން ޢާއިލާތަކަށް ކޮންމެވެސް ކަހަލަ ހަމަޖެހުމެއް ލިބޭނެ ކަމަށް ޔާސިރު އުންމީދު ކުރެއެވެ.

ގެދޮރު ގެއްލިފައިވާ އީނާސް އަލް-މަސްރީއަކީ ތުއްތު ތުއްތު އެއްމާބަނޑު ދެބެންނާއި، ކުޑަ ތަންކޮޅެއް ދޮށީ އަންހެން ދަރިއެއްގެ މަންމައެވެ. އެ 3 ކުދިންނަށްވެސް ޑައެޕަރ ބޭނުންވެއެވެ. އެއްމާބަނޑު ދެބެންގެ ތެރެއިން އެއްކުއްޖަކު އޮތީ އެތެރެ ފެންނަ ތުނި ޕްލާސްޓިކް ކޮތަޅަކުން ހަދާފައި އޮތް 'ސޯޓު ކޮޅެއް' ލައްވާފައެވެ. އެ ސޯޓުވެސް އެ ކުއްޖާއަށް ބާރެވެ. އީނަސް ސޯޓު ލައްވަމުން ދިޔަ އިރު، ޓެންޓެއްގެ ބިންމަތީގައި އޮތް އެ ކުއްޖާ ދިޔައީ ރޮމުންނެވެ.

ހާނީ ޞުބްޙްއަކީވެސް ހަމަ އެފަދަ ޙާލެއްގައި ހުރި ބައްޕައެކެވެ. އެ ބައްޕައަށްވެސް ޚިޔާރު ކުރަން ޖެހިފައި އޮތް، ނިންމަން ދަތި ނިންމުމެކެވެ.

ޔާސިރު ފަދަ ޣައްޒާގެ ބަޠަލުންގެ ގަދަ ހިތްވަރާއި ސާބިތު ކަމަކީ، މިއަދު މުޅި ދުނިޔެވެސް ދަސްކުރަން ޖެހޭ ކަމެކެވެ. އަޚުންނާއި އުޚުތުންގެ ޙައްޤަށްޓަކައި، ޖާނާއި މާލުން ޤުރުބާން ވަމުން އެންމެ މުއްސަނދި، މަހުޖަނުންނަށްވެސް މިސާލު ދައްކަމުންނެވެ.