ލިވަޕޫލްގެ ކޯޗުކަމުގެ މަޤާމުން ވަކިވުމަށްފަހު، އެއް އަހަރު ދުވަސް ވަންދެން ޔާގަން ކްލޮޕް އެއްވެސް ޓީމަކާ ހަވާލު ނުވާނެ ކަަމަށް އޭނާގެ އެޖެންޓް ބުނެފި އެވެ.

އުމުރުން 56 އަހަރުގެ ކްލޮޕް ލިވަޕޫލްގެ ކޯޗުކަމާ ހަވާލުވީ 2015 ވަނަ އަހަރު އެވެ. އޭގެ ފަހުން ލިވަޕޫލަށް ގިނަ ކާމިޔާބުތަކެއް ހޯދައި ދިނުމަށްފަހު، މިއަހަރު ކްލޮޕް ނިންމީ މިހާރު ކުރިއަށްދާ ސީޒަނަށްފަހު ލިވަޕޫލްގެ ކޯޗުކަން ދޫކޮށްލުމަށެވެ. ލިވަޕޫލްގެ ކޯޗުކަން ދޫކޮށްލުމަށްފަހު، ކުރިމަގުގައި ކަންތައް ކުރާނެ ވަކި ގޮތެއް ކްލޮޕް ހާމަކޮށްފައެއް ނުވެ އެވެ.

ބައެއް މީޑިއާ ތަކުގައި ބުނެފައިވާ ގޮތުން، ޖަރުމަނުގެ ބަޔާން މިއުނިކްގެ ކޯޗުކަމަށް ގެންނަން އެ ކުލަބުން ބޭނުންވާ ކޯޗުންގެ ލިސްޓުގައި ކްލޮޕްގެ ނަން ހިމެނެ އެވެ. އެއީ، އެ މަގާމުގައި މިހާރު ހުރި ޖަރުމަނުގެ ތޯމަސް ޓުޗެލް ސީޒަން ނިމުމާއެކު، އެ ކުލަބު ދޫކޮށްލަން ނިންމުމުންނެވެ. ނަމަވެސް ކްލޮޕްގެ އެޖެންޓް ވަނީ އެ ވާހަކަތައް ދޮގު ކޮށްފަ އެވެ. އޭނާ ބުނީ، ލިވަޕޫލް ދޫކޮށްލުމަށްފަހު، އެއް އަހަރު ވަންދެން ކްލޮޕް އެއްވެސް ކުލަބަކާއި ނުވަތަ ޤައުމީ ޓީމަކާ ވެސް ހަވާލު ނުވާނެ ކަމަށެވެ. އަދި އެއީ ބަދަލެއް ނާންނާނެ ނިންމުމެއް ކަމަށް ވެސް އޭނާ ބުންޏެވެ.

ކްލޮޕް އޭނާގެ ކޯޗިން ކެރިއަރު ފެށީ 2001 ވަނަ އަހަރު މައިންޒުންނެވެ. އެ ކުލަބުގައި ހަތް އަހަރު މަަސައްކަތް ކުރުމަށްފަހު، 2008 ވަނަ އަހަރު ކްލޮޕް ހަވާލުވީ ޖަރުމަނުގެ ބޮރޫޝިއާ ޑޯޓްމަންޑާ އެވެ. ޑޯޓްމަންޑުގައި ކާމިޔާބު މަސައްކަތްތަކެއް ކުރުމަށްފަހު، އިނގިރޭސި ޕްރިމިއާ ލީގުގެ ކޯޗުކަމާ ކްލޮޕް ހަވާލުވީ 2015 ވަނަ އަހަރު އެވެ. ކޯޗިން ކެރިއަރުގަައި ކްލޮޕް އެންމެ ކާމިޔާބު މަސައްކަތެއް ކުރީ ވެސް ލިވަޕޫލްގަ އެވެ. ލިވަޕޫލާ އެކު އޭނާ ވަނީ، އިނގިރޭސި ޕްރިމިއާ ލީގު، އެފްއޭ ކަޕް، ކަރަބޯ ކަޕް، އެފްއޭ ކޮމިއުނިޓީ ޝީލްޑު، ޔުއެފާ ޗެމްޕިއަންސް ލީގު، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ކާމިޔާބު ކޮށްފަ އެވެ.