ތަށި ހޯދައިދިނުމުން އައިވަރީ ކޯސްޓްގެ ކޯޗުގެ މަގާމު ދާއިމީކޮށްފި
20 ފެބުރުއަރީ 2024 | އަންގާރަ 10:11އޭނާ ޓީމާ ހަވާލުވީ ގްރޫޕް ސްޓޭޖަށް ފަހު
އައިވަރީ ކޯސްޓްގެ ރައީސް (މ) އާއި ކެޕްޓަން އަލައިން އަދި ކޯޗު ފައޭ
އެފްރިކަން ކަޕް އޮފް ނޭޝަންސްގެ ތަށި މި މަހު ކާމިޔާބުކޮށްދިނުމުން އައިވަރީ ކޯސްޓުން ވަގުތީ ކޯޗު އެމާސް ފައޭގެ މަގާމު ދާއިމީކޮށްފި އެވެ.
މިކަން ފުޓްބޯޅަ ފެޑަރޭޝަނުން އިއުލާނުކުރީ ކާމިޔާބީގެ އުފާފާޅު ކުރަން އެ ގައުމުގެ ރައީސް އަލައްސާނޭއާއެކު ބޭއްވި ބައްދަލުވުންތަކަށް ފަހު އެވެ.
ފައޭއަށް ގައުމީ ޓީމު ހަވާލުކުރީ މުބާރާތަށް ވަގުތު ކުޑަތަންވެފައިވަނިކޮށެވެ. އެއީ ކުރީގެ ކޯޗު ލުއިސް ގަސެޓް މަގާމުން ވަކިކުރުމުންނެވެ. އެއީ ޖެނުއަރީ މަހު ކުޅުނު ގްރޫޕް ސްޓޭޖުގެ މެޗުތަކުގެ ތިން މެޗުގެ ތެރެއިން އެންމެ މެޗަކުން މޮޅުވެ، މުބާރާތަށް ކަޓާފާނެހެން ހީވުމުންނެވެ.
ފައޭގެ ކޯޗުކަމުގައި އައިވަރީ ކޯސްޓް ވަނީ ދެވަނަ ބުރުގައި ދިފާއީ ޗެމްޕިއަން ސެނެގާލް ޕެނަލްޓީ ޖަހައިގެން ބަލިކޮށްފަ އެވެ. އަދި ކުއާޓާ ފައިނަލުގައި އެކްސްޓްރާ ޓައިމް ކުޅެގެން މާލީ ބަލިކުރީ އެ މެޗުގެ ގިނަ ވަގުތު 10 ކުޅުންތެރިންނާއެކު ކުޅެން ޖެހިފައި އޮއްވަ އެވެ.
އަދި މުބާރާތުގެ ސެމީ ފައިނަލުގައި އައިވަރީ ކޯސްޓް އަތުން ބަލިވީ ކޮންގޯ އެވެ. އެއަށްފަހު މުބާރާތުގެ ތަށި ކާމިޔާބު ކުރީ ފައިނަލުގައި ނައިޖީރިއާ ބަލިކޮށްފަ އެވެ.
