އެމްޑީޕީގެ ރައީސް ކަމަށް ކުރީގެ ޚާރިޖީ ވަޒީރު، ޝާހިދު ވާދަކުރައްވަނީ
18 ފެބުރުއަރީ 2024 | އާދީއްތަ 13:20މިވަގުތު އެމްޑީޕީގެ ރައީސްކަމުގެ މަގާމު ވަގުތީގޮތުން ފުރުއްވަމުން ގެންދަވަނީ، ކުރީގެ ރައީސް ސާލިހު
ނިމިދިޔަ ސަރުކާރުގެ ރާއްޖޭގެ ޚާރިޖީ ވަޒީރު އަދި އދ.ގެ އާންމު މަޖިލީހުގެ ކުރީގެ ރައީސް އަބްދުﷲ ޝާހިދު
މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ރައީސްކަމަށް ކުރިމަތިލައްވާނެކަން، ނިމިދިޔަ ސަރުކާރުގެ ރާއްޖޭގެ ޚާރިޖީ ވަޒީރު އަދި އދ.ގެ އާންމު މަޖިލީހުގެ ކުރީގެ ރައީސް އަބްދުﷲ ޝާހިދު އިއުލާންކުރައްވައިފިއެވެ.
މިވަގުތު ރާއްޖޭގެ ސިޔާސީ މައިދާނުގައި ހުންނެވި އެންމެ ތަޖުރިބާކާރު އެއް ބޭފުޅާކަމުގައިވާ ޝާހިދު، ރާއްޖޭގެ އެންމެ ބޮޑު ޕާޓީގެ ރައީސް ކަމަށް ކުރިމަތިލައްވާނެކަން އިއުލާންކުރެއްވީ އާދިއްތަ ދުވަހު އެކްސްގައި ކުރެއްވި ޕޯސްޓެއްގައެވެ.
އެކަން އިއުލާންކުރައްވަމުން ޝާހިދު ވިދާޅުވީ، މާތް ﷲގެ ވާގިފުޅާއެކު އެމްޑީޕީގެ ރައީސްކަމުގެ މަގާމަށް ކުރިމަތިލުމަށް ގަސްތުކުރައްވާ ކަމަށެވެ.
އަދި އައު ޖޯޝަކާއި ފޯރިޔަކާއެކު އެމްޑީޕީ ނުކުމެ، ރައްޔިތުން އެދޭ މިސްރާބަށް ރާއްޖެ އަލުން ގެންދިޔުމަށް އެމްޑީޕީގެ މެންބަރުން އެކުވެ އަތުގުޅުވާލަން ވެއްޖެކަން، ބަލައިލި ކޮންމެ ދިމާއަކުން މިއަދު ފެންނަން އޮތްކަމަށް ވިދާޅުވަމުން ޝާހިދު އެދިވަޑައިގަތީ އެ ޕާޓީގެ މެންބަރުންގެ ތާއީދު ޝާހިދަށް ދެއްވުމަށެވެ.
އަބްދުﷲ ޝާހިދު ފާހަކުރެވިފައިވަނީ ރައްޔިތުންގެ މަޖިލީހުގެ ކުރީގެ ރައީސްގެ އިތުރުން، ނިމިދިޔަ ސަރުކާރުގެ ރާއްޖޭގެ ޚާރިޖީ ވަޒީރުގެ ގޮތުގައި ހުންނަވައިގެން ކޮށްދެއްވި މަސައްކަތްތަކުގެ ސަބަބުންނެވެ. އެގޮތުން މިދިޔަ ސަރުކާރުގެ ޚާރިޖީ ސިޔާސަތުތަކަކީ މިހާތަނަށް ރާއްޖޭގެ ވެރިކަމެއްގައި އެކަށައެޅުނު އެންމެ ފުރިހަމަ ޚާރިޖީ ސިޔާސަތުގެ ގޮތުގައި، ރާއްޖޭގެ އިތުރުން ބޭރު ގައުމުތަކުގެ ފަރާތްތަކުން ވެސް ދެކެއެވެ.
މީގެ އިތުރުން، ޝާހިދު ވަނީ އދ.ގެ 76 ވަނަ އާންމު މަޖިލީހުގެ ރައީސްކަން ވެސް ކުރައްވާފައެވެ. ޝާހިދަކީ އެ މަގާމު ރާއްޖެއިން ފުރުއްވި ހަމައެކަނި ބޭފުޅާއެވެ.
އެމްޑީޕީގެ ރައީސްކަމުގެ މަގާމަށް ވާދަކުރައްވާނެކަން ޝާހިދު ނޫން އެހެން ބޭފުޅަކު އަދި އިއުލާން ކުރައްވައިފައެއް ނުވެއެވެ. މިވަގުތު އެމްޑީޕީގެ ރައީސްކަމުގެ މަގާމު ވަގުތީގޮތުން ފުރުއްވަމުން ގެންދަވަނީ ނިމިދިޔަ ސަރުކާރުގެ ރާއްޖޭ ރައީސްކަމުގެ މަގާމު ފުރުއްވި އިބްރާހީމް މުހައްމަދު ސާލިހެވެ.
އެމްޑީޕީގެ ރައީސަކު ހޮވަން ބާއްވާ އިންތިޚާބު މި އަންނަ މާރިޗު މަހުގެ ދެވަނަ ދުވަހު ބާއްވަން ނިންމައި، އެ މަގާމަށް ކުރިމަތިލާން އެދޭ މެންބަރުން މި މަހުގެ 20 ވަނަ ދުވަހުގެ 14:00އާ ހަމައަށް ކުރިމަތިލުމަށް ވަނީ ހުޅުވައިލައިފައެވެ.
