ކުޅުދުއްފުށީގައި ޕެންޓަގްރާމް ހިރަފުސް ކަޕް ފަށައިފި

ކުޅުދުއްފުށީގައި 10 ވަނަ ޕެންޓަގުރާމް ހިރަފުސް ކަޕް ފަށައިފި އެވެ.

ކޮންމެ އަހަރެއްގެ ރަމަޟާން މަހު ހިރަފުސް ދަނޑަށް ކުޅެންދާ ކުދިންނަށް ހުޅުވާލައިގެން ބާއްވާ މި މުބާރާތް ފެށީ އަންގާރަ ދުވަހު އެވެ.

މި މުބާރާތް އެހެން އަހަރުތަކުގައި ރަމަޟާން މަހަށް ފަހު ބާއްވާ އިރު، މިފަހަރު މުބާރާތް ފެށުން ލަސްވީ މިނިވަން ޗެމްޕިއަންޝިޕާ ގުޅިގެން ކަމަށް މުބާރާތް އިންތިޒާމުކުރާ ފަރާތުން ބުނެއެވެ.

ޖުމްލަ 190 ކުޅުންތެރިން ހިމެނޭ މި މުބާރާތުގައި ޖުމްލަ 10 ޓީމު ވާދަކުރާއިރު، މި މުބާރާތް ކުރިއަށް ދަނީ ޓީމުތައް ދެ ގުރޫޕަކަށް ބަހާލައިގެން ކޮންމެ ގުރޫޕަކުން ވެސް އެންމެ ގިނަ ޕޮއިންޓް ހޯދާ ދެ ޓީމު ސެމީ ފައިނަލަށް ދަތުރު ކުރާ ގޮތަށެވެ.

އޯގަސްޓް 1 އިން 25 އަށް ކުރިއަށްދާ މި މުބާރާތުގައި އަންގާރަ ދުވަހު ކުޅުނު މެޗުގައި ބައްދަލުކުރީ ހެންކާސް އަދި ސްކާލެޓް އެވެ. މި މެޗު 4-8 ގެ ނަތީޖާއަކުން ކާމިޔާބުކުރީ ސްކާލެޓްއިންނެވެ. މެޗުގެ މޮޅު ކުޅުންތެރިޔަކަށް ހޮވިފައިވަނީ ސްކާލެޓްގެ ހުސައިން އަބްދުލް ރަޝީދު (ބިގޭ) އެވެ. އޭނާ ވަނީ މެޗުގައި ހަތަރު ލަނޑު ޖަހާފަ އެވެ. މީގެއިތުރުން އެ ޓީމުގެ ސިނާން އިބްރާހިމް (ސިންނެ) ތިން ލަނޑު ޖެހިއިރު، އަނެއް ލަނޑު ޖަހައިދިނީ ހުސައިން އާދަމް (ތުޅާ) އެވެ.

މެޗުގައި ހެންކާސްގެ އަންވަރު އާދަމް ދެ ލަނޑު ޖެހިއިރު، އެ ޓީމުގެ އަނެއް ދެ ލަނޑު ޖެހީ އާދަމް އިލްހާމް (އިއްލެ) އާއި އިބްރާހިމް ހުސައިން އެވެ.

މި މުބާރާތުގައި ބުދަ ދުވަހު ކުޅޭ މެޗުގައި ބައްދަލު ކުރާނީ ފެމިލީ ބޭކާސް އަދި ސްޕީޑް އެވެ.