އަހަރެއްގެ މައްޗަށް ދައުލަތުން ޖަލުތަކަށް 400 މިލިއަން ރުފިޔާ ހަރަދު ކުރޭ، މަސައްކަތް ކުރަނީ ސެންޓްރަލް އެއް ޖަލު ގާއިމްކުރަން: މިނިސްޓަރު އިހުސާން
17 ފެބުރުއަރީ 2024 | ހޮނިހިރު 07:45ޖަލުތައް ހެދިފައިވަނީ ގައިދީންނަށް އެންމެ ރަނގަޅު ގޮތުގައި ފަރުވާ ދެވޭ ގޮތަކަށް ނޫން
ޖަލު އޮފިސަރެއް ގައިދީއަކަށް ޚިދުމަތްދެނީ
އަހަރެއްގެ މައްޗަށް ދައުލަތުން ޖަލުތަކަށް 400 މިލިއަން ރުފިޔާ ހަރަދު ކުރާ ކަމަށާއި، މަސައްކަތް ކުރަމުންދަނީ ސެންޓްރަލް އެއް ޖަލު ގާއިމް ކުރަން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
ހޯމް މިނިސްޓްރީއާއި އެ މިނިސްޓްރީގެ ދަށުން ހިންގާ އިދާރާތަކުންގެ މަސައްކަތްތަކާއި ގުޅޭގޮތުން މައުލޫމާތު ދިނުމަށް ދާދިފަހުން ބޭއްވި ނޫސްވެރިންގެ ބައްދަލުވުމުގައި މިނިސްޓަރު އިހުސާން ވިދާޅުވީ ސެންޓްރަލް ޖެއިލްގެ ކޮންސެޕްޓު މަސައްކަތް ކުރަމުންދާ ކަމަށެވެ.
ރާއްޖޭގެ އެކި ސަރަހައްުދުތަކުގައި ގާއިމްކުރެވިފައިވާ ޖަލުތަކަށް އިޝާރާތް ކުރައްވައި މިނިސްޓަރު އިހުސާން ވިދާޅުވީ އެ ޖަލުތައް ހެދިފައިވަނީ ގައިދީންނަށް އެންމެ ރަނގަޅު ގޮތުގައި ފަރުވާ ދެވޭ ގޮތަށް ނޫން ކަމަށެވެ. ނަމަވެސް މިހާރު މަސައްކަތް ކުރަމުންދަނީ ގައިދީން ޖަލަށް ވެއްދޭ ފުރަތަމަ ދުވަހުން ފެށިގެންވެސް އެމީހުން އަނބުރާ މުޖުތަމައުއަށް ނެރުމަށް ކުރަންޖެހޭ މަސައްކަތްތައް ކުރެވޭނެ ގޮތަށް ކަމަށް މިނިސްޓަރު އިހުސާން ވިދާޅުވިއެވެ.
އެގޮތުން އެފަދަ ފުރިހަމަ ޖަލެއް ގާއިމްކުރުމުގެ މަސައްކަތް ކުރުމަށް ކޮންސެޕްޓް އެކުލަވާލުމުގެ މަސައްކަތް ކުރަމުންދާ ކަމަށް މިނިސްޓަރު އިހުސާން ވިދާޅުވިއެވެ. އަދި ވިދާޅުވީ އެކޮންސެޕްޓްގެ މަސައްކަތް ނިމުމުން ބިން ވެސް ކަނޑައެޅިގެންދާނެ ކަމަށެވެ.
މިނިސްޓަރު އިހުސާން ވިދާޅުވީ މިސަރުކާރުގެ ވިސްނުމަކީ ހަރަދު ކުޑަ އެއް ޖަލު ހެދުމަށްފަހު އެ ޖަލުން މީހާއަށް އަޅާލުމާއި، ދޭން ޖެހޭ ފަރުވާ ދިނުން ކަމަށެވެ. އަދި ވިދާޅުވީ ފުރިހަމަ ޚިދުމަތްތައް ދެވޭ ސެންޓްރަލް އެއް ޖަލު ގާއިމްކުރުމަށް ބޭރުގެ ކަމާބެހޭ މާހިރުން ވެސް ތާއީދުކުރާ ކަމަށެވެ.
އެހެންކަމުން ކުރިއަށް އޮތްތަނުގައި މިމަސައްކަތް ކުރުމަށް ފަންޑު ލިބޭނެ ކަމަށް މިނިސްޓަރު އިހުސާން ވިދާޅުވިއެވެ.
