ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވެރިކަމަށް ވަޑައިގެންނެވީ އެއްވެސް ރައްޔިތަކު ބާކީ ނުކުރާނެ ކަމުގެ ސިޔާސަތާއެކުއެވެ. ކޮންމެ ޕާޓީއެއް ނަމަވެސް އެ ރައްޔިތަކަށް ލިބެންޖެހޭ ރައްކާތެރިކަމާއި، ހައްގުތައް ލިބޭނެ ކަމުގެޔަގީންކަން އެމަނިކުފާނު ދެއްވިއެވެ. ހިޔާލު ފާޅުކުރުމުގެ ފުރިހަމަ މިނިވަންކަން ލިބޭނެ ކަމަށް ވިދާޅުވެފައިވެއެވެ. ކުރީ ސަރުކާރުތަކުގައި ފާޅުކުރާ ހިޔާލެއްގެ ސަބަބުން ވަޒީފާގެ ބިރުވެރިކަން ކުރިމަތިވި ނަމަވެސް އެމަނިކުފާނުގެ ވެރިކަމުގައި އެފަދަ ކަންކަން ނުހިނގާނެ ކަމަށް ރައްޔިތުންނަށް ވައުދުވެވަޑައިގެންނެވިއެވެ.

ނަމަވެސް ވެރިކަމަށް ވަޑައިގަންނަވާ މާގިނަ ދުވަހެއް ނުވެއެވެ. ކުރަންޖެހޭ މަސައްކަތެއް ނެތް ކަމަށް އަންގާ ރަށްރަށުގެ ޕްރޮޖެކްޓްތަކުގައި މަސައްކަތް ކުރަމުންދިޔަ ގިނަ އަދަދެއްގެ ފެނަކާގެ މުވައްޒަފުން މިހާރު ވަނީ ވަޒީފާއިން ވަކިކޮށްފައެވެ. މީގެ ތެރޭގައި ޕްރޮޖެކްޓްތައް ހުއްޓުވާތީ އެކަމުގެ ކަންބޮޑުވުންފާޅު ކުރި މުވައްޒަފުން ވަނީ މުސާރަ ނުލިބޭ ގޮތަށް ސަސްޕެންޑްކޮށްފައެވެ. ބައެއް މުވައްޒަފުންނަށް ވާޒީފާގައި ވާނުވާގައި ތިބޭތާ މިހާރު ވަނީ އެއްމަސްވެފައެވެ. އަދި މިސަރުކާރަށް ތާއީދުނުކުރާތީ، އެއްވެސް މަސައްކަތެއް ހަވާލުނުކޮށް ނުވަތަ މަސްއޫލިއްޔަތެއް ނެތި ވެސް ބައެއް މުވައްޒަފުން އެކަހެރިކޮށްފައި އެބަތިއްބެވެ.

މި ސަރުކާރުން ވަޒީފާއަށް ބިރު ދެއްކުމުގެ ގޮތުން މިކަންކަން ފާޅުކަން ބޮޑު ގޮތެއްގައި ކުރި ނަމަވެސް ފެނަކައިން މިކަން ދޮގުކުރެއެވެ. މުވައްޒަފުން ވަޒީފާއިން ވަކިނުކުރާ ކަމަށް އެ ކޯޕްރޭޝަނުން ބުނެއެވެ. މިފަދަ މައްސަލަތަކާއި ގުޅޭގޮތުން ފެނަކައިން އެންމެފަހުން ބުނެފައިވަނީ ކުރާނެ މަސައްކަތެއް ނެތުމުން މުވައްޒަފުންގެ ކޮންޓްރެކްޓްތައް ބާތިލް ކުރަމުންދާ ކަމަށެވެ. ނުވަތަ ކޮންޓްރެކްޓްގެ މުއްދަތު ހަމަވެފައިވާތީ އައުނުކުރަން ނިންމާފައިވާ ކަމަށެވެ. ނަމަވެސް އެ ރަށްރަށުގެ ތަރައްގީގެ މަޝްރޫއުތަކެއް ނުނިމެއެވެ. މުވައްޒަފުންނަކީ ފާއިތުވި 5 އަހަރު ނުވަތަ 6 އަހަރު ފެނަކާގެ ވަޒީފާއަށް ބަރޯސާވެގެން ރަށުގައި ދިރިއުޅުނު މުވައްޒަފުންނަށްވާއިރު، މިގޮތަށް އަމަލުކުރުމުގެ ސަބަބުން އެއާއިލާތަކަށް އެ ލިބެނީ ވަރަށް ބޮޑު ނިކަމެތި ކަމެކެވެ.

އެގޮތުން މިފަހުން ހިނގާދިޔަ އެއް ހާދިސާއަކީ މ. ރަތްމަންދޫގައި ކުރިއަށް ގެންދިޔަ ފެނާއި ނަރުދަމާގެ މަޝްރޫއު ހުއްޓުވުމާއި ގުޅިގެން ކަންބޮޑުވުން ފާޅުކުރި ފެނަކަ މުވައްޒަފެއް ސަސްޕެންޑްކުރި ހާދިސާއެވެ. 18 ޖެނުއަރީ މުސާރަ ނުލިބޭ ގޮތަށް ސަސްޕެންޑް ކުރިއިރު އަދިވެސް އެޒުވާނާ ހުރީ މުސާރަ ނުލިބޭ ގޮތަށް ސަސްޕެންޑްކޮށްފައެވެ. މައްސަލައަކަށްވީ އެކަން ކުށްވެރިކޮށް ސޯޝަލް މީޑިއާގައި އެކަން ހިއްސާކުރެމެވެ. ނަމަވެސް އެމަޝްރޫއަކީ ނުހަނު ބޮޑަށް ރައްޔިތުން ބޭނުންވާ ޚިދުމަތެކެވެ. ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި 90 އިންސައްތަ މަސައްކަތް ނިންމާފައިވާ މަޝްރޫއެކެވެ. މަޝްރޫއުގެ ބޮޑު ބައެއްގެ މަސައްކަތް ނިމިފައިވަނިކޮށް ސަރުކާރުން އެމަސައްކަތް ހުއްޓުވުމުން ކަންބޮޑުނުވާނެ ރައްޔިތެއް ނުހުންނާނެއެވެ. ފަހަރުގައި ވަޒީފާގެ ބިރަށް މިއަދު ބައެއް މީހުން އެއްޗެއް ނުބުނެ ތިބެފާނެއެވެ.

މީގެ އަނެއްކޮޅު ވެސް މިހާރު ދަނީ ފެންނަމުންނެވެ. މިސަރުކާރަށް ތާއީދުކުރާ މީހުންނަށް ދަނީ ވަޒީފާތައް ދެމުންނެވެ. އެގޮތުން ރަށްރަށުގެ ފެނަކަ ބްރާންޗުތަކުން ސަރުކާރަށް ތާއީދުކުރާ އާއިލާތަކުގެ މެންބަރުންނަށް ފެނަކައިން ވަޒީފާތައް މިހާރު ވެސް ހަމަޖައްސާދީފައިވާ އަދަދު މަދުނުވާނެ ކަމަށް ބައެއް ސިޔާސީ ބޭފުޅުން ވިދާޅުވެފައިވެއެވެ. މީގެ އިތުރުން ފެނަކާގެ ޔުނީފޯމްގައި ބައެއް މުވައްޒަފުން ސަރުކާރުގެ އިސްބޭފުޅުން އެރަށަކަށް ވަޑައިގެންނެވުމުން މަރުހަބާ ދެންނެވުމަށް ވެސް އަމަލީ ގޮތުން ވެސް ދަނީ ހަރަކާތްތެރިވަމުންނެވެ.

އެހެންކަމުން މުވައްޒަފުން ސިޔާސީ ކަންކަމުގައި ބައިވެރިނުކުރާނެ ކަމަށް ވައުދުވެގެން އައި ސަރުކާރުން އަމަލުކުރަމުން މިދަނީ ދިމާ އިދިކޮޅަށްނޫންތޯއެވެ. ސަރުކާރާއި އިދިކޮޅަށް ފާޅުކުރާ ހިޔާލަކާއި ގުޅިގެން ފެނަކާގެ މުވައްޒަފުން ސަސްޕެންޑްކުރާއިރު، އަނެއްބައި މުވައްޒަފުން ޔުނީފޯމްގައި ސިޔާސީ ކަންކަމުގައި ހަރަކާތްތެރިވުން މިސަރުކާރުން މިވަނީ ބަލައިގަނެފައެވެ. މިގޮތަށް މިކަން ހިނގާނަމަ ވަޒީފާގެ ބިރަށް ވެސް މިސަރުކާރަށް ތާއީދުކުރާ ވަރަށް ގިނަ މުވައްޒަފުން ފެނަކާގައި ތިބޭނެ ކަމަށް ބައެއް އާއްމު ރައްޔިތުން ދަނީ ބުނަމުންނެވެ.