ވިކްޓްރީ ބަލިކޮށް، ދެވަނަ ޑިވިޝަންގެ ޗެމްޕިއަންކަން މަސްއޮޑި ހޯދައިފި
16 ފެބުރުއަރީ 2024 | ހުކުރު 13:53މަސްއޮޑި ކުޅުނު ހުރިހާ މެޗެއްވެސް ކާމިޔާބުކޮށްފި
ދެވަނަ ޑިވިޝަންގެ ޗެމްޕިއަން މަސްއޮޑި ސްޕޯރޓްސް ކްލަބް
ވިކްޓްރީ ބަލިކޮށް, ދެވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން މަސްއޮޑި ސްޕޯރޓްސް ކްލަބުން ހޯދައިފިއެވެ.
މިއާއެކު މަސްއޮޑި އަށް ވަނީ ދެ އުފާ ލިބިފައެވެ. މެޗަށް ނިކުއިތްއިރު ފުރަތަމަ ޑިވިޝަނަށް ޕްރޮމޯޓްވުމުގެ އުފާ ލިބިފައި އޮތް މަސްއޮޑިން ފައިނަލްގައި ވިކްޓްރީ ބަލިކުރުމުން ސައްތައިން ސައްތަ ރެކޯޑަކާއެކު މުބާރާތުގެ ތަށިވެސް ވަނީ ލިބިފަ އެވެ. މިއީ ދެވަނަ ޑިވިޝަންގައި މަސްއޮޑި ވާދަކުރި ފުރަތަމަ ފަހަރެވެ. ކުޅުނު ހުރިހާ މެޗެއް ކާމިޔާބުކޮށް ފައިނަލަށް ދަތުރުކުރި ޓީމުން, ފައިނަލްގައި ވިކްޓްރީ ބަލިކުރީ 3-2 ނެވެ.
މެޗުގައި ފުރަތަމަ ލަނޑު ޖަހާ ލީޑް ނެގީވެސް މަސްއޮޑިންނެވެ. އެއީ މުބާރާތުގައި މޮޅަށް ކުޅުނު ކެޕްޓަން އިބްރާހީމް ވަހީދު (އިއްބެ) ޖެހި ލަނޑުންނެވެ. އޭގެފަހުން އޭނާ ފޮނުވާލި ބޯޅައެއްގޯލްގެ ދަނޑިއަށްވެސް އަމާޒުވި އެވެ. މެޗުގައި ދެވަނަ ލަނޑެއް ޖަހާ އިތުބާރު ހޯދީވެސް މަސްއޮޑި ސްޕޯރޓްސް ކްލަބުންނެވެ. އެއީ ހުސައިން ޝަރީފް ޖެހި ލަނޑުންނެވެ. އެކަމަކު ވިކްޓްރީން ވަނީ ފަހަތުން އަރާ ދެ ލަނޑު ޖަހާ ނަތީޖާ ހަމަހަމަ ކޮށްފައެވެ. ވިކްޓްރީގެ ފުރަތަމަ ލަނޑު ޖެހީ ހުސައިން ނިޔާޒު މުހައްމަދު (ބޮކުރީ) އެވެ. ނަތީޖާ ހަމަހަމަކުރީ ދެވަނަ ހާފްގައި ގައުމީ ޓީމްގެ ކުރީގެ ކެޕްޓަން އަކްރަމް އަބުދުލްޣަނީ އަކްރަމް ޖެހި ލަނޑުންނެވެ.
ޕެނަލްޓީއަށް ދާނެ ކަމަށް ބެލެވުނު ފައިނަލް މެޗު ކާމިޔާބުކޮށް މަސްއޮޑިން ތަށި ޔަގީންކުރީ އޮޑީލީ ޗިލީ ފެލިކްސް އެވެ. އޭނާ މަސްއޮޑި މޮޅުކޮށްދިން މުހިއްމު ލަނޑު ޖެހީ މެޗުގެ އިތުރު ވަގުތުގައެވެ. މަސްއޮޑި ފުރަތަމަ ޑިވިޝަނަށް ޕްރޮމޯޓް ކޮށްދީ, ދެވަނަ ޑިވިޝަންގެ ތަށި ހޯދައިދިނީ ކޯޗު މުހައްމަދު އާތިފް އެވެ.
