ޝައުބާން މަސް ވަރަށް ޚާއްސަ، ނޭނގެއޭ ބުނެ ބަރަކާތާއި ރަޙްމަތުގެ ދުވަސްތައް ނަގާނުލާ: ޚުތުބާ
16 ފެބުރުއަރީ 2024 | ހުކުރު 08:10ޝައުބާން މަހު ސުންނަތް ރޯދަ ހިފުމަކީ، އެދެވިގެންވާ ކަމެއް
މިސްކިތުގައި ބަޔަކު ހުކުރު ޚުތުބާ އަޑު އަހަނީ
ޝައުބާން މަހު ހެޔޮ އަމަލުތައް ކުރުން އިތުރުކުރަންޖެހޭ ކަމަށާއި ނޭނގެއޭ ބުނެ ބަރަކާތާއި ރަޙްމަތުގެ ދުވަސްތައް ނަގައި ނުލުމަށް ހުކުރު ޚުތުބާގައި ގޮވާލައިފިއެވެ.
ޝަައުބާން މަހާއި ހެޔޮ އަމަލުކުރުން މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ޝައުބާން މަހުގެ ހަނދު ފެނުމާއެކު ކޮންމެ މުސްލިމެއްގެ ހިތަށް ވެރިވާނީ، ރޯދައިގެ މަތިވެރިކަމާއި، ރޭ އަޅުކަމާއި، ގުރްއާން ކިޔެވުމާއި، އިއުތިކާފު ކުރުމާއި ހެޔޮއަމަލުތައް ކަމަށެވެ. ސަވާބާއި، ރަހްމަތުން ފުރިގެންވާ މަހަކަށްވުމާއެކު ރަމަޟާން މަހަށް ތައްޔާރުވާ މަހެއްކަމުގައި އެ މަސް ވާ ކަމަށެވެ. އެއީ، ރޯދައިގެ މަތިވެރިއަޅުކަމުގެ ސަބަބުން، ޝައިޠާނާގެ ކަސްތަޅުތަކުން ތިމާ ސަލާމަތްވުމަށާއި ހަވާނަފްސުގެ އެދުންތަކުން ނަޖާވެ، ވަހުމްތަކާއި ވަސްވާސްތަކާ ދުރުހެލިވެ، ސީދާ ވުމަށް ލިބޭ އަގުހުރި ފުރުސަތެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ރަމަޟާން މަހުގެ ރޯދަހިފުމަކީ، ކޮންމެ ދުވަހަކު ކުރާ އަޅުކަމަކަށްވެފައި، އެއަޅުކަމަށް ތައްޔާރުވުމަށް ހަށިގަނޑާއި ނަފްސު ހޭނުވުމަކީ ކޮންމެހެން ބޭނުންކަމެކެވެ. އެހެންކަމުން ޝައުބާން މަހު ސުންނަތް ރޯދަ ހިފުމަކީ، އެދެވިގެންވާ ކަމެއް ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ މުސްލިމުންނަކީ ހަމައެކަނި ބޭރުފުށުން އިސްލާމްކަން ފާޅުކޮށްގެން އުޅެންޖެހޭ ބައެއް ނޫން ކަމަށާއި، މުސްލިމުންނަކީ އަގީދާއާއި އަމަލުން މުސްލިމުންނަށް ވާންޖެހޭ ބައެއް ކަމަށެވެ. އަދި ހަމައެކަނި ބޭރުފުށުން އިސްލާމްކަން ފާޅުކޮށްގެން އުޅޭބަޔަކީ މުނާފިގުން ކަމަށް ޚުތުބާގައި ބުނެފައިވެއެވެ. ޚުތުބާގައި ބުނީ އިސްލާމްދީނުގެ ހުކުމްތަކާއި ދަރުސްތައް އަޑުއަހައި ތިމާގެ އަމިއްލަ ނަފްސު އިސްލާމީ އިލްމުން މުއްސަނދިކުރަންޖެހޭ ކަމަށެވެ.
މީގެ އިތުރުން ޚުތުބާގައި ބުނީ ސިއްހީ ގޮތުންނާއި އުމުރުގެ ގޮތުން، އެކިމީހުންގެ ހާލަތު ތަފާތު ކަމަށެވެ. އެހެންކަމުން އެމީހަކަށް ކުޅަދާނަވީ މިންވަރަކުން ހެޔޮ އަމަލު ކުރުމުގައި ދެމިހުރުމަށް ޚުުތުބާގައި ގޮވާލާފައިވެއެވެ. އަދި މާތްﷲގެ ހަސްރަތުގައި އެންމެ ހެޔޮކަން ބޮޑު އަމަލަކީ، ދެމިހުންނަނިވި ގޮތުގައި ކުރެވޭ އަމަލު ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ތިމާގެ އުމުރުގެ ދުވަސްތަކަކީ ކިހާދުވަހެއްކަމެއް އެއްވެސް މީހަކަށް އެނގިގެން ނުވާ ކަމަށާއި، ނަމަވެސް އުމުރުގެ ދުވަސްތަކަށް ނިމުމެއް އަންނާނެކަން ކަށަވަރުވާ ކަމަށެވެ.
ސުވަރުގެއަށް ދިޔުމަށް މަގުކޮށާކަމުގައި ވާނަމަ، ކީރިތި ގުރްއާނާއި މާތް ނަބިއްޔާمُحَمَّدُ صَلَّى اللهُ عَلَيْهِ وَسَلَّمَގެ ސުންނަތަށް އަމަލު ކުރުމަށް ޚުތުބާގައި ވަނީ ގޮވާލާފައެވެ. އަދި ނޭނގެއޭ ބުނެ ބަރަކާތާއި ރަޙްމަތުގެ ދުވަސްތައް ނަގައި ނުލުމަށް ޚުތުބާގައި ވަނީ ނަސޭހަތްތެރިވެފައެވެ.
