ޔުއެފާ ޗެމްޕިއަންސް ލީގުގެ ގަދަ 16 ވަނަ ބުރުގެ ފުރަތަމަ ލެގުގައި ޖަރުމަނުގެ ވަރުގަދަ ބަޔާން މިއުނިކާ ދެކޮޅަށް ކުޅުނު މެޗުން، ލާޒިއޯ މޮޅުވެއްޖެ އެވެ.

ބުދަ ދުވަހުގެ ރޭ ލާޒިއޯގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. އެ މެޗަށް ކުރިމަތިލީއިރު ވެސް، ބަޔާން އޮތީ ވަރަށް ބޮޑަށް ޕްރެޝަރުގަ އެވެ. އެއީ ޖަރުމަނު ލީގުގައި ބަޔާ ލެވަކޫސަނާ ދެކޮޅަށް ކުޅުނު މެޗުން ބަލިވެ، ލީގު ރޭހުގައި އެ ޓީމު ފަހަތަށް ދިޔުމުންނެވެ.

ބަޔާނާ ދެކޮޅަށް ކުޅުނު މެޗުން ލާޒިއޯ މޮޅުވީ ދެ ވަނަ ހާފުގައި ޖެހި ލަނޑުންނެވެ. ލާޒިއޯ އިން ލަނޑު ޖެހުމުގެ ކުރިން ބަޔާންގެ ޑަޔޯޓް އުޕަމަކާނޯ އަށް ވަނީ ސީދާ ރަތް ކާޑު ދައްކައި، ދަނޑުން ފޮނުވާލައިފަ އެވެ. އެއީ ބަޔާންގެ އޭރިޔާ ތެރެއިން ލާޒިއޯގެ ކުޅުންތެރިޔަކަށް އޭނާ ކުރި ފައުލަކަށް ދެއްކި ކާޑެވެ. ފައުލާ ގުޅިގެން ލިބުނު ޕެނަލްޓީ ކާމިޔާބުކޮށް، ލާޒިއޯ އަށް ކުރި ހޯދައިދިނީ ސިރޯ އިމޮބައިލް އެވެ.

މޮޅާއެކު ލާޒިއޯ އިން ވަނީ ކުއާޓާ ފައިނަލްގެ އުންމީދު ބޮޑު ކޮށްފަ އެވެ. މި ދެ ޓީމު ބަޔާންގެ ދަނޑުގައި ކުޅޭ މެޗު އޮންނާނީ މާޗު މަހުގެ ހަ ވަނަ ދުވަހު އެވެ. ކުއާޓާ ފައިނަލްގެ ޖާގަ ހޯދުމަށް ބަޔާނަށް ޖެހޭނީ އެ މެޗުގައި ލާޒިއޯ ބަލި ކުރާށެވެ.