''ރައްކާތެރި ވިޔަފާރިވެރިއެއް'' ނަމުގައި ގދ. ވާދޫގައި ޕްރޮގްރާމެއް ހިންގައިފި
14 ފެބުރުއަރީ 2024 | ބުދަ 08:00މަކަރާއި ހީލަތުން ފައިސާ ހޯދާ މީހުން އާންމުކޮށް ދައްކާ ވާހަކަތަކާއި ބޭނުންކުރާ އުކުޅުތައް ބުނެދީފައިވޭ
ރައްކާތެރި ވިޔަފާރިވެރިއެއްގެ ޕްރޮގްރާމްގެ ތެރެއިން
''ރައްކާތެރި ވިޔަފާރިވެރިއެއް'' ނަމުގައި ގދ. ވާދޫގައި މޯލްޑިވްސް ޕޮލިސް ސާރވިސްއިން ޕްރޮގްރާމެއް ހިންގައިފި އެވެ.
ފުލުހުން ބުނީ މަކަރާހީލަތުގެ މައްސަލަތަކުން ގދ. ވާދޫ ރައްޔިތުން ރައްކާތެރިކޮށް ހޭލުންތެރިކުރުވުމަށް މައުލޫމާތު ދިނުމަށް ވާދޫ ޕޮލިސް ސްޓޭޝަނުން ސިލްސިލާކޮށް ކުރިއަށް ގެންދާ ޕްރޮގްރާމްތަކުގެ ތެރެއިން ''ރައްކާތެރި ވިޔަފާރިވެރިއެއް'' ގެ ނަމުގައި ގދ. ވާދޫގައި ޕްރޮގްރާމެއް ހިންގައިފައިވާ ކަމަށެވެ.
ވާދޫގެ އެކި ފިހާރަތަކަށް ޒިޔާރަތްކޮށް މައުލޫމާތު ދިނުމަށް ކުރިއަށް ގެންދިޔަ މި ޕްރޮގްރާމުގައި، މަކަރާއި ހީލަތުން ފައިސާ ހޯދާ މީހުން އާންމުކޮށް ދައްކާ ވާހަކަތަކާއި ބޭނުންކުރާ އުކުޅުތައް ބުނެދީ އެފަދަ ކަންކަމުން ރައްކާތެރިވާނެ ގޮތާއި، ފިހާރަތަކުން ވައްކަންކުރުން ހުއްޓުވުމަށް އެޅިދާނެ ފިޔަވަޅުތަކުގެ މައުލޫމާތު ހިއްސާކޮށްފައިވެއެވެ. އަދި އޮންލައިންކޮށް ފައިސާދައްކާފައި ފޮނުވާ ސްލިޕަކީ ސައްހަ ސްލިޕެއްތޯ ކަށަވަރުކުރުމަށާއި ފައިސާ އެކައުންޓަށް ޖަމާވިތޯ ޔަގީން ކުރުމަށާއި އެކި ޕްރޮމޯޝަންތަކުގެ ނަމުގައި ގުޅައި އީމެއިލް އަދި ޕާސްވޯޑް ދިނުމަށް އެދުނުކަމުގައިވިޔަސް ހިއްސާނުކުރުމަށާއި އެފަދަ ކަމެއް ދިމާވެއްޖެނަމަ ފުލުހުންނަށް ރިޕޯޓުކުރުމަށް މައުލޫމާތު ދީފައިވެއެވެ.
އޭގެ އިތުރުން ވިޔަފާރި ބަންދުކުރުމަށްފަހު ފިހާރަތެރޭގައި ފައިސާ ނުބެހެއްޓުމަށާއި ފިހާރަ ރަނގަޅަށް ތަޅުލެވިފައިހުރިތޯ ޔަގީންކުރުމަށާއި ފިހާރަތަކުގެ ސަލާމަތާއި ރައްކާތެރިކަމަށް ސީސީޓީވީ ކެމެރާ ހަރުކުރުމަށް އިރުޝާދުދީފައިވެއެވެ.
ފުލުހުން ބުނީ މި ޕްރޮގްރާމުގެ ދަށުން އެރަށުގެ 14 ފިހާރައަށް ޒިޔާރަތްކޮށް މައުލޫމާތު ހިއްސާކޮށްފައިވާ ކަމަށެވެ.
