އިންޑިއާ ގައި ކުރިއަށްދާ ކެރަމްް މުބާރާތުގައި ރާއްޖޭގެ އަށް ކުޅުންތެރިން!
މުބާރާތް ކުރިއަށް ދާނީ މި މަހުގެ 13 އިން 16 އަށް
މުބާރާތުގައި ރާއްޖޭގެ ކުޅުންތެރިން ކުޅުނު މެޗެއްގެ ތެރެއިން
އިންޑިއާގައި ކުރިއަށްދާ ކެރަމް މުބާރާތެއްގައި ރާއްޖޭގެ އަށް ކުޅުންތެރިން ވާދަކުރާނެ ކަމަށް، ކެރަމް އެސޯސިއޭޝަނުން ބުނެފި އެވެ.
އިންޑިއާގެ މުމްބާއީގައި މި މަހުގެ 13 ވަނަ ދުވަހުން ފެށިގެން، 16 ވަނަ ދުވަހަށް ކުރިއަށްދާ މި މުބާރާތަކީ، މަހާރަޝްތްރާ އޯޕެން ކެރަމް ޗެލެންޖާސް ޓްރޮފީ 2024 އެވެ. މިއީ ހުރިހާ ކުޅުންތެރިންނަށް ބައިވެރިވެވޭ ގޮތަށް ހުޅުވާލައިގެން ކުރިއަށް ގެންދާ މުބާރާތެކެވެ.
މި މުބާރާތުގައި ރާއްޖެ އިން ޖުމުލަ އަށް ކުޅުންތެރިން ވާދަކުރެ އެވެ. އެ ކުޅުންތެރިންނަކީ ޙަސަން ނާޒިމް، އަޙުމަދު އިކްލީލް، މުޙައްމަދު މުންތަސިރު، އިސްމާއީލް އަޒްމީން، ޚާތިމް ޚަލީލް، ޔަމާން ޢަބްދުލް ޖަލީލް، އަލީ ނިޔާޒް އަދި އިބްރާހީމް ހުޖާން އަލީ އެވެ.
ރާއްޖެ އިން އަންނަނީ ބައިނަލްއަޤުވާމީ ފެންވަރުގައި ވެސް ބާއްވަމުން އަންނަ އެކި އެކި ކެރަމް މުބާރާތްތަކުގައި ވާދަކުރަމުންނެވެ. އެގޮތުން ކެރަމް ވޯލްޑް ޗެމްޕިއަންޝިޕް ފަދަ މުބާރާތްތަކުގައި ރާއްޖެ އިން ވާދަކޮށްފައިވާއިރު، ރާއްޖޭގެ ކުޅުންތެރިން ވަނީ ރަނގަޅު ކާމިޔާބީތައް ވެސް ހޯދައިފަ އެވެ.
