އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ބޭނުން ވަނީ ހުރިހާ ރަހީނުން މަރުވާން ކަމުގައި ބުނި އިސްރާއީލުގެ ނޫސްވެރިޔަކު ސަސްޕެންޑުކޮށްފިއެވެ.

އިސްރާއީލުގެ ޓީވީ ޗެނަލެއް ކަމަށްވާ ޗެނަލް 13ގެ ނޫސްވެރިޔާ މިހެން ބުނެފައިވަނީ އެ ޗެނެލުން ދެއްކި ލައިވް ޕްރޮގްރާމެއްގައި ވާހަކަ ދައްކަމުންނެވެ.

އޭނާ ބުނީ ރަހީނުކޮށްފައިވާ މީހުން ދޫކޮށްލުމުގެ އެއްވެސް ޝައުގުވެރިކަމެއް ނަތަންޔާހޫގެ ނެތްކަމަށާއި، ނަތަންޔާހޫ ބޭނުންވަނީ އެ އެންމެން މަރުވާންކަމަށެވެ.

ނޫސްވެރިޔާ ގިލް ތަމަރީ އަކީ އިސްރާއީލުގެ ޓީވީ ޗެނަލް " ޗެނަލް 13ގައި މަސައްކަތްކުރާ ސީނިއަރ ނޫސްވެރިއެކެވެ. ޓީވީން ލައިވް ކުރަމުންދިޔަ އެ ޕްރޮގްރާމް ނުވެސް ނިމެނީސް ނޫސްވެރިޔާ އަށް ވަނީ އެ ޗެނެލްގެ ފަރާތުން ފިޔަވަޅުއަޅާފައެވެ.

ނޫސްވެރިޔާ ފަހުން އެކަމާ ދެރަވެ އެ ޗެނެލްގެ ވެރިންގެ ކިބައިންވަނީ މަޢާފަށް އެދިފައެވެ.

ނޫސވެރިޔާ ތަމަރީ ބުނީ ޓީވީން ގެނެސްދެމުންދިޔަ އެ ލައިވްގައި އޭނާއަށް އެހެން ބުނެވުނީ ގަސްތަކާ ނުލައި ކަމަށާއި، އެއީ އަމިއްލަ އިޚްތިޔާރުން ބޭރުން ބުނެވުނު އެއްޗެއްކަމަށެވެ.

ތަމަރީ ސަސްޕެންޑުކޮށްފައިވީ ނަމަވެސް އެކަމަށް އޭނާ މައާފަށް އެދުމުން އަންނަ ބުދަ ދުވަހުން ފެށިގެން އޭނާ އަލުން ވަޒީފާއާ ގުޅޭނެ ކަމަށް އިސްރާއީލުގެ ނޫހެއް ކަމަށްވާ ހާރޭޒް ނޫހުން ރިޕޯޓުކޮށްފައިވެއެވެ.

މިސްރާއި ގަތަރު މެދުވެރިވެގެން ހަނގުރާމަ ހުއްޓައިލުމަށް މިދިޔަ ހަފުތާގައި ހުށަހެޅި ހުށަހެޅުމަށްވެސް ނަތަންޔާހޫ ވަނީ ދެކޮޅު ހައްދަވައިފައެވެ.

އޮކްޓޫބަރު ހަތް ވަނަ ދުވަހު އިސްރާއީލުގެ ފައުޖުތަކާއި ޣައްޒާގެ ވެރިކަންކުރާ ހަމާސް ޖަމާއަތާ ދެމެދު ބަދަލުކުރި ހަމަލާތަކުގައި 130 މީހަކު ހަމާސްއިން ވަނީ ރަހީނުކޮށްފައެވެ. އެ ހަމަލާތަކަށްފަހު ޣައްޒާގެ އާންމުންނަށް އަމާޒުކޮށް އިސްރާއީލު ފައުޖުތަކުން ދެމުން އަންނަ ލާއިންސާނީ ހަމަލާތަކުގައި މިހާތަނަށް 28،340 މީހުން ވަނީ ޝަހީދުކޮށްލައިފައެވެ. ހަމަލާތަކުގައި ޒަހަމްކޮށްލައިފައިވާ މީހުންގެ އަދަދު ވަނީ 67،984 އަށް އުފުލިފައެވެ.

ސާފު ބޯފެނާއި ކާނާ، އަދި ބޭސް ފަރުވާވެސް ނުލިބޭ ހާލުގައިތިބި ޣައްޒާގެ އާންމުންގެ 85 އިންސައްތަ މީހުންގެ އަމިއްލަ ގެދޮރު ދޫކޮށްލުމަށް އެ މީހުންނަށް ވަނީ މަޖުބޫރުވެފައެވެ.