މި ސަރުކާރު އޮބި މިއޮތީ މަޖިލީހުގެ މެޖޯރިޓީ ނެތުމުން - ފައްޔާޒް
ކުރިއަށް އޮތް މަޖިލީހާއި މެދު ވަރަށް އުންމީދު ބޮޑު ކަމަށް ފައްޔާޒް ވިދާޅުވި
އެމްޑީޕީގެ ޗެއަރޕަރސަން ފައްޔާޒް އިސްމާއިލް
މި ސަރުކާރު އޮބި މި އޮތީ މަޖިލީހުގެ މެޖޯރިޓީ ނެތުމުންކަމަށް އެމްޑީޕީގެ ޗެއަރޕަރސަން ފައްޔާޒް އިސްމާއޯލް ވިދާޅުވެއްޖެއެވެ.
ފައްޔާޒް މިހެން ވިދާޅުވީ މަޖިލިސް އިންތިޚާބުގައި ވާދަކުރާ އެމްޑީޕީގެ ކެންޑިޑޭޓުންގެ ފޯރމް ހުށަހެޅުމަށް ފަހު މީޑިއާތަކަށް މައުލޫމާތުދެއްވަމުންނެވެ. ސަރުކާރުން ވެރިކަމަށް އަންނަން ދެއްކި ވާހަކަތައް އެއީ ދޮގު ވާހަކަތަކެެއްކަން މިއަދު ރައްޔިތުންނަށް އެނގި ހާމަވަމުންދާ ކަމަށް ފައްޔާޒް ވިދާޅުވިއެވެ. މަޖިލިސް އިންތިޚާބު ކާމިޔާބުކޮށް ރައްޔިތުންގެ ހައްގުތައް ދިފާއުކުރުމުގައި އެމްޑީޕީން މަސައްކަތްކުރާނެ ކަމަށް އޭނާ ވިދާޅުވިއެވެ. އަދި ރާއްޖެ ހަލާކުގެ މަގަށް ދާން ދޫކޮށްލައިގެން މަޑުން ނުތިބޭނެ ކަމަށް ވެސް ފައްޔާޒް ވިދާޅުވިއެވެ. ފައްޔާޒް އިތުރަށް ވިދާޅުވީ ކުރިއަށް އޮތް މަޖިލީހާއި މެދު ވަރަށް އުންމީދު ބޮޑު ކަމަށެވެ.
އަމާޒަކީ މަދުވެގެން ކުރިއަށް އޮތް ރައްޔިތުންގެ މަޖިލީހުގެ އިންތިހާބުގައި އިދިކޮޅު އެމްޑީޕީން 65 ގޮނޑި ކާމިޔާބުކުރުން ކަމަށާއި 19 ވަނަ މަޖިލީހާއި އެއްވަރުގެ ނުވަތަ އެއަށް ވުރެ ރަނގަޅު ނަތީޖާ އެއް ހޯދުމަށް މަސައްކަތްކުރައްވާނެ ކަމަށް އޭނާ ވިދާޅުވިއެވެ. ފައްޔާޒް އިތުރަށް ވިދާޅުވީ މި ސަރުކާރާއި މެދު މިހާ ކުޑަ ދުވަސްކޮޅެއްގެ ތެރޭގައި ވެސް ރައްޔިތުން މާޔޫސްވެފައިވާ ކަމަށެވެ. އާއްމުންނަށް އޮޅުވާލުމަށް ސަރުކާރުން ދަނީ ދޮގު ހަދަމުން ކަމަށާއި ސަރުކާރުގެ ގާބިލްކަމާއި މެދު ސުވާލު އުފެދޭ ކަމަށް ވެސް ފައްޔާޒް ވަނީ ވިދާޅުވެފައެވެ.
