ޤާނޫނު އިސްލާޙުކޮށްގެން ޓެކްސްގެ ނިޒާމުގައި ހުރި ބާގަނޑުތައް ނައްތާލެވިދާނެ: ފަތުހުﷲ
11 ފެބުރުއަރީ 2024 | އާދީއްތަ 04:07ފަތުހުﷲ ވިދާޅުވީ، އަބަދުވެސް ރަނގަޅު ކުރަންޖެހޭ ކަންކަން ހުންނާނެ ކަމަށް
ކުރީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް
ޤާނޫނު އިސްލާޙުކޮށްގެން ޓެކްސްގެ ނިޒާމުގައި ހުރި ބާގަނޑުތައް ނައްތާލެވިދާނެކަމަށް ކުރީގެ ކޮމިޝަނަރ ޖެނެރަލް އޮފް ޓެކްސޭޝަން ފަތުހުﷲ ޖަމީލް ވިދާޅުވެއްޖެއެވެ.
ރާއްޖޭގެ ޓެކްސްގެ ނިޒާމަށް ބަލާއިރު، އިސްލާޙު ކުރަންޖެހޭ ގިނަ ކަންކަންވެސް ޤާނޫނުތަކުގައި އެބަހުރިކަމަށް ފަތުހުﷲ ވިދާޅުވިއެވެ. އެގޮތުން ޤާނޫނު އިސްލާޙުކޮށްގެން ޓެކްސްގެ ނިޒާމުގައި ހުރި ބާގަނޑުތައް ނައްތާލެވިދާނެކަަން އޭނާ ފާހަގަ ކުރެއްވިއެވެ.
ފަތުހުﷲ ވިދާޅުވީ، އަބަދުވެސް ރަނގަޅު ކުރަންޖެހޭ ކަންކަން ހުންނާނެ ކަމަށާއި، ނަމަވެސް ރާއްޖޭގައި މިހާރު އޮތް ޓެކްސްގެ ނިޒާމުވެސް އެކަށީގެންވާ ރަނގަޅު ގޮތެއްގައި ހިންގޭކަމަށެވެ.
ޓެކްސްގެ ނިޒާމު ތަންފީޒު ކުރަނީ ހަމައެކަނި އާދައިގެ ރައްޔިތުންގެ މައްޗަށްކަަމަށް ކުރެވޭ ޝަކުވާތަކާއި ގުޅޭގޮތުން ފަތުހުﷲ ވިދާޅުވީ، ޓެކްސް ނުދައްކައިގެން ކޯޓަށް ގޮސްފައިވާ މައްސަލަތަކުގެ ތެރޭގައި ރާއްޖޭގެ ބޮޑެތި ވިޔަފާރިވެރިންގެ މައްސަލަތައްވެސް ހިމެނޭނެކަމަށެވެ.
އަދި ފައިސާ ނުދައްކައިގެން މީރާއިން ނަން ހާމަކުރާ ފަރާތްތަކުގެ ތެރޭގައިވެސް ބޮޑެތި ވިޔަފާރިތައް ހިމެނޭނެކަން އޭނާ ފާހަގަ ކުރެއްވިއެވެ.
ފަތުހުﷲ ވިދާޅުވީ، ޓެކްސްގެ ގޮތުގައި ދައުލަތަށް ނަގާ ފައިސާ އެންމެ ރަނގަޅަށް ބޭނުންކުރޭތޯ ބަލަން ރައްޔިތުން ބޭނުންވާކަމަށެވެ.
