4000 ފްލެޓްގެ މައްސަލައިގައި ސިޓީ ކައުންސިލުން ފޮނުވި ރިޕޯޓަށް އަމަލު ކުރެވޭކަށް ނެތް: އޮފިޝަލް

ރައީސް ސާލިޙް ގެ ސަރުކާރުގެ ގެދޮރުވެރިޔާ ސްކީމް ގެ ދަށުން ދޫކުރި 4000 ފްލެޓްގެ މައްސަލައިގައި ސަރުކާރަށް ލަފާ ދިނުމަށް އުފެއްދި މާލޭ ސިޓީ ކައުންސިލްގެ ކޮމިޓީ ރިޕޯޓުގައި ކޮމިޓީ މެމްބަރުންގެ ސޮއި ހަމަ ނުވާތީ އެ ރިޕޯޓަށް އަމަލު ކުރެވެން ނެތް ކަމަށް ހައުސިންގ މިނިސްޓްރީން ބުނެފިއެވެ.

ފްލެޓް ދޫކުރުމުގެ މަސައްކަތް ގޮސްފައިވާ ހިސާބާ ބެހޭ ގޮތުން އާދިއްތަ ދުވަހު އާންމު ފަރާތަކުން މިނިސްޓްރީ އަށް މައުލޫމާތު ސާފު ކުރުމަށް ގުޅުމުން އެ މިނިސްޓްރީގެ އޮފިޝަލް ބުނީ، ބުރާސްފަތި ދުވަހު ނިންމުމެއްގެ ރިޕޯޓެއް ލިބިފައިވާ ކަމަށާއި އެހެން ނަމަވެސް ކޮމިޓީގެ މެމްބަރުންގެ ސޮއި ނެތުމާއެކު ރިޕޯޓް ފުރިހަމަ ކަމަށް ބަލައިގަނެވެން ނެތް ކަމަށެވެ.

ރިޕޯޓް ލިބުނީ ބުރާސްފަތި ދުވަހުގެ ހަވީރު ކަމަށާއި، މިނިސްޓްރީގެ ނިންމުން ތައްޔާރު ކުރެވޭނީ ކައުންސިލް ކޮމިޓީގެ ސޮއިކޮށްފައި އޮތް ރިޕޯޓް ލިބުމުން ކަމަށް އޮފިޝަލް ބުނެފައިވެއެވެ.

މިނސްޓްރީގެ އޮފިޝަލް ބުނެފައިވާ ގޮތުގައި ރިޕޯޓް ލިބުނީވެސް 12 ވަރަކަށް ފަހަރު ގުޅުމުން ކަމަށެވެ. އޭނާ ހާމާ ކުރި ގޮތުގައި ގޮތެއް ނިންމުމުގައި ލަސްވާ މައްސަލައަކީ ކޮމިޓީގައި ހިމެނޭ މެމްބަރުންގެ ސަބަބުން ދިމާވާ ކަމެއް ކަމަށެވެ.

އަނެއްކޮޅުން ހައުސިންގ މިނިސްޓްރީގެ އޮފިޝަލް ފާހަގަ ކުރި ގޮތުގައި ބުދަ ދުވަހު ސިޓީ ކައުންސިލުން ކުރިއަށް ގެންދިޔައީ ކޮމިޓީ ބައްދަލުވުމެއް ނޫނެވެ. އޭނާ ބުނިގޮތުގައި ކުރިއަށް ދިޔައީ ކައުންސިލް ބައްދަލުވުމެއް ކަމަށް ވާތީ މިނިސްޓްރީ އަށް ފޮނުވާފައިވާ ނިންމުން ނިންމާފައި އޮތީ ކޮމިޓީން ކަމަށް ނުބެލޭނެ ކަމަށެވެ.

ހައުސިންގ މިނިސްޓްރީގެ އޮފިޝަލް ބުނިގޮތުގައި ކޮމިޓީގެ ނިންމުމެއް ނިންމައިދިނުމަށް ކޮމިޓީގެ ޗެއަރގެ ގޮތުގައި ހުންނެވި ޑެޕިއުޓީ މޭޔަރ އަހްމަދު ނަރީޝް އަށް ކޮންމެ ދުވަހަކު ކަހަލަ ގޮތަކަށް ގުޅަމުން ގޮސްފައިވާނެ ކަމަށާއި ބުދަ ދުވަހުގެ ނިންމުމާ ގުޅިގެން ބާރަ ވަރަކަށް ފަހަރު އެދުވަހުވެސް އޭނާ އާ ގުޅާފައިވާނެ ކަމަށެވެ.

މެއި މަހުގެ ތެރޭގައި ފްލެޓް ކަންތައްތަކާ ބެހޭ ގޮތުން ސަރުކާރުން އުފެއްދި އެޑްވައިޒަރީ ކޮމިޓީގެ ނިންމުން ލިބިފައިވާ ކަމަށާއި އެހެން ނަމަވެސް ކައުންސިލް ކޮމިޓީގެ ނިންމުން އަދިވެސް ލިބުނު ކަމަށް ނުބެލޭ ކަމަށް ވެސް އޮފިޝަލް ބުނެފައިވެއެވެ.

ކައުންސިލްގެ ލަފާދޭ ކޮމިޓީގެ ނިންމުން ހުރިހާ މެމްބަރުންގެ ސޮޔާއެކު މި ހަފްތާގައި ލިބިއްޖެ ނަމަ މިނިސްޓްރީން ފްލެޓް ތަކުގެ މައްސަލައިގައި ނިންމާ ގޮތެއް އަންނަ ހަފްތާގައިވެސް އިއުލާން ކުރެވިދާނެ ކަމަށް އޮފިޝަލް ބުނެފައިވެއެވެ.

ބުދަ ދުވަހު ބޭއްވުނު މާލެ ސިޓީ ކައުންސިލްގެ 4 ވަނަ ދައުރުގެ 154 ވަނަ ރަސްމީ އާއްމު ޖަލްސާގައި ފްލެޓް ދޫކޮށްފައިވާ ގޮތާ ގުޅޭ ގޮތުން ހުރި މައްސަލަތައް ދެނެގަނެ އެއަށް ގޮތެއް ނިންމުމުގައި ލަފާ ދިނުމަށްޓަކައި މާލޭ ސިޓީ ކައުންސިލް ގައި އުފެއްދި ކޮމިޓީގެ ރިޕޯޓް ކައުންސިލް ބައްދަލުވުމަށް ހުށަހަޅުއްވަމުން ލަފާދޭ ކޮމިޓީގެ ރިޔާސަތު ބެލެހެއްޓެވި ޑެޕިއުޓީ މޭޔަރ އަހްމަދު ނަރީޝް ވިދާޅުވީ، ކޮމިޓީން ގޮތެއް ނިންމާފައި ވާނީ އޭސީސީން ކޮށްފައިވާ ތަހުގީގީ ރިޕޯޓްގައި ފާހަގަ ކޮށްފައިވާ ކަންތައްތަކަށާއި، މި މައްސަލައިގައި ބައްދަލު ކުރަން އައި އެކި ފަރާތްތަކުން ހުށަހަޅާފައިވާ ޝަކުވާ ތަކުގެ މައްޗަށް ބެލުމަށް ފަހު ކަމަށެވެ.

ކޮމިޓީގެ ރިޕޯޓު ކައުންސިލްގެ ބުދަ ދުވަހުގެ ބައްދަލުވުމުގައި ފާސްކުރި އިރު މިހާރު ފްލެޓް ލިބޭ މީހުންގެ ލިސްޓުގައި ހިމެނޭ މީހުންގެ ތެރެއިން އެއްވެސް މައްސަލަ އެއް ނެތް ކަމަށް ފާހަގަ ކުރެވޭ ފަރާތްތަކަށް ފްލެޓް ދިނުން އަވަސް ކުރުމަށާއި، އަދި އެއްވެސް ފަރާތެއް ލިސްޓުން އުނި ކުރާނަމަ، އެ ފަރާތެއް އުނިވި ސަބަބު ސާފުކޮށް ބުނެދޭން ޖެހޭ ގޮތައް ރެކޮމެންޑޭޝަންގައި ހިމެނުމަށްވެސް ވަނީ ފާސް ކޮށްފައެވެ.