ކިނބިދޫ އާއި ވޭމަންޑޫ ކޯޒްވޭއަކުން ގުޅާލުމުން ރަށުގައި ތިބެގެން މަތީތައުލީމަށް ކިޔެވުމުގެ ފުރުސަތު ފަހިވާނެ: ރައީސް މުއިއްޒު

ތ. ކިނބިދޫ އާއި ވޭމަންޑޫ ކޯޒްވޭއަކުން ގުޅާލުމުން ރަށުގައި ތިބެގެން މަތީތައުލީމަށް ކިޔެވުމުގެ ފުރުސަތު ފަހިވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ކިނބިދޫގެ ސްކޫލުގެ ދަރިވަރަކު ރަށުގައި ތިބެގެން މަތީ ތައުލީމު ހާސިލްކުރުމުގެ ފުރުސަތު ފަހިކޮށްދެއްވުމަށް އެދި ދެންނެވި ސުވާލަށް ޖަވާބު ދެއްވަމުންނެވެ.

ރައީސް މުއިއްޒު ވިދާޅުވީ އެރަށުގައި މިވަގުތު ގްރޭޑް 12އާ ހަމައަށް ކިޔެވެން ނެތް ނަމަވެސް ތަރައްގީގެ މަޝްރޫއުއާއެކު އެކަމަށް މަގުފަހިވާނެ ކަމަށެވެ. އެގޮތުން މިހާރު ކިނބިދޫއާއި ވޭމަންޑޫ ކޯޒްވޭ އަކުން ގުޅާލެވުމުން އެއްފަސްވާނެ ކަމަށާއި، އެއްގަމުން ދެވޭ ގޮތްވާނެ ކަމަށް ރައީސް މުއިއްޒު ވިދާޅުވިއެވެ. އަދި ވިދާޅުވީ އެއްފަސް ކުރެވެމުން ލިބޭނެ ފައިދާތަކެއް ހުންނާނެ ކަމަށެވެ.

އެގޮތުން ތައުލީމު ހާސިލް ކުރުމުގައި ވެސް އެ ލުއިފަސޭހަކަމާއި، ފައިދާ ލިބޭނެ ކަމުގެ ޔަގީންކަން އެމަނިކުފާނު ދެއްވިއެވެ.

ޔުނިވާސިޓީގެ ތައުލީމުގެ ފުރުސަތަށް އިޝާރާތް ކުރައްވައި ރައީސް މުއިއްޒު ވިދާޅުވީ ކޯޒްވޭއަކުން ގުޅި އެއްފަސްވުމުން އާބާދީ ބޮޑުވެ، އެހެން ރަށްރަށުގެ މީހުން ވެސް އަންނާނެ ކަމަށެވެ. އެއާއެކު ޔުނިވަރސިޓީގެ ކެމްޕަހެއް ގާއިމް ކުރުން ކަމުގައި ވިޔަސް ނުވަތަ ޔުނިވަރސިޓީ ތައުލީމުގެ ފުރުސަތުތައް ފަހިކޮށްދޭނެ ކަމަށް ރައީސް މުއިއްޒު ވިދާޅުވިއެވެ.