ގުރައިދޫ މަރުކަޒުން، 29 މީހަކު އާއިލާއާ ހަވާލުކުރުމުގެ މަސައްކަތް ފަށައިފި
ގުރައިދޫގެ މަރުކަޒުގައި ތިބޭ މީހުން އައިލާއިން ހަވާލުނުވާ މައްސަލަ ކުރިން އައި ނަމަވެސް، މިހާރު އެފަދަ މައްސަލަތައް މަދު ކަމަށް ވަޒީރު ވިދާޅުވި
ގުރައިދޫގައި ހުންނަ މަރުކަޒު
ކ. ގުރައިދޫގައި ހުންނަ ޚާއްސަ އެހީއަށް ބޭނުންވާ މަރުކަޒުގައި ތިބި މީހުންގެ ތެރެއިން، 29 މީހެއް އާއިލާއާ ހަވާލުކުރުމުގެ މަސައްކަތް ފެށިފައިވާ ކަމަށް ސޯޝަލް އަދި ފެމިލީ ވަޒީރު ޑރ. އައިޝަތު ޝިހާމް ވިދާޅުވެއްޖެއެވެ.
ބުރާސްފަތި ދުވަހުގެ ރޭ އެ ވުޒާރާއިން ލައިވްކުރި ޕްރޮގްރާމެއްގައި ވާހަކަ ދައްކަވަމުން ވަޒީރު ވިދާޅުވީ، ގުރައިދޫގެ މަރުކަޒުގައި ތިބޭ މީހުން އައިލާއިން ހަވާލުނުވާ މައްސަލަ ކުރިން އައި ނަމަވެސް، މިހާރު އެފަދަ މައްސަލަތައް މަދު ކަމަށެވެ.
އަދި އެ މަސައްކަތުގެ ތެރެއިން މިހާރު ވެސް 29 މީހަކު އާއިލާއާ ހަވާލުކުރުމުގެ މަސައްކަތް އެ ވުޒާރާއިން ކުރަމުންދާ ކަމަށް ވަޒީރު ވިދާޅުވިއެވެ.
ވަޒީރު ވިދާޅުވީ އުމުރުން ދުވަސްވީ ފަރާތްތަކަށް އާއިލީ ލޯތްބަކީ މުހިންމު އެއްޗެއް ކަމަށާއި، އެކަން ޙާސިލްކުރުމަށް އެ ވުޒާރާއިން ގިނަ މަސައްކަތްތަކެއް ކުރާ ކަމަށެެވެ. އަދި މިހާރު އާއިލާއާ ހަވާލުކުރެވޭ 29 މީހުންނަކީ ވެސް އެ މަސައްކަތުގެ ތެރެއިން އާއިލާއާ ހަވާލުކުރެވޭ ބައެއް ކަން ވަޒީރު ފާހަގަކުރެއްވިއެވެ.
