އުތުރު އިންޑިޔާ ގެ އުއްތަރަޚާންދްގައި ހުރި މިސްކިތެއް ސަރުކާރުން ތަޅާލުމާއި ގުޅިގެން ފެށުނު ހަރުކަށި ހަރަކާތްތަކުގައި ހަތަރު މީހުން މަރުވެ އިތުރު ބަޔަކަށް އަނިޔާވެއްޖެއެވެ.
ސަރުކާރުން ބުނާ ގޮތުގައި ތަޅާލެވުނީ ގަވާއިދާ ޚިލާފަށް އަޅާފައިވާ މިސްކިތެކެވެ. އަދި މިހާރުވަނީ ގަވާއިދާ ޚިލާފަށް ބިނާކޮށްފައިވާ ދީނީ ތަންތަން ތަޅާލުމުގެ މަސައްކަތެއް ފަށާފައި ކަމަށް ފުލުހުން ބުނެފައި ވެއެވެ.
ނަމަވެސް ތަޅާލި މިސްކިތަށް އަރާފަރާތްތަކުން ބުނި ގޮތުގައި މިކަމަކީ އިންސާފާ ހަމަތަކާބޭރުން މުސްލިމުންނާ ދެކޮޅަށް ފަށާފައިވާ ހަރަކާތެކެވެ. މިސްކިތާއެކު އެތަނުގައިވާ މަދަރުސާ އެއްވެސް ވަނީ ތަޅާލާފައެވެ. މިއާއެކު މިކަމާ ދެކޮޅު ހެދުމަށް ނިކުތް އެތައްހާސްބަޔަކާ ދެކޮޅަށް ފުލުހުންވެސް ވަނީ ހަރަކާތްތެރި ވެފައެވެ. މިގޮތުން ފުލުހުން ކަރުނަގޭސް ބޭނުން ކުރަން ފެށުމުން އެއްވި އާންމުންވަނީ ފުލުހުންނާ ދިމާއަށް ގާއުކާ އަދި ބައެއް ވެހިކަލްތަކާ ތަންތަނުގައި ހުޅުޖަހާ ހަދާފައެވެ.
ބުރާސްފަތިދުވަހު ހަވީރު ފެށުނު ކުރިމަތިލުން ތަކާގުޅިގެން މިހާރު އުއްތަރަޚާންދްގައި ގައިވަނީ ކަރފިއު ހިންގާފައެވެ. އަދި ބޭރުގަ އުޅެނިކޮން ފެންނަކޮންމެ މީހެއްގެ ގަޔަށް ބަޑިޖަހާނެ ކަމަށް ފުލުހުން ވަނީ އަންގާފައެވެ.
އުއްތަރަޚާންދްގެ ހާލަތު ހުކުރު ދުވަހުވެސް ވަރަށް ގޯސްކަމަށާ ސަރުކާރުން އެސަރަހައްދުގެ މޮބައިލް ފޯނާއި އިންޓަނެޓުގެ ޚިދުމަތްތައް މެދުކަނޑާލާފައިވާ ކަމަށް ޚަބަރުތައް ބުނެއެވެ.
ހަމަނުޖެހުންތަކާގުޅިގެން އެހިސާބުގެ ސްކޫލްތައްވެސް ވަނީ ބަންދު ކޮށްފައެވެ.
ތަޅާލެވުނު މިސްކިތް ހުންނަ ޑިސްޓްރިކްޓް ގައި މިދިޔަ އަހަރުގެ ޖެނުއަރީ މަހުވެސް ވަނީ ބޮޑެތި ހަމަނުޖެހުން ތަކެއް ހިނގާފައެވެ. އެއީ އިންޑިއަން ރެއިލްވޭސް އަށް ނިސްބަތްވާ ބިންތަކެއްގައި އުޅޭ ކަމަށްބުނެ 50 ހާހަށް ވުރެ ގިނަ މީހުންނަށް އެމީހުންގެ ގެދޮރު ދޫކޮށް ދިއުމަށް ސަރުކާރުން އަމުރު ކުރުމާއި ގުޅިގެންނެވެ.އެފަހަރުގެ އަމުރު ވަނީ މަތީ ކޯޓުން ހުއްޓުވާފައެވެ.
އޮފިޝަލުން ބުނާގޮތުގައި މިހާރު އަނެއްކާ ނުގަވާއިދުން ހުރި ތަންތަން ނައްތާލަން ފަށާފައިވަނީ ހައިކޯޓުގެ އަމުރަކާ އެކުއެވެ. ނަމަވެސް އާންމުން ބުނަނީ ކޯޓުން ގޮތެއް ނިންމުމުގެ ކުރިން މިސްކިތާ މަދަރުސާ ތަޅާލީ ކަމުގައެވެ.
