ސަޕޯޓަރުން އަރައި ތަޅައިގަނެ ވިކްޓަރީ – ކުޑަހެންވޭރު މެޗު ހުއްޓާލަން ޖެހިއްޖެ

ސަޕޯޓަރުން ދަނޑަށް އަރައި ތަޅައިގަނެ، އިރުއޮއްސި އަނދިރިވިއިރު ވެސް މެޗު ކުރިއަށް ނުގެންދެވުމުން ދެ ވަނަ ޑިވިޝަން ފުޓްބޯޅަ މުބާރާތުގައި ވިކްޓަރީ އާއި ކުޑަހެންވޭރު ކުޅުނު ކުއާޓާ ފައިނަލް މެޗު ހުއްޓާލައިފި އެވެ.

މެޗު ހުއްޓާލިއިރު މެޗުގެ ނަތީޖާ އަކީ 3-1އިން ވިކްޓަރީ ކުރީގައި އޮތުމެވެ. މެޗު ހުއްޓާލީ ދެ ޓީމުގެ މެނޭޖަރުންނާއި މެޗު ކަމިނަރަރުންނާއި ރެފްރީން ވާހަކަ ދެއްކުމަށްފަހު ފަހުން މެޗާމެދު ގޮތެއް ނިންމުމަށެވެ. މި މެޗަކީ މި ފަހަރުގެ ދެ ވަނަ ޑިވިޝަނުގައި މައްސަލަ ޖެހިގެން ހުއްޓާލަން ޖެހުނު ފުރަތަމަ މެޗެވެ. ނަމަވެސް މެޗާ ބެހޭ ގޮތުން އެފްއޭއެމުން ވަކި އެއްޗެއް ނުބުނެ އެވެ.

މެޗު ހުއްޓާލަން ޖެހުނީ 81 ވަނަ މިނިޓްގައި ވިކްޓަރީގެ އެނަޓޯލީ އާއި ކުޑަހެންވޭރުގެ މުހައްމަދު ހާޒިމް ރިފްއަތު 81 ވަނަ މިނިޓްގައި ބޯޅަ ހޯދަން އުޅެނިކޮށް ދިމާވި ހާދިސާއަކާހެދި އެވެ. ކުޑަހެންވޭރުން ބުނަނީ އެނަޓޯލީ ހާޒިމަށް ހަމަލާދިނީ ބޯޅަނެތީސް ގަސްތުގައި ކަމަށެވެ. ވިކްޓަރީ ބުނަމުންއައީ އެނަޓޯލީ އަށް މުޅި މެޗުގައި ވެސް ދިޔައީ އަނިޔާކުރަމުން ކަމަށެވެ. މި ހަމަނުޖެހުން ކޮންޓްރޯލް ކުރަން ފުލުހުން ވެސް ދަނޑަށް އެރި އެވެ.

މިއާއެކު ސަޕޯޓަރުން ދަނޑަށް އަރައި ތަޅައި ގަތުމުން ވިކްޓަރީގެ އެނަޓޯލީ އާއި ކޯޗު ސޮބާހް މުހައްމަދަށް ވެސް އަނިޔާވެ ފަރުވާދޭން ޖެހުނެވެ.

މި ހާދިސާއާ ގުޅިގެން މެޗު ކުރިއަށް ނުގެންދެވި ގާތްގަނޑަކަށް އިރުއޮއްސި 18:30ވީއިރު ވެސް ކުޅުންތެރިން ތިބީ ދަނޑުމަތީގަ އެވެ. އެއިރު ގަލޮޅު ދަނޑު އޮތީ މުޅިން އަދިރިވެފަ އެވެ. މި މުބާރާތުގެ ހުރިހާ މެޗެއް ވެސް ކުޅެން ހަމަޖައްސާފައި އޮތީ ހަވީރު އެވެ. އެއީ ގަލޮޅު ދަނޑުގެ ބޮކިދަނޑިތައް ހަލާކުވެ، ދިއްލޭގޮތް ނުވެފައިވާތީ އެވެ.

މި މެޗުން މޮޅުވާ ޓީމެއް ސެމީ ފައިނަލުގައި ވާދަކުރާނީ ނިއުރޭޑިއަންޓް ސްޕޯޓްސް ކުލަބާ އެވެ.