ބުރުނީ ކައުންސިލުން ރައީސާ ހިއްސާކުރީ، މި ސަރުކާރުން މަޝްރޫއުތައް ހުއްޓުވުމުން ދިމާވާ ގޮންޖެހުންތައް
7 ފެބުރުއަރީ 2024 | ބުދަ 13:32އެހެންނަމަވެސް އެއީ ކޮން މަސައްކަތްތަކެއް ކަމެއް ރައީސް މުއިއްޒު ވިދާޅުވެފައެއް ނުވޭ
ތ. ބުރުނީ ކައުންސިލާ ރައީސް ބައްދަލުކުރެއްވުން
ބުރުނީގެ ތަރައްގީގެ މަސައްކަތްތައް މި ސަރުކާރުން ހުއްޓުވާފައި އޮތުމުން، އެ ރަށާއި ރަށުގެ ރައްޔިތުންނަށް ލިބޭ ގޮންޖެހުންތައް ބުރުނީ ކައުންސިލުގެ ފަރާތުން ރައީސުލްޖުމްހޫރިއްޔާ ޑރ. މުހައްމަދު މުއިއްޒުއާ ހިއްސާކޮށްފިއެވެ.
މި ކަންބޮޑުވުންތައް ހިއްސާކޮށްފައި މި ވަނީ ރައީސް މުއިއްޒު ތ އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން ތ. ބުރުންޏަށް ވަޑައިގެން އެ ރަށުގެ ކައުންސިލާއެކު ބޭއްވެވި ބައްދަލުވުމުގައެވެ.
ބުރުނީ ސްކޫލުގައި ބޭއްވުނު މި ބައްދަލުވުމުގައި ކައުންސިލްގެ ފަރާތުން ވަނީ ރަށަށް ބޭނުންވެފައިވާ ކަންކަމާއި، ރަށުގެ ރައްޔިތުންނަށް ކުރިމަތިލާންޖެހިފައިވާ ބައެއް ގޮންޖެހުންތަކާއި، ބުރުނީގެ ތަރައްގީއަށް ބޭނުންވާ ކަންކަން ރައީސާ ހިއްސާކޮށްފައެވެ.
އެގޮތުން ބަނދަރުގެ އަޕްގްރޭޑިން މަސައްކަތް ހުއްޓިފައި އޮތުމުން ކުރިމަތިވާ ގޮންޖެހުންތަކާއި، ފެނުގެ ނިޒާމުގެ މަސައްކަތް ވެސް ހުއްޓިފައި އޮތުމުން ދިމާވާ ގޮންޖެހުންތައް އެ ކައުންސިލުން ހިއްސާކުރިއެވެ.
އެކަމަށް އިޝާރަތްކުރައްވަމުން ރައީސް ވިދާޅުވީ، ހުއްޓިފައިހުރި މަޝްރޫއުތައް ކުރިއަށްގެންދިއުމަށް ގިނަ މަސައްކަތްތަކެއް ކުރައްވަމުން ގެންދަވާ ކަމަށެވެ. އެހެން ނަމަވެސް އެއީ ކޮން މަސައްކަތްތަކެއް ކަމެއް ރައީސް މުއިއްޒު ވިދާޅުވެފައެއް ނުވެއެވެ.
