ގިނަ ކަސްޓަމަރުން މިއަދު ދުނިޔެއަކު ނެތެވެ. ވިޔަފާރި ކުރާނެ ފިހާރައެއްވެސް ނެތެވެ. ނަމަވެސް ޝަކުވާއެއް ނެތެވެ!

އެއީ ފެބުރުއަރީ މަހުން 6 ވަނަ ދުވަހުގެ ރޭގަނޑުގެ ވަގުތެވެ. މެންދަމުން އަލިވަމުން ދިޔައިރު އެންމެންހެން ތިބީ އަރާމު ނިންޖެއްގައި ނިދާފައެވެ. ނަމަވެސް، ހިނދުކޮޅެއްގެ ތެރޭގައި އެތައް މިލިއަން ބައެއްގެ ދިރިއުޅުން އެ ފުށް މި ފުށަށް ޖެހިގެން ދިޔައެވެ. މި ފަހުގެ ތާރީޚުގައި ތުރުކީވިލާތުގެ ތާރީޚު ދުށް އެންމެ ބާރުގަދަ ބިންހެލުމުގެ ކާރިޘާގައި އެންމެ ބޮޑު ގެއްލުންތަކެއް ލިބުނު އެއް ރަށަކީ ކަހްރަމަންމަރާސްއެވެ.

ބިންހެލުމުގެ އެޕިސެންޓަރަށްވެސް ވި ކަހްރަމަންމަރާސްއަކީ، އިލީފް މުތުލޫގެ އުފަން ރަށެވެ. ބިންހެލުމުގައި، އިލީފްއާއި އޭނާގެ ޢާއިލާގެ ހުރިހާ މުދަލަކާއި މިލްކިއްޔާތެއް ސުންނާފަތިވިއެވެ. މުޅިން ހުސް އަތާހެން އުފަން ރަށުން ފައިބައިގެން ދިޔުން ނޫން ގޮތެއް އެދުވަހަކު ނެތެވެ. އެ ނާމާން ކާރިޘާއަށް އަހަރެއް ފަހެވެ. ފެހުމުގެ މަސައްކަތުގައި އުޅޭ އިލީފް އަނބުރާ ކަހްރަމަންމަރާސްއަށް ބަދަލުވެ، ދިރިއުޅުން ކޮޅަށް ޖަހަން މަސައްކަތް ފެށިއެވެ. މި ފަހަރު، އޭނާގެ ވިޔަފާރި ކޮޅަށް ޖަހަމުން ދިޔައީ ކޮންޓޭނަރެއްގެ ތެރޭގައެވެ.

ފެހުމާއި އަތްތެރި މަސައްކަތުގެ ދާއިރާއިން އިލީފްގެ ހުނަރުތައް އެންމެ ޚާއްޞަ ވަނީ މާޖެހުމާއި، އަލަށް ކައިވެނި ކުރާ އަންހެނުންނަށް މެހްރު ފަރުމާކޮށް ތައްޔާރުކޮށް ދިނުމުގެ ރޮނގުންނެވެ. ކަހްރަމަންމަރާސްގައި އިލީފް ހިންގި ފަހާ ފިހާރަ، ބިންހެލުމުގައި ހަފުސްވިއެއް ކަމަކު، 2 ފަހާ ފޮއްޓެއް ސަލާމަތް ކުރެވުނެވެ. ބިންހެލުމުގައި ބިމަހަމަކޮށްލި ރަށުގައި އިނދެގެން ޢާމްދަނީއެއް ހޯދުމުގެ އުންމީދުގައި، އެ 2 ފަހާ ފޮއްޓާއެކު، އިލީފް ދިޔައީ ކުރިއަށެވެ. 2 ދަރިންގެ މަންމަ، އިލީފްގެ ހިތުގައި އެއްވެސް ޝަކުވާއެއް ނެތެވެ.

އިލީފް ގާތުން ޤަވައިދުން ޚިދުމަތް ހޯދާ ކަސްޓަމަރުންގެ ތެރެއިން ގިނަ މީހުން ވަނީ، ރެކްޓަރ މިންގަނޑުން 7.8ގެ ބާރުމިނުގައި އައި ބިންހެލުމުގައި މި ދުނިޔެ ދޫކޮށްފައެވެ. ދިރިތިބި މީހުންނަށްވެސް މަޖުބޫރުވީ ކަހްރަމަންމަރާސް ދޫކޮށް އެހެން ސަރަޙައްދުތަކަށް ބަދަލުވާށެވެ.

އިޤްތިޞާދީ ގޮތުން ކުރިމަތިލާން ޖެހިފައި އޮތް ތަކުލީފުތަކުގެ ސަބަބުން، ކޮންމެ މީހަކަށްވެސް ދިރިއުޅުމުގެ ކަންކަން ހަމަޖެއްސުމުގައި ތަކުލީފުތަކެއް ހުރެއެވެ. ވިޔަފާރިތައް ކޮޅަށް ޖަހަން ޖެހެނީ، ސުންނާފަތިވެފައި އޮތް ސިޓީތަކުގައެވެ. ޢިމާރާތްތައްވެސް ބިމާ ހަމަވެފައި ވާ އިރު، ވިޔަފާރި ހިންގޭނެ އިތުރު ގޮތްތައް ހޯދާ، ބަލާ، ތަޖުރިބާ ކުރުން ނޫން ގޮތެއް ވިޔަފާރިވެރިންނަކަށް ނެތެވެ.

ބިންހެލުމުގެ ބޮޑެތި ގެއްލުންތަކެއް ލިބުނު ހަތޭގައި އުޅޭ ފިކްރީތު ގެޒީޖެއަކީ ފޮޓޯ ނެގުމުގެ މަސައްކަތް ކުރާ މީހެކެވެ. ފިކުރީތުވެސް އޭނާގެ ވިޔަފާރި ކޮޅަށް ޖަހަން މަސައްކަތް ފެށިއެވެ. ހަމަ ކޮންޓޭނަރެއްގެ ތެރޭގައެވެ. އަމިއްލަ ސައިކަލު ވިއްކާލައިގެން ލިބުނު ފައިސާކޮޅާ، ރައްކާ ކުރެވިފައި ހުރި އެއްޗެއްގެ ބޭނުންކޮށްގެން އޭނާގެ ސްޓޫޑިއޯ ތަރައްޤީ ކުރިއެވެ. އުފަން ރަށުގައި މަޑުކޮށްގެން ތިބި މީހުންނަށް ބޭނުންވާ ލިޔެކިޔުމުގެ ކަންކަމުގެ ޚިދުމަތްވެސް އޭނާ ފޯރުކޮށްދެމުން ދަނީ އެ ކޮންޓޭނަރުގައެވެ.

ފިކްރީތު ފަދައިން ކޮންޓޭނަރުތަކުގައި ދިރިއުޅެމުންދާ އޭނާގެ އަޚުންނާއި އުޚުތުންވެސް މިއަދު އިންތިޒާރު ކުރަމުން ދަނީ ދާޢިމީ ޢިމާރާތްތައް މަރާމާތުކޮށް، އެތަންތަނަށް ބަދަލު ވެވޭނެ ދުވަހަކަށެވެ.

ތުރުކީވިލާތުގެ އޮފިޝަލުން ވިދާޅުވާ ގޮތުގައި ބިންހެލުން އައި ސަރަޙައްދުން 680000 އެއްހާ ގެ ވަނީ ހަލާކުވެފައެވެ. ގެދޮރު ހޯދުމަށް އެދި 390000 ޢާއިލާއަކުން ވަނީ ދަފުތަރު ކޮށްފައެވެ. ފެބުރުއަރީ 6، 2023 ވަނަ ދުވަހުގެ ބިންހެލުމުގައި ތުރުކީވިލާތުގެ 11 ޕްރޮވިންސަކުން ބައި ލައްކައަށް ވުރެ ގިނަ މީހުންގެ ފުރާނަ ގެއްލި، އެތައް މިލިއަން ބައެއްގެ ގެދޮރު ގެއްލުނެވެ.