ފްލެޓު ދޫކުރުމުގެ މަސައްކަތް ލަސްވެެގެން ގޮސް، ކޮރަޕްޝަނަށް މަގުފަހިވާނަމަ އޭސީސީން އެކަމުގެ ތެރެއަށް ވަންނާނެ
7 ފެބުރުއަރީ 2024 | ބުދަ 07:54މީހެއްގެ ހައްގެއް ގެއްލޭ ހިސާބަށް ގޮސް، ކޮރަޕްޝަނަށް މަގުފަހިވާނަމަ އެކަން ބަލާނެ
އެންޓި ކޮރަޕްޝަން ކޮމިޝަން
ގެދޮރުވެރިޔާ ސްކީމްގެ ދަށުން އިއުލާންކުރި 4000 ފުލެޓް ލިބިފައިވާ ފަރާތްތަކުގެ ތެރެއިން ފްލެޓު ލިބެންޖެހޭ ފަރާތްތަކަށް ފްލެޓު ދޫކުރުމުގެ މަސައްކަތް ލަސްވެެގެން ގޮސް، ކޮރަޕްޝަނަށް މަގުފަހިވާނަމަ އެންޓި ކޮރަޕްޝަން ކޮމިޝަން (އޭސީސީ) އިން އެކަމުގެ ތެރެއަށް ވަންނާނެކަމަށް އެ ކޮމިޝަނުން ބުނެފިއެވެ.
ކޮމިޝަނުން އެހެން ބުނީ ބުދަ ދުވަހު އޮތް މިނިވަން މުއައްސަސާތަކުގެ ކޮމިޓީ ބައްދަލުވުމުގައެވެ.
މި ކޮމިޓީގައި އޭސީސީން ބުނީ، ފުލެޓް ލިބޭނެކަމަށް ބުނެފައިވާ ފަރާތްތަކުގެ ތެރެއިން ފްލެޓު ލިބެންޖެހޭ ފަރާތްތަކަށް ފްލެޓު ދޫކުރުމުގެ މަސައްކަތް ލަސްވެެ، މީހެއްގެ ހައްގެއް ގެއްލޭ ހިސާބަށް ގޮސް، ކޮރަޕްޝަނަށް މަގުފަހިވާނަމަ އޭސީސީން އެކަމުގެ ތެރެއަށް ވަންނާނެކަމަށެވެ.
އޭސީސީން ބުނީ، ތަހުގީގުގައި ޝަރުތުހަމަވެ، އެއްވެސް މައްސަލައެއް ފާހަގަވެފައި ނުވަނީ 20.7 އިންސައްތަ ފޯމުގައި ކަމަށެވެ. އެގޮތުން އެއްވެސް މައްސަލައެއް ނެތް ފަރާތްތަކަށް ފްލެޓު ހަވާލު ކުރުމުގެ ކަންކަން ހަމަހަމަކަމާއެކު ކުރިއަށް ގެންދަން ހައުސިންގ މިނިސްޓްރީގައި ދަންނަވާފައިވާނެކަމަށް ވެސް އޭސީސީން މައުލޫމާތު ދެއެވެ.
