"މި ސަރުކާރު ފާހަގަކުރެވެނީ ބައި އަޅަން ޖެހޭ މީހުންނަށް ބައި ނޭޅީމަ، ކޮރަޕްޝަންގެ މައްސަލަ ބަލާ ސަރުކާރެއްގެ ގޮތުގައި."
8 އޯގަސްޓު 2025 | ހުކުރު 13:33ފަހަކަށް އައިސް ސަރުކާރާއި ގުޅުން ހުރި ކޮރަޕްޝަންގެ ބޮޑެތި މައްސަލަތަކެއް އަނެއްކާވެސް ވަނީ ފެންމަތިވެފަ
ކަނޑިތީމު ދާއިރާގެ މެމްބަރު އަމީން ފައިސަލް ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަނީ
މި ސަރުކާރު ފާހަގަކުރެވެނީ ބައި އަޅަން ޖެހޭ މީހުންނަށް ބައި ނޭޅީމަ، ކޮރަޕްޝަންގެ މައްސަލަ ބަލާ ސަރުކާރެއްގެ ގޮތުގައި ކަމަށް ކަނޑިތީމު ދާއިރާގެ މެމްބަރު އަމީން ފައިސަލް ވިދާޅުވެއްޖެއެވެ.
އޭނާ އެފަދައިން ވިދާޅުވި ރާއްޖެޓީވީގެ ޓީވީ ޓޯކް ޕްރޮގްރާމްގައި ވާހަކަދައްކަވަމުންނެވެ.
އާދަޔާއި ޚިލާފަށް ބޮޑަށް މި ސަރުކާރުގެ ކޮރަޕްޝަންގެ މައްސަލަތައް ފެންމަތިވަމުންދާ ކަމަށް އަމީން ވަނީ ވިދާޅުވެފައެވެ. އެންމެން ބައިވެގެން، ބައިވެރިވެގެން ސަރުކާރުގެ ކޮރަޕްޝަން ހިންގާ ކަމުގެ ވާހަކަ އަކީ އާއްމުންގެ މެދުގައި ވެސް ދެކެވެމުންދާ ވާހަކަ އެއް ކަމަށް އަމީން ވަނީ ފާހަގަކުރައްވާފައެވެ. އަދި މިހާތަނަށް ފެނުނު މަންޒަރުތަކަށް ބަލާއިރު ކޮރަޕްޝަންގެ ތުހުމަތުތައް ކުރެވިގެން އެކަހެރި ކުރާ މީހުންނަށް ވެސް ފިޔަވަޅެއް އެޅޭ މަންޒަރު ނުފެންނަކަން ފާހަގަކޮށް އަމީން ވަނީ އެކަމަށް ފާޑު ވިދާޅުވެފައެވެ.
" މި ވީހާތަނަށް ވަރަށް ގިނަ ކަންކަން ތިލަކޮށް ރައްޔިތުން މި ވަނީ ފަޅާ އަރުވާލާފައި. އެކަމަކު މިއަދާއި ހަމައަކަށް ނެތް ކުރީ ސަރުކާރުގެ ބޭފުޅެއްގެ ކޮރަޕްޝަންގެ މައްސަލަ އެއް ވެސް މި ބޭފުޅުންނަށް ބެލިފަ އެއް. ގައުމު ލޫޓުވާލައިގެން ވަޒީފާ އިން އެކަހެރި ކުރާ އިރު ވެސް ހުންނަނީ މުސާރަ އާއި އިނާޔަތް ލިބޭ ގޮތަށް. މަތީ ފަޑީގައި ތިބި މީހުންނަށް ބައި ނާޅާ ހިސާބުން މައްސަލަ މި ބަލަނީ އާއްމުންނަށް ވެސް ގަބޫލު ކުރެވޭ ގޮތުގައި. ބައި އެޅިގެން މައްސަލަ ބަލާ ނަމަ ކޮަރަޕްޝަންގެ އެއްވެސް މައްސަލަ އެއް ހިއެއް ނުވޭ ބެލޭނެހެން މި 5 އަހަރު ތެރެއަކު." އަމީން ވިދާޅުވިއެވެ.
އަމީން ވިދާޅުވީ މިހާރު އެންޓިކޮރަޕްޝަން ކޮމިޝަނުން ވެސް މިހާރު މިނިވަންކަމާއި އެކު މަސައްކަތް ކުރާ ކަަމަށް އާއްމުން މިއަދު ޤަބޫލު ނުކުރާ ކަމަށެވެ. ސިފައިންނާއި ފުލުހުންނާއި ގުޅުން ހުރި ކަންކަމުގައި މަޝްރޫޢުތަކާއި މަސައްކަތްތައް ކުރާ އިރު ވެސް އެ ދެ މުއައްސަސާ މެދުވެރިކޮށް ބިޑް ނަގައިގެން މަސައްކަތްތައް ކުރިއަށް ގެންދިއުމަކީ ހަމަޖެހޭ އުސޫލެއް ނޫން ކަމަށް އޭނާ ވަނީ ވިދާޅުވެފައެވެ.
ފަހަކަށް އައިސް ސަރުކާރާއި ގުޅުން ހުރި ކޮރަޕްޝަންގެ ބޮޑެތި މައްސަލަތަކެއް އަނެއްކާވެސް ވަނީ ފެންމަތިވެފައެވެ. އޭގެ ތެރޭގައި ބައެއް މެމްބަރުންނާއި ގުޅުން ހުރި މައްސަލަތަކާއި ކުންފުނިތަކުގެ އިސް ފަރާތްތަކާއި ގުޅުން ހުރި މައްސަލަތައް ފާހަގަކޮށްލެވެއެވެ.
