އެއްވެސް މައްސަލައެއް ނެތް ފަރާތްތަކަށް ފްލެޓު ހަވާލުކުރުމުގެ ކަންކަން ކުރިއަށްގެންދަން މިނިސްޓްރީގައި ދަންނަވާފައިވާނެ: އޭސީސީ
7 ފެބުރުއަރީ 2024 | ބުދަ 07:46ޝަރުތުހަމަވެ، އެއްވެސް މައްސަލައެއް ފާހަގަވެފައި ނުވަނީ 20.7 އިންސައްތަ ފޯމުގައި
އެންޓި ކޮރަޕްޝަން ކޮމިޝަން (އޭސީސީ)
ގެދޮރުވެރިޔާ ސްކީމްގެ ދަށުން އިއުލާންކުރި 4000 ފުލެޓް ލިބިފައިވާ ފަރާތްތަކުގެ ތެރެއިން އެއްވެސް މައްސަލައެއް ނެތް ފަރާތްތަކަށް ފްލެޓު ހަވާލު ކުރުމުގެ ކަންކަން ހަމަހަމަކަމާއެކު ކުރިއަށް ގެންދަން ހައުސިންގ މިނިސްޓްރީގައި ދަންނަވާފައިވާނެކަމަށް އެންޓި ކޮޕަރްޝަން ކޮމިޝަން (އޭސީސީ) އިން ބުނެފިއެވެ.
އޭސީސީން އެހެން ބުނީ، ބުދަ ދުވަހު އޮތް މިނިވަން މުއައްސަސާތަކާބެހޭ ކޮމިޓީގެ ބައްދަލުވުމުގައެވެ.
އޭސީސީން ފުރަތަމަ ވަނީ މި ކޮމިޓީ ސިއްރު ކޮށްދިނުމަށް އެދިފައެވެ. އޭގެ ސަބަބެއްގެ ގޮތުގައި އޭސީސީގެ ރައީސް އާދަމް ޝާމިލް ވިދާޅުވީ، މިއީ މިހާރުވެސް ތަހުގީގު ހިނގަމުންދާ މައްސަލައަކަށްވާތީ ކަމަށެވެ.
ނަމަވެސް ކޮމިޓީން ނިންމީ ތަހުގީގަށް ހުރަސްއެޅޭ ޒާތުގެ ސުވާލުތައް ފިޔަވައި އެހެން ސުވާލުތައް ކުރައްވައި އާންމުކޮށްގެން ކޮމިޓީ ކުރިއަށް ގެންދިއުމަށެެވެ.
މި ބައްދަލުވުމުގައި އޭސީސީން ވަނީ ތަހުގީގު މިހާރު ގޮސްފައި އޮތް ހިސާބާ ގުޅޭ ޕްރެޒެންޓޭޝަނެއް ކޮމިޓީގައި ހިއްސާކޮށްފައެވެ. އެއީ އޭސީސީން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވެސް ހިއްސާކުރި މައުލޫމާތުތަކެވެ.
ކޮމިޓީ ބައްދަލުވުމުގައި ބައެއް މެންބަރުން ފާހަގަކުރެއްވި ކަންކަމުގެ ތެރޭގައި ހިޔާ ފްލެޓުތަކާއި މިހާރު ދޫކޮށްފައިވާ 4000 ފްލެޓާ ގުޅިގެން އޭސީސީން ތަފާތުކުރުން ގެންގުޅެނީ ކީއްވެތޯ ކުރި ސުވާލު ހިމެނެއެެވެ.
އަދި އޭސީސީގެ ދައުރަކީ ކަރަޕްޝަނެއް އޮތްތޯ ނުވަތަ ނެތްތޯ ބަލައި، ޝަރުޠު ހަމަނުވާ މީހަކަށް ދިނުމުގައި ހިނގާދިޔަ ޢަމަލު ބަލައި، އެފަދަ ކަމެއް އޮތްނަމަ އެކަން ކުރި ބައެއްގެ މައްޗަށް ތަހްޤީޤު ހިންގުންކަމަށްވާއިރު، އެކަން ކުރުމެއް ނެތި ފްލެޓް ލިބުނު ފަރާތްތަކަށް ހުރަސް އަޅާކަމަށް ވިދާޅުވެ ވެސް ބައެއް މެންބަރުން ކަންބޮޑުވުން ފާޅުކުރެއްވިއެވެ.
މިކަމާ ގުޅޭގޮތުން އޭސީސީގެ ރައީސް ޝާމިލް ވިދާޅުވީ، އޭސީސީން ބަލާފައިވާނީ މިނިސްޓްރީން ކަނޑައަޅާފައިވާ އުސޫލުގައި ހުރި އަސާސަށް ކަމަށާއި ނަމަވެސް އުސޫލުގައި ނުހިމެނި ހުރި ކަންކަން ވެސް ހުރި ކަމަށެވެ.
ހިޔާ ފްލެޓު މަޝްރޫއާއި މި މަޝްރޫއު ތަފާތު ކުރާކަމަށް މެންބަރުން ވިދާޅުވި ވާހަކައަށް ރައްދުދެމުން އޭސީސީން ބުނީ، ހިޔާ ފްލެޓު މަޝްރޫއަކީ އެކި ކެޓެގަރީތަކަކަށް ބަހާލައިގެން ކުރިއަށް ގެންދިޔަ މަޝްރޫއެއް ކަމަށާއި، އޭގެ ތެރެއިން ބައެއް ކެޓެގަރީގައި ވަކި މުއްދަތެއް ވަންދެން މާލޭގައި އުޅެފައިވުން ޝަރުތުކޮށްފައި ނުވާ ކަމަށެވެ. އެހެންކަމުން ރަށްރަށުގައި އުޅެމުންދާ މީހުންނަށް ވެސް ފްލެޓު ލިބިފައި ހުރުން އެކަށީގެންވާކަމަށް އޭސީސީން ފާހަގަ ކުރިއެވެ.
ޝާމިލް ވިދާޅުވީ، މި މައްސަަލަ ބެލިއިރު ވެސް އޭސީސީގެ މެންޑޭޓު ތަންފީޒު ކުރުމަށްޓަކައި ވިސްނުން ބަހައްޓާފައިވާނެ ކަމަށާއި، ވީހާވެސް ނަޒާހަތްތެރިކަން ކަށަވަރު ކުރެވޭނެ ގޮތަކަށް މަސައްކަތްތައް ގެންދަވާފައިވާނެ ކަމަށް ވިދާޅުވިއެވެ.
އެގޮތުން ބަލާއިރު، ފޯމުތައް އޭސީސީން އިވެލުއޭޓުކުރީ ތަހުގީގުގެ ބޭނުމަށް ކަމަށާއި، ފޯމުތަކާމެދު ދެން މިނިސްޓްރީން އަމަލު ކުރާ ގޮތެއް ބެލުމަކީ އޭސީސީގެ މެންޑޭޓުގައި ހިމެނޭ ކަމެއް ނޫންކަމަށް ޝާމިލް ވިދާޅުވިއެވެ.
އަދި އެއްވެސް މައްސަލައެއް ނެތް ފަރާތްތަކަށް ފްލެޓު ހަވާލުކުރުމުގެ ކަންކަން ހަމަހަމަކަމާއެކު ކުރިއަށް ގެންދަން މިނިސްޓްރީގައި ދަންނަވާފައިވާނެކަމަށް ވެސް ޝާމިލް ވިދާޅުވިއެވެ. އޭސީސީން ބުނީ، ތަހުގީގުގައި ޝަރުތުހަމަވެ، އެއްވެސް މައްސަލައެއް ފާހަގަވެފައި ނުވަނީ 20.7 އިންސައްތަ ފޯމުގައި ކަމަށެވެ.
