ފްލެޓްތައް ދޫކުރުން ލަސްކުރަނީ މަޖިލިސް އިންތިޚާބަށް ނުފޫޒު ފޯރުވަން، ރައްޔިތުން މުޒާހަރާއަށް ނުކުންނަންޖެހޭ: މެންބަރު ޔައުގޫބް

ފްލެޓްތައް ދޫކުރުން ލަސްކުރަނީ ކުރިއަށް އޮތް ރައްޔިތުންގެ މަޖިލީހުގެ އިންތިޚާބަށް ނުފޫޒު ފޯރުވުމަށް ކަމަށާއި، ފްލެޓްތައް ދޫކުރަންދެން ރައްޔިތުން މުޒާހަރާއަށް ނުކުންނަންޖެހޭ ކަމަށް ދާންދޫ ދާއިރާގެ މެންބަރު، ޔައުގޫބް އަބްދުﷲ ވިދާޅުވެއްޖެއެވެ.

ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން މާލެ ސަރަހައްދުން ފްލެޓް ލިބޭ ފަރާތްތަކަށް ވީހާވެސް އަވަހަކަށް ފްލެޓު ދޫކުރުމަށް ގޮވާލައި ހުށަހެޅި މައްސަލާއާ ގުޅޭގޮތުން މެންބަރު ޔައުގޫބު ވިދާޅުވީ މި 4000 ފްލެޓް މިސަރުކާރުން ބޭނުންކުރަމުންދަނީ އެންޓި ކޮރަޕްޝަން ކޮމިޝަން (އޭސީސީ) ހައުސިން މިނިސްޓްރީ ގުޅިގެން ކުރިއަށް އޮތް މަޖިލިސް އިންތިޚާބަށް ސީދާ ރައްޔިތުންނަށް ނުފޫޒު ފޯރުވައި، އެމީހުންނަށް ބިރު ދެއްކުމަށް ކަމަށެވެ. އަދި މި މަސައްކަތުގައި އެންމެ ބުރަކޮށް އުޅެނީ އެސީސީން ކަމަށް މެންބަރު ޔައުގޫބު ތުހުމަތު ކުރެއްވިއެވެ.

މެންބަރު ޔައުގޫބު ވިދާޅުވީ އޭސީސީން މަސައްކަތް ކުރަމުންދަނީ ސްކޯޕުން ބޭރުން ކަމަށާއި، އެ ކޮމިޝަންގެ މެންބަރުން މަޖިލީހަށް ހާޒިރުކޮށް މައްސަލަ ބަލަންޖެހޭ ކަމަށެވެ.

މީގެ އިތުރުން މެންބަރު ޔައުގޫބު ވިދާޅުވީ ކުރިއަށް އޮތް މަޖިލިސް އިންތިޚާބަށް މި 4000 ފްލެޓްގެ ތެރެއިން 2400 ފްލެޓްގެ 93 ދާއިރާއަށް ކޮންމެ ދާއިރާއަކަށް ސަރުކާރުގެ ކެންޑިޑޭޓުންނަށް 25 ފެލެޓުގެ މަގުން ބަހާލަން ނިންމާފައިވާ ކަމަށެވެ.

މިމައްސަލައިގައި މުޒާހަރާއަށް ނުކުންނަންޖެހޭކަން ފާހަގަކުރައްވައި މެންބަރު ޔައުގޫބު ވިދާޅުވީ ގެދޮރުވެރިޔާ ސްކީމްގެ ދަށުން އިއުލާންކުރި 4000 ފުލެޓް ލިބިފައިވާ ރައްޔިތުން، ފްލެޓުތައް ހަވާލުކުރަން ދެން ސިލްސިލާ މުޒާހަރާތަކެއް ކުރަންޖެހޭ ކަމަށެވެ.

މެންބަރު ޔައުގޫބުގެ އިތުރުން ވެސް މި މައްސަލައިގައި ބަހުސް ކުރެއްވި ގިނަ މެންބަރުން ވަނީ އޭސީސީއަށް ބޮޑެތި ތުހުމަތުތަކެއް ކުރައްވާފައެވެ. އޭސީސީއަކީ މިހާރު ސިޔާސީ ތަނެއް ކަމަށާއި، އޭސީސީގެ މެންބަރުން ސިއްރު ބައްދަލުވުންތަކެއް ބާއްވަވާ މަޝްވަރާތަކެއް ކުރަމުންދާކަން ވެސް މެންބަރުން ވިދާޅުވެފައިވެއެވެ. ހައުސިން މިނިސްޓަރުގެ މަގާމަށް އައްޔަން ކުރެއްވި ޑރ. އަލީ ހައިދަރަށް ރުހުން ނުދިނުމުން ދެވަނަ ފަހަރަށް ވެސް އެމަގާމަށް ޑރ.ހައިދަރު އައްޔަން ކުރެއްވި މަގުސަދު މިއަދު ވަރަށް ބޮޑަށް ސާފުވެފައިވާ ކަމަށް މެންބަރުން ވިދާޅުވިއެވެ. އަދި ގިނަ މެންބަރުން ވަނީ ފްލެޓު ދިނުން ލަސްކުރާތީ އެކަން ކުށްވެރިކޮށް ވީ އެންމެ އަވަހަށް ހައްގުވެރިންނަށް ފްލެޓުތައް ދޫކުރުމަށް ގޮވާލައްވާފައެވެ.